Сопругата на претседателот, Елизабета Ѓоргиевска, се обрати на конференцијата „Родова еднаквост на работното место“, што денеска се одржа во Кабинетот на претседателот.

Според Ѓоргиевска, досегашните анализи на националните, регионалните и на глобалните состојби упатуваат на една загрижувачка тенденција – и покрај напредокот во степенот на образованието на жените, на нивното работно искуство и стручност, сè уште нема рамноправна валоризација на трудот на жените. Причините за оваа дискрепанција меѓу декларативното и фактичкото во однос на примањата, според Ѓоргиевска, се многубројни, структурни и честопати гравитираат околу родово-базираната дискриминација, со која се соочуваат многу жени и во македонското општество.

„Принципот на еднакво вреднување за еднаква работа е еден од најстарите принципи на Европската Унија. Оттука, проблемот со нееднаквата заработка не е само економско и политичко, туку и прашања на правичност. Имено, еднаквото достоинство меѓу мажите и жените подразбира и правична валоризација на нивниот вложен труд. Жените што се еднакво третирани се многу помотивирани да вложуваат во личниот и кариерниот развој и со тоа да придонесуваат кон колективниот напредок на целото општество“, рече Ѓоргиевска.

„Затоа, за да се затвори родовиот јаз и да се намали нееднаквоста на жените во економската сфера, ги поддржуваме мерките за економско јакнење на жените, за женско претприемаштво, за праведно и достоинствено вреднување на работата. А со тоа ќе придонесеме кон постигнувањето родова еднаквост“, рече Ѓоргиевска.

Главна цел на конференцијата, што се одржа под покровителство на сопругата на претседателот, а во организација на Центарот за управување со промените (ЦУП) и Алијансата за родова еднаквост (ГЕА), е да се поттикне прашањето за родовиот јаз во платите, да се анализираат состојбите, трендовите и да се пренесе важна порака за значењето на надминувањето на родовиот јаз во платите како дел од комплексниот процес на унапредување на родовата рамноправност.

Свои поздравни обраќања на настанот имаа и Нина Ангеловска, претседателка на ГЕА, и Неда Малеска-Сачмароска, извршна директорка на ЦУП. Во рамките на конференцијата се одржаа две панел-дискусии на тема „Состојбата со родовата еднаквост на работното место во Република Северна Македонија“ и „Градење подобри работни места преку обезбедување родова еднаквост“.