Македонија
Сопружници сакале нелегално да изнесат 16 илјади долари од државата, ги спречиле царинските инспектори

Царински инспектори од мобилниот тим на Секторот за контрола и истраги спречија обид на двајца сопружници нелегално да изнесат од државата девизи во вредност од 16 илјади долари.
Сопружниците, инаку македонски државјани, на излез од државата на граничниот премин Богородица на прашање од страна на мобилните инспектори дали имаат нешто да пријават одговориле дека немаат ништо, велат од Царинската управа.
„При извршена детаљна контрола на возилото во предната касета биле пронајдени 16 илјади долари. Во согласност со Законот за девизното работење на двете лица им се вратени по 2.100 долари, а другите 11.800 се привремено одземени.
По земањето изјави од патниците, против возачот е поднесена пријава за девизен прекршок.
Ги известуваме граѓаните дека при излез од државата може да носат ефективни странски пари во износ од 2 илјади евра од лице. Доколку изнесуваат девизи во износ од над 2 илјади евра, должни се да ги пријават на царинскиот орган со презентирање потврда од овластена банка или менувачница. Девизи во вредност од над 10 илјади евра не е дозволено да се изнесуваат“, се наведува во соопштението на Царинската управа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муртезани: Со зајакнати капацитети кон поефикасна реализација на ИПА програмите

Министерот за европски прашања, Орхан Муртезани, во улога на Национален координатор за ИПА (NIPAC), денеска го копретседаваше Третиот состанок на Мониторинг комитетот за Инструментот за претпристапна помош ИПА III, нагласувајќи ги актуелните политички и технички предизвици поврзани со ефикасното искористување на европските фондови.
Министерот Муртезани истакна дека оваа Влада ќе преземе важни иницијативи за стабилизација на ИПА структурите и за решавање на наследените проблеми од претходниот период, меѓу кои се високата флуктуација на професионалниот кадар, задоцнетите постапки за јавни набавки и значителните отстапки во секторите транспорт и животна средина. Тој подвлече дека до крајот на 2024 година, договорените средства за ИПА II достигнале 71%, додека искористувањето на средствата од ИПА III во истата година е на ниво од 31,37%. Министерот укажа на важноста од интензивирање на имплементацијата на тековните програми за да се избегне неискористување на ИПА средствата во иднина.
Муртезани се осврна и на мерките за зајакнување на административните капацитети и најави интензивен ангажман за системско решение на политиките за задржување и континуирана обука на државните службеници. Тој посочи дека Министерството за европски прашања работи на воспоставување Академија за ЕУ, чија задача ќе биде обезбедување квалитетна и одржлива обука за кадарот ангажиран во ИПА структурата.
Со состанокот претседаваше и Валентина Суперти, раководител на одделение при Генералниот директорат за проширување и источно соседство (DG ENEST) при Европската комисија, која се осврна на важноста од јасно дефинирани обврски и активности за надминување на сегашните предизвици во управувањето со ИПА програмите.
Мониторинг комитетот за ИПА е највисокото надзорно тело за сите ИПА програми и има задача да обезбеди ефективна, транспарентна и усогласена реализација на европската претпристапна помош во Северна Македонија, во согласност со Рамковната спогодба за финансиско партнерство помеѓу Европската комисија и Република Северна Македонија, соопшти Министерството за европски прашања.
Македонија
Нема опасност за жителите по излевањето на Маркова река

Нема опасност за жителите од излевањето на Маркова река, а водостојот е вратен во коритото, информираат од Дирекцијата за заштита и спасување. Од таму додаваат дека еден тим за брз одговор интервенирал со пумпи за извлекување на вода и истите ќе интревенираат по потреба во текот на денот.
„По првичната информација за излевањето на Маркова река во Општина Студеничани, село Батинци, екипата за процена на ризици на Дирекцијата за заштита и спасување одблиску на терен ја следеа состојбата. Директорот Џеват Селами беше во постојана комуникација со екипите на терен, градоначалникот на општина Студеничани, г-дин Азем Садики, директорот на А.Д. Водостопанство, г-дин Филип Филиповски, сѐ со цел да се обезбеди координиран и ефективен одговор. Еден тим за брз одговор интервенираше со пумпи за извлекување на вода, и истите ќе интревенираат по потреба во текот на денот“, се наведуваа во соопштението.
Од таму додаваат дека според досегашните информации ситуацијата е под контрола и нема опасност за жителите и дека е евидентирана материјална штета што допрва ќе се проценува.
Македонија
„За само 6 месеци ги покачивме пензиите на над 330.000 пензионери за 5000 денари“, велат од Владата

„На сметките на пензионерите легна покачувањето на пензиите од 2500 денари. Со ова покачување, вкупното линеарно зголемување на пензиите достигнува 5.000 денари, откако првото зголемување беше со септемвриската пензија и сега со мартовската пензија.Ова е втор раст на пензиите за само 6 месеци“, велат од Владата.
„Имено, дека Владата се грижи за пензионерите покажува тоа што уште првата недела од мандатот донесе одлука за линеарно покачување на пензиите на сите пензионери за 5000 денари, со септемвриската и мартовската пензија.
Ветивме и исполнивме. Владата ги покачи пензиите за 5000 денари, линеарно за секој пензионер.
Владата покажа дека се грижи и работи одговорно и посветено.
Пензионерите заслужуваат достоинствен живот и вистинска грижа за нивните потреби.
Со ова како Влада го исполнивме едно од ветувањата за најстарата категорија на граѓани и обезбедивме поквалитетен живот за нив.
Продолжуваме посветено да работиме за подобрување на животниот стандард на граѓаните“, се наведува во соопштението на Владата.