Македонија
(Видео) Советничката група на ВМРО-ДПМНЕ во Карпош: Бараме хумана урбанизација наместо три нови згради

Советничката група на ВМРО-ДПМНЕ и коалицијата е против донесувањето на детаљниот урбанистички план за Градска четврт Ј03 блок 2 онаков каков што е предложен за денешната седница, рече Адријана ЈакимовскаП-анчевска, советник на ВМРО-ДПМНЕ во Советот на Општина Карпош.
Таа рече дека советничката група на ВМРО-ДПМНЕ ќе гласа против бидејќи, како што рече, барањата и забелешките на граѓаните се идентични со ставот, заложбите и програмските определби на ВМРО-ДПМНЕ.
„Во овој предлог-детален план се предвидуваат три нови згради -единаесеткатница, седумкатница и шесткатница. Се одзема дел од постојните гаражи, кои се приватна сопственост на граѓаните, со цел да ѝ се удоволи на градежната мафија за да добие фреквентна сервисна улица за да биде во сервис на новите згради. Се уништува зеленило за катна гаража, која е предвидена на постоен паркинг-простор“, изјави советничката на ВМРО-ДПМНЕ во Советот на Општина Карпош.
„Катна гаража се предвидува само за да може планот да се нарече развоен. На простор на кој има потреба од плус паркинг-место се цртаат згради, а на зеленило се цртаат катни гаражи“, додаде таа.
Јакимовска-Панчевска апелира до претседателот на Советот од Левицата и до градоначалникот дека игри со распоредот на денешниот дневен ред не прифаќаат, бараат точката да остане на дневен ред да може советниците да дискутираат и да ја гласаат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делови од Центар, Аеродром и Ѓорче Петров денеска без струја

Од ЕВН Македонија АД известуваат дека поради технички зафати во електродистрибутивната мрежа денеска, без електрична енергија ќе останат:
· од 08:00 до 14:00 часот, корисниците од улицата Јосиф Јосифовски Свештарот, општина Центар;
· од 08:00 до 15:00 часот, корисниците од улиците: 1 , 2, и 3 во село Долно Лисиче, општина Аеродром;
· од 08:00 до 15:00 часот, корисниците од дел од ул. 3-та Македонска Бригада, поточно објектите во околината на СУГС Владо Тасевски, oпштина Аеродром;
· од 09:00 до 13:00 часот, корисниците од дел од ул. Црногорска, општина Ѓорче Петров.
Македонија
Претежно сончево и топло, максималната температура до 37 степени

Времето денеска ќе биде претежно сончево и топло. Ќе дува слаб до умерен ветер од јужен правец.
Минималната температура ќе биде во интервал од 7 до 17, а максималната ќе достигне од 30 до 37 степени.
Во Скопје, сончево и топло со слаб до умерен ветер од јужен правец. Минималната температура ќе се спушти до 13, а максималната ќе достигне до 37 степени.
Времето во наредните денови
Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен јужен, а во недела северозападен ветер, кој ќе услови опаѓање на дневната температура. Потоа следува период на стабилно и потопло време.