Македонија
(Видео) Спасен маж од длабока тиња и кал како од жив песок на реката Пчиња

Центарот за управување со кризи објави дека утрово имало спасувачка акција на реката Пчиња, каде што човек пропаднал до гуша во тиња и кал.
„Денеска, пред зори, имаше неколкучасовно успешно, а опасно извлекување од длабока тиња и кал како жив песок, и тоа и за заробениот човек и за спасителите – пожарникарите, Конкретно, имаше комбинирана спасителна акција од страна на пожарникарите од Територијалната противпожарна единица и Итната медицинска помош од Куманово.
Кумановските пожарникари, на чело со командирот на смена Сашо Илиевски, неколку часа, од околу 4, па до 7 часот утрово, беа во спасувачка акција. Итниот случај на 112 во ЦУК го пријавил риболовец, кој ги слушнал повиците за помош на лицето кое покрај реката заглавило во длабоката тиња и кал, на овој потег од реката Пчиња.
Ситуацијата била опасна бидејќи полека, како што лицето, возрасен маж, сакало да се самоизвлече, сè повеќе пропаѓало на местото на кое почвата била буквално како маскиран жив песок со исушен слој најгоре, на површината, од топлото време, а надоу како да немало дно“, информираат од ЦУК.
Тимот пожарникари, како што додаваат, бргу и навреме стигнал до оддалеченото место од пристапен пат бидејќи лицето било веќе речиси до рамењата и вратот пропаднато и на крајот од силите поради долготрајното заглавување, при што полека тонело во меката почва.
Пожарникарите успеале да го фатат со јажиња од својата опрема и полека почнале да го извлекуваат, при што било потребно и нивно доизвлекување бидејќи и тие тонеле полека во меката почва. Еден со друг тимски си помагале, етапа по етапа, од сложеното, а навидум едноставно извлекување и спасување на заглавеното лице од опасниот терен.
Кога пожарникарите го извлекле од длабоката тиња и кал, што буквално било како жив песок, лицето речиси се онесвестило и го ставиле на специјалната спасителна штица за носење. Додека едни го носеле, други со секири го расчистувале пред нив патот од вегетацијата и дрвјата за да се пробијат до пристапниот пат, каде што ги чекала итната медицинска помош. Настраданиот е жив, но многу истоштен и снеможен од долготрајното заглавување. Тој е веќе во болница во Куманово и е надвор од животна опасност, соопшти ЦУК.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јавен обвинител бил во „Макпрогрес“ ама увидот не е почнат, пожарот уште тлее

Јавен обвинител од Основното јавно обвинителство од Кочани бил во фабриката „Макпрогрес“ но, како што информира Државното јавно обвинителство, увидот се уште не е почнат бидејќи пожарот не е во целост изгаснат и се уште траат активностите за обезбедување на локацијата.
– Во меѓувреме, јавниот обвинител издава наредби и насоки за други дејствија за целосно испитување на настанот, информираат од Јавното обвинителство.
Пожарот во фабриката за кондиторски производи и вафли избувна вчеравечер околу 18 часот при што беа опожарени магацински и производствени погони. Покрај пожарникарите од Виница, во гаснењето беа вклучени и пожарникари од неколку соседни општини.
Сите се во стабилан здравствена состојба. На осум лица, вработени во фабриката, им била укажана лекарска помош во Клиниката за токсикологија во Скопје. Четворица од пожарникарите кои учествуваа во гаснењето на пожарот, биле примени во Општата болница во Кочани, а една пожарникарка била хоспитализирана во Клиничката болница во Штип.
Македонија
Полициски хеликоптер и два ер трактори се борат со пожарот кај Раштак

Пожар попладнево изби над скопското село Раштак на Скопска Црна Гора. Чадот од пожарот се гледа од поголем дел од Скопје.
Дирекцијата за заштита и спасување информира дека пожарот се гасне и од воздух и дека се вклучени два „ер трактора“ и еден полициски хеликоптер.
– Во гаснењето учествуваат повеќе екипи на БППЗ Скопје, тим на ДЗС, два ер трактора на ДЗС и еден полициски хеликоптер, информира директорот на ДЗС Стојанче Ангелов.
Македонија
Сите хоспитализирани од пожарот во Виница се во стабилна здравствена состојба, соопшти МЗ

Тринаесет лица се хоспитализирани по пожарот што вчера доцна попладне избувна во фабриката за кандирани производи и вафли „Макпрогрес“ во Виница. Сите хоспитализирани се во стабилна здравствена состојба, соопштија попладнево од Министерството за здравство.
Осум лица, вработени во фабриката, биле на Клиниката за токсикологија во Скопје, една пожарникарка била хоспитализирана во Клиничката болница во Штип, а четворица пожарникари во Општата болница во Кочани.
Во гаснење на пожарот во Виница, покрај пожарникари од виничката Територијална противпожарна единица, вчера биле вклучени и пожарни единици од соседните општини.
Според последните информации од Центарот за управување со кризи, до 12 часот денеска, пожарот во фабриката е ставен под контрола.