Нема да се прават никакви отстапки за фудбалерите што до 26 март треба да пристигнат во Македонија од Италија за фудбалскиот натпревар со Косово. И во двете репрезентации, македонската и косовската, има фудбалери што настапуваат во италијанските првенства, таму живеат и треба да дојдат за натпреварот во Скопје.

Министерот за здравство, Венко Филипче, рече дека доколку по зајакнувањето на безбедносните мерки во Италија нема промени во однос на патувањата, за нив во нашата земја ќе важат истите правила за заштита од коронавирусот што важат и сега.

„Ќе ги чекаме денешните препораки од италијанските здравствени власти да видиме какви заострени мерки воведуваат во споредба со овие досега. Имавме прашања од повеќе институции што очекуваат гости, странци, за повеќе поводи и настани. За сите ќе важат истиот алгоритам и став доколку ситуацијата е како што е сега. Ќе мора да поминат на сите скрининзи на аеродромите или на сувоземните премини, да се следат алгоритмите, да се направат интервју и потоа да се постапи во согласност со тие препораки. Нема отстапување од тоа што е препорачано од Комисијата за зарани болести од Комитетот што ги следи овие состојби за кој било човек што доаѓа од каде било“, рече министерот Филипче.

За нашата репрезентација од Италија треба да пристигнат Горан Пандев, Илија Несторовски и Елиф Елмаз.