Македонија
Спасовски: Едукација на кадри за справување со насилниот радикализам и екстремизам

Размената на искуства, тесната и отворена комуникација и континуираната обука и едукација се фундаментални фактори доколку се тежнее кон поголема ефикасност и функционалност на која било институција, нејзина подготвеност да се фати во костец со секакви видови предизвици. А особено тоа е суштински важно кога тема ни е сферата на безбедноста, којашто, пак, денес веќе е наметната како прашање пар екселанс како за националната, така и за регионалната, односно колективната сигурност, рече министерот за внатрешни работи, Оливер Спасовски во своето обраќање на Регионалниот семинар – обука на обучувачи на тема „Превенција/борба против насилен екстремизам“, кој денеска во Скопје се одржува во организација на Регионалниот совет за соработка и Националниот комитет за спречување насилен екстремизам и борба против тероризмот.
„Овој семинар посветен на практичните аспекти на институционалната обука, или поконкретно – на натамошната едукација на кадри што потоа ќе треба стекнатите знаења и искуства да ги аплицираат во професионалното дејствување, низ призмата на проблематиката на насилниот радикализам и екстремизам, како дел од корпусот на безбедносни предизвици, претставува исклучителна можност да се слушнат стручни, издржани и нови експертски сознанија и видувања за успешно спротивставување со таквите закани. Дотолку повеќе што насилниот радикализам и екстремизам и тоа како се тесно испреплетени или знаат да бидат во основата и на терористичкото дејствување. Она што дополнително импонира е фактот што организаторите на овој семинар, Регионалниот совет за соработка и Националниот комитет за спречување насилен екстремизам и борба против тероризмот, нудат опсервација на подрачјето на рана детекција и превенција на радикализмот и екстремизмот, во фази кога институциите задолжени за спроведување на законите можат да најдат соодветни механизми за благовремено дејствување и спречување н, така да ги наречам, малигните форми на тие појави“, рече Спасовски.
Како и за секое друго општество, така и за нашето, примарен приоритет претставува заштитата на граѓаните од влијанието на екстремистичките и радикалистички идеологии, независно врз која основа се засновани.
„Спречувањето на екстремизмот и генерално борбата против тероризмот подразбираат идентификација и откривање на факторите кои придонесуваат за радикализам, екстремизам и насилни активности во форма на тероризам и терористички активности. Превентивното дејствување нужно наметнува потреба од широка вклученост на различните општествени чинители, вклучително дури и на локалните средини или заедници. Притоа напоредно градејќи стручно и професионално валидни и кредибилни стандарди на работење. Во овој контекст дозволете ми да нотирам дека во градењето инклузивна заедница отпорна кон разните радикални и екстремистички уверувања или идеологии, Министерството за внатрешни работи на Република Македонија активно партиципира преку рана детекција на сите облици на екстремно дејствување во заедницата и превентивно дејствување, дополнително развивајќи го концептот на „партнерство“ со заедницата. Се разбира, свесни дека, меѓу другото, активната вклученост на граѓаните од превентивен аспект, преку навремена размена на информации за потенцијалните процеси на радикализација и екстремно дејствување имаат есенцијално значење“, рече Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
УЈП со повик за исполнување на ДДВ обврските: евидентирана е загрижувачка состојба

Управата за јавни приходи информира дека заклучно со 25 јули 2025 година евидентирана е загрижувачка состојба во однос на исполнувањето на обврските поврзани со данокот на додадена вредност (ДДВ).
„Според последните податоци: не се поднесени ДДВ-пријави од 142 месечни и 2.134 тримесечни обврзници. Пријавен, но неплатен ДДВ-долг е евидентиран кај 1.326 месечни и 7.748 тримесечни обврзници.
Директорката на Управата за јавни приходи, Елена Петрова, со порака: „Непочитувањето на законскиот рок е сериозен прекршок. Сите обврзници кои не поднеле ДДВ-пријава или не го платиле ДДВ-долгот се повикуваат итно да постапат согласно законските прописи. Даночната дисциплина не е избор, туку законска обврска и одговорност на секој граѓанин и компанија, темел за функционална држава.“
Управата за јавни приходи, како што додаваат во информацијата, веќе доставила персонализирани известувања до сите ДДВ-обврзници кои имаат пријавен, а ненаплатен долг за соодветниот даночен период.
„Преку координирано постапување и интензивна комуникација со даночните обврзници и со сметководителите, се спроведува целосен сет активности и мерки — со цел да се избегнат блокади на сметки и дополнителни трошоци за присилна наплата. За секој ден на задоцнување, се пресметува камата во износ од 0,03% од преостанатиот долг. По доставата на опомените, управата ќе пристапи кон присилна наплата кај сите обврзници кои нема да го подмират долгот доброволно. Со цел навремено информирање и исполнување на обврските, како и обезбедување солидна даночна историја, УЈП останува во постојана комуникација со сите релевантни страни“.
Македонија
Владата донесе одлука за промена на таблиците на службените возила и отворање на конзулат во Корча

Владата на денешната 97 седница донесе одлука сите државни институции да ги променат регистарските таблици на службените возила со новите таблици со боја најдоцна до 15 септември 2025 година. Оваа одлука е во насока на уште едно реализирано ветување пред граѓаните со цел поголема отчетност, транспарентност и ставање крај на злоупотребите кои со биле пракса во минатото, соопшти владината служба.
Дополнително, Владата на предлог на Министерството за надворешни работи и надворешна трговија донесе одлука за отворање на генерален конзулат во Корча со јурисдикција во целиот регион. „Граѓаните мора да имаат брз и ефикасен сервис и услуги, поддршка за културни, образовни и економски врски.
Владата продолжува со конкретни мерки и политики кои имаат за цел да ја потврдат вистинската грижа за подобрување на стандардот и враќање на довербата на граѓаните во институциите“.
Македонија
Со запален факел се обидел да подметне пожар во Струмица: под истрага едно лице за загрозување на општата сигурност

Јавен обвинител од Основното јавно обвинителство Струмица донесе Наредба за спроведување истражна постапка против едно лице за обид да изврши – Тешки дела против општата сигурност од член 292 став 1 во врска со член 288 став 1 од Кривичниот законик.
Осомничениот вчера попладне, преку една социјална мрежа, се заканил на лице од Струмица дека ќе му ја запали викендицата, а потоа се обидел заканите да ги реализира.
На локацијата брана Водоча се обидел да подметне пожар и да предизвика поголема имотна штета. Со запален факел од хартија и текстил ги запалил гредите на натстрешницата, кои започнале да чадат и да горат. Со тоа предизвикал ризик од пожар не само на објектот, туку и на повеќе други викенд-куќи и на нискостеблеста и високостеблеста вегетација во непосредна близина.
Поради опасност од бегство и можност да го повтори односно да го доврши делото, јавниот обвинител до судијата на претходна постапка достави предлог за определување мерка притвор.