Македонија
Сопственик ја обвини Општина Гази Баба дека планира да проектира улица на неговиот имот

Сопственикот на имот кој се наоѓа до објектот на универзитетот ФОН, Киро Тошевски, ја обвини Општина Гази Баба дека планира да му проектира улица на неговиот имот без да го консултира. Станува збор за имот кој се води на правното лице „Бана ДООЕЛ“ од Скопје, за кој од имотниот лист произлегува дека е со вкупна површина од 12,612 квадратни метри, впишани во 2014 година. На таа катастарска парцела во тек е постапка за изготвување детален урбанистички план.
Инвеститорот е убеден дека ќе им биде одземен дел од имотот, односно дека ќе немаат пристап до парцелата која е во нивна сопственост. Од „Бана ДООЕЛ“ тврдат дека постапката за изготвување на ДУП-от е направена со манипулации во кои се инволвирани лица од Општина Гази Баба, како и сопственикот на соседната парцела, бизнисменот Фијат Цаноски. „Макфакс“ го контактираше Цаноски. Тој вели дека не нарачувал промена на деталниот урбанистички план. „Јас имам чист плац со 3 влеза и не сум замешан во изготвување на никакви промени“, рече Цаноски.
„Ние дадовме согласност“, вели Цаноски за проектирањето улица, но потенцира дека за сите промени на катастарската парцела согласност треба да дадат и другите сопственици. Тошевски, пак, тврди дека зад барањето за проектирање улица стојат фирмите на Цаноски, „Фине“. Инвеститорот најави тужба за нарушено владение за, како што вели, узурпацијата на нивниот приватен имот.
Општината добила и писмо од инвеститорот во кое пишува дека „Бана ДООЕЛ“ не се согласува да биде проектирана улица на парцелата која е на нивен имот. Добиле известување од Општина Гази Баба дека ќе го информираат изготвувачот на ДУП-от институтот „ИН-ПУМА ДОО“ од Скопје.
„Макфакс“ минатиот петок испрати прашања до Општина Гази Баба. До овој момент не добивме повратен одговор. Минатата недела го контактиравме и градоначалникот на општината, но тој не одговори на телефонскиот повик.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Перински во Чаир: Заедно продолжуваме да градиме мултиетничка хармонија и решенија за сите предизвици

Министерот за локална самоуправа, Златко Перински, заедно со неговиот заменик, Ерџан Селими, денеска ја посетија скопската Општина Чаир, како дел од теренските посети на општините „Каде што срцето е дома“.
На работната средба со градоначалникот Висар Ганиу и членовите на општинскиот Совет, разговараа за актуелниот процес за измени на Законот за локална самоуправа, дискутираа за децентрализацијата, како и за можностите за надминување на одредени проблеми со кои се соочува Општината поради игнорантскиот однос на Град Скопје и за евентуалните измени на Законот за Град Скопје. Од Општината информираа и за тековните проекти кои ги реализираат, како и за подготвеноста за учество на вториот јавен повик за финансиска поддршка на инфраструктурни проекти, кои ќе се финансираат од државниот буџет.
Министерот Перински истакна дека Општина Чаир е една од важните симболи на мултиетничката и мултикултурната традиција во Скопје, а истовремено специфична и по други околности.
„Општина Чаир брои 63.000 жители, а се простира на само 3,5 квадратни километри, што значи многу жители на мала територија, што само по себе е предизвик да се испочитуваат потребите на граѓаните во целост. Ние како Министерство и како Влада, продолжуваме да работиме заедно со општините на создавање услови за подобар живот за сите наши граѓани, без разлика на нивната етничка или верска припадност. Најважно од се е да ги решаваме предизвиците кои ги наметнува урбаното живеење, да ги слушнеме потребите на граѓаните и да инвестираме за да се надминат сите предизвици“, изјави министерот Перински.
Градоначалникот Ганиу изрази благодарност за транспарентноста, кооперативноста и континуираната соработка од страна на Министерството за локална самоуправа, како и за финансиската поддршка на Владата за реализација на инфраструктурни општински проекти.
„Периодов имавме многу средби на кои дебатиравме за измените на Законот за локална самоуправа и верувам дека заеднички ќе создадеме Закон кој ќе овозможи пофункционални општини, за доброто на граѓаните. Соработуваме и по основ на јавните повици за финансиска поддршка на општински проекти. Веќе 100 отсто ни се исплатени средствата за проектите од првиот повик, а се подготвуваме да аплицираме со 25 проекти на вториот повик. Оваа Влада со дела покажа дека не ги дели општините по ниту еден основ, туку искрено е фокусирана на надминување на предизвиците со кои се соочуваат општините и граѓаните со желба за поголем развој и напредок на сите локални самоуправи“, истакна градоначалникот Ганиу.
Посетата на министерот Перински на општина Чаир продолжува утре со средба со сите заинтересирани граѓани, претставници на невладини организации, спортски и културни работници, кои сакаат да дадат свои предлози и сугестии во насока на поголем напредок на Општината. Средбата ќе се одржи во 18.30 часот во ОУ „Исмаил Ќемали“.
Македонија
Мицкоски најави реконструкција на болницата „8-ми септември“ и нова административна зграда на Охридскиот аеродром „Св. Апостол Павле“

Реконструкција на ЈЗУ Градска општа болница „8-ми септември“ и реконструкција и нова административна зграда на Охридскиот аеродром „Св. Апостол Павле“, најави премиерот на Македонија Христијан Мицкоски на својот профил на „Фејсбук“.
Од Министерството за здравство неодамна најавија дека „8 Септември“ ќе стане регионален центар за лекување на пациенти од Скопје, Куманово и Велес.
Скопје
Во текот на една недела санкционирани 149 непрописно паркирани возила во Општина Центар

ЈП Паркинзи на Општина Центар во соработка со Сообраќајната полиција-Скопје во периодот од 17.02. до 23.02.2025 година, со помош на специјалните возила „Пајак“ отстранија 149 непрописно паркирани возила кои го попречувале нормалното и безбедно одвивање на сообраќајот.
„ЈП ПОЦ и Општина Центар секојдневно водат грижа за да го доведат во ред сообраќајниот хаос настанат од непрописно паркираните возила на територијата на Општина Центар. Потсетуваме на почитување на сообраќајните правила од страна на секој учесник во сообраќајот со цел одржување на ред и безбедност на улиците“, велат од ЈП Паркинзи.