Македонија
Сојузот на средношколците поднесе иницијатива до Уставниот суд: сите ученици да имаат бесплатен јавен превоз

Сојузот на средношколците поднесе иницијатива до Уставниот суд за оценување на уставноста и законитоста на членот 41 А од Законот за средното образование.
Законските измени што ги предлага Сојузот се однесуваат на правото на бесплатен јавен превоз на сите средношколци. Претседателот на Сојузот, Лука Павичевиќ, на денешната прес-конференција рече дека моментно не се третирани сите средношколци еднакво бидејќи има повеќе категории средношколци што ова право го немаат.
„Во март одржавме прес-конференција и најавивме дека нашите предлог-измени на Законот за средното образование во однос на овој член ќе ги поднесеме до Собранието и им дадовме рок од два месеца, односно до 15 мај, да го стават во постапка и да го донесат бидејќи не стануваше збор за обемен и сложен закон, туку за интервензија во само еден член“, рече Павичевиќ.
Тој вели дека најмногубројни се учениците од приватните училишта, но и учениците од стручните училишта, кои посетуваат феријална практика во текот на распустите.
„А феријалната практика е училишна обврска пропишана и со закон и пропис. Исто така, и учениците со посебни образовни потреби, кои се сместени во училишните домови и посетуваат т.н. специјални училишта, немаат право на јавен превозбидејќи нивните домови се веднаш до училиштата. Ова создава нееднаква и отежната состојба за овие лица“, рече тој.
Немаат право на бесплатен превоз ниту учениците што живеат на помалку од 2,5 километра од училиштето.
Според него, сегашните одредби во законот се косат со членовите 9 и 44 од Уставот. Членот 9 вели дека сите граѓани се еднакви во слободите и правата, независно од полот, расата, бојата на косата, националното и социјалното потекло, политичкото и верското уверување, имотната и општествената положба. А членот 44 од Уставот, пак, вели дека секој има право на образование.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Зоран Димитровски: Не размислуваме, ниту поддржуваме идеи за отворање кампови за враќање одбиени баратели на азил

Заменик-министерот за надворешни работи и надворешна трговија, Зоран Димитровски, вчера и денес (21-22 октомври 2025) учествува на годишната конференција за миграции во Виена (Vienna Migration Conference), во организација на Меѓународниот центар за развој на миграциските политики – ИЦМПД.
На десеттата виенска конференција за миграции присуствуваат повеќе од 250 носители на одлуки, владини претставници, експерти од областа на миграцијата, меѓународни организации, академската заедница и цивилното општеството, кои прават напори за поврзување на миграциските текови со најсоодветните стратешки политики и решенија.
Во рамките на конференцијата „Западен Балкан: Регионални перспективи за миграцијата и партнерствата“, заменик-министерот Димитровски учествуваше во разговор еден на еден со генералниот директор на ИЦМПД, Михаел Шпенделегер, посветен на предизвиците и можностите што ги носи променливата миграциска слика во регионот.
За време на разговорот беше нагласено дека Западен Балкан се наоѓа на уникатна пресвртница во управувањето со миграциите како регион што истовремено е место на потекло, транзит и сè повеќе дестинација за мигрантите. Овој динамичен контекст отвора нови предизвици, но и можности за економски развој, особено во услови на зголемена побарувачка за работна сила и недостиг на работници во клучни сектори.
Заменик-министерот Димитровски посочи дека нашата земја активно се приспособува на новата реалност преку развивање политики за управување со легалната миграција, кои одговараат на демографските и на економските потреби на земјата. Притоа беше истакната и важноста од градење партнерства со земјите на потекло за развој на одржливи модели на работна мобилност, подобрување на системите за враќање и намалување на нерегуларната миграција.
Во разговорот беше истакнато дека овие процеси се во согласност со европските иницијативи, како што се пактот за миграција и азил, како и акцискиот план на ЕУ за Западен Балкан, кои го потенцираат значењето на соработката со земјите на потекло во делот на мобилноста, развојот на вештини и управувањето со враќањето на мигрантите.
Беше нагласено дека Северна Македонија, како и земјите од Западен Балкан, е дел од Европа и нејзините политики, а не простор надвор од нејзините граници. Во таа насока, нашата држава ниту размислува ниту поддржува идеи за отворање кампови за враќање одбиени баратели на азил.
На маргините на конференцијата заменик-министерот Зоран Димитровски оствари повеќе средби и разговори со истакнати владини претставници и министри, кои учествуваат на конференцијата.
Македонија
Mицкоски се сретна со кралот Чарлс: „Беше искрено и содржајно“

Премиерот Христијан Мицкоски на социјалните мрежи објави дека во рамките на престојот во Лондон остварил средба со Неговото Кралско Величество, Кралот Чарлс III.
„Средбата беше искрена и содржајна. Разговаравме за пријателството помеѓу Македонија и Обединетото Кралство, за стабилноста, развојот и заштитата на природата, области на кои кралот со години им посветува големо внимание“, информира Мицкоски.
Како што додаде, оваа средба е признание и почит, но и поттик да се продолжи по патот на заедничките вредности, довербата и партнерството.
Во рамките на Берлинскиот процес, што го организира премиерот Кир Стармер, Мицкоски остварува повеќе средби насочени кон економска и инфраструктурна стратешка соработка со Обединетото Кралство.
Македонија
Полицијата претресува на повеќе локации во Скопје поради лихварство и перење пари

Под раководство на предметен обвинител од Основното јавно обвинителство за гонење организиран криминал и корупција (ОЈО ГОКК), полициски единици на МВР извршуваат претреси на повеќе локации во Скопје.
Според информациите, се работи за лица осомничени за кривични дела лихварство и перење пари.
Од Обвинителството најавуваат дека повеќе детали ќе бидат соопштени по завршувањето на акцијата.