Преспанскиот договор е дел од македонските закони и македонскиот устав и тука нема никаква дилема. Секој кој е дел од институциите треба да ги почитува. Како човек кој што ќе ја предводи владата, сум обврзан да ги почитувам законите и уставот, нагласи лидерот на ВМРО-ДПМНЕ и нов мандатар, Христијан Мицкоски одговарајќи на прашањето дали стравува од влошување на односите со Грција и други земји од меѓународната заедница поради ставот околу употребата на името на државата.

„Зошто би стравувал, ерга омнес ние го користиме. Очекувам да градиме добрососедски односи на принципиелна, конструктивна основа. Добрососедски односи кои доликуваат на 21 век. Немам намера талибански да се однесувам, ниту пак очекувам некој талибански да се однесува. Моето човеково загарантирано право е право кое што е над сите права. Додека ја вршам офаа функција претседател на влада, се што е поврзано со нашиот правен систем, уставниот поредок ќе го почитувам до последната точка и запирка. Луѓето што ме познаваат знаат дека така лесно не се изненадувам“, рече Мицкоски.

Нагласи дека јавноста треба повеке да се насочи кон анализа на тоа што Грција има испочитувано и спроведено од договорот.

„Ајде да видиме што тие направија во овие шест години. Ајде да видиме што правеа во минатото, што требаше ние да добиеме. Кога во минатото се менуваше знамето, кога се менуваа банкнотите, кога се користеше понижувачкото име. Подготвен сум да зборувам за се. Кај мене нема да видите да ја повторувам придавката како папагал, а позади завесата да живеам како деспот. Ако некој мисли дека може на сила нешто да ми одземе, тогаш треба да мисли и на чекорот потоа. А тоа е дека, со сила работите во 21 век не се решаваат“, потенцира Мицкоски.

Нагласи дека нема да водиме провокативна офанзивна политика туку сакаме да градиме мостови а соседите мора да се почитуваат.

„Но немаме намера да бидеме подлизурковци, да се понижуваме самите себе“, подвлече новиот мандатар.

Формално ние можеме да ја избереме новата влада уште утре со 61 пратеник, но имајќи ги предвид разговорите што привршија и коалицијата што е направена, наш предизвик е да имаме двотретинско мнозинство во парламентот, изјави Христијан Мицкоски, кој денес го доби мандатот за составот на новата влада.

„Тоа мнозинство ни е потребно затоа што планираме преструктуирање на владата поврзано со програмата на ВМРО-ДПМНЕ. Второ, имаме силен реформски циклус, особено во оној дел што треба да дојде до објавување жесток фронт против криминалот и корупцијата, а за тоа да се случи, треба главните столбови – Обвинителството и судството да бидат ослободени од партизираните малкумина обвинители и судии. Тоа ќе се направи со распуштање две институции – Советот на јавните обвинители и Судскиот совет, но за тоа да се случи, мора да има измена на соодветните закони, а за тоа е потребно двотретинско мнозинство во парламентот“, рече Мицкоски.

Прашан како ја коментира изјавата на новиот собраниски спикер Африм Гаши, кој во својата изјава вели дека неговата татковина е Косово, идниот мандатар и лидер на ВМРО-ДПМНЕ, Христијан Мицкоски, денеска одговори дека ја нема слушнато изјавата, но рече дека од Гаши лично чул дека нивна заедничка татковина е Македонија. Сепак, како што рече Мицкоски, доколку имало таква изјава, тогаш Гаши треба да се извини.

„Мислам дека неговата татковина е Македонија и од она што сум го разговарал, сум слушнал лично од Гаши, дека наша заедничка татковина е нашата заедничка Македонија. Но, ако има таква изјава, тогаш треба да им се извини на граѓаните и тоа треба што побргу да го направи бидејќи од тука зема плата. И од страна на Македонците, Албанците, Турците, Бошњаците, Србите, Ромите, Власите е избран за претседател на Собранието“, потенцира Мицкоски.

Од него беше побаран одговор и за тоа дали ДУИ се понудила да биде дел од идната влада, на што идниот мандатар одговори дека не би сакал преговорите да бидат бројки, туку тоа да биде процес на квалитетни решенија и одлуки.

Рече дека ја следи опасната игра кај ДУИ и смета дека поединци сакаат да внесат етнички провокации во соживотот на Македонија.

„Ги гледам етноцентристичките изјави, кои доаѓаат од некои од официјалните лица на ДУИ. Можеби на тој начин сакаат да внесат етнички провокации во соживотот. Преговорите да бидат сведени на функции колку добиле Македонците, Албанците. Ја следам оваа опасна игра на поединци и ако така продолжат, многу бргу вистината ќе излезе на виделина“, порача лидерот на ВМРО-ДПМНЕ.