Македонија
Спасовски и Гир на системот ТЕТРА-4: Со опрема од 22 милиони евра, МВР треба да презентира напредни комуникациски алатки

Министерот за внатрешни работи, Оливер Спасовски, денеска заедно со амбасадорот и шеф на делегацијата на Европската Унија во земјава, Дејвид Гир, како и дел од раководството на МВР и канцеларијата на ЕУ, присуствуваа на завршниот настан на проектот – „Понатамошна надградба на ТЕТРА системот -ТЕТРА 4“, финансиран со средства од националната ИПА програма за 2016 година, средства обезбедени од страна на Европската Унија.
Спасовски упати благодарност до амбасадорот на ЕУ во земјава, и претставниците на проектот на Европската Унија за континуираната поддршката и помош што нашата земја, но и МВР ја добиваат во насока на реформирање и модернизација на институциите, истакнувајќи пред присутните дека е завршен уште еден од низата капитални проекти од посебно значење за редовното постапување на припадниците на Министерството, при вршење на работите што се однесуваат на остварување на системот на државната и јавната безбедност.
„TETРA е дигитален европски стандард за мобилно радио, развиен од страна на индустриски експерти, заедно со Европскиот институт за телекомуникациски стандарди (ETSI) и важи за неприкосновен стандард за најсложените и најпрофесионалните корисници на радиокомуникациите ширум светот. Согласно последните информации, ТЕТРА-стандардот се користи во над 120 земји на над 3,5 милиони уреди“, нагласи Спасовски потенцирајќи дека кај нас ТЕТРА-системот претставува единствен дигитален радиокомуникациски систем за јавната безбедност на национално ниво којшто го користи МВР, но и на други институции со што, пак, се овозможува заедничка меѓусебна комуникација и координација при извршување на задачи од безбедноста.
„Понатамошна надградба на ТЕТРА-системот -ТЕТРА 4, претставува четврта и последна фаза од овој голем проект, од исклучително значење за МВР. Првите три успешно спроведени фази од ТЕТРА-проектот, со вкупна вредност од 19 милиони евра, со средства обезбедени од страна на Европската Унија, а со четвртата и последна фаза од овој проект, кој беше имплементиран преку два договора, со вкупна вредност од 3.495.000 милиони евра, се направи надградба на националниот ТЕТРА телекомуникациски систем, со цел да се овозможи покриеност на територијата на Република Северна Македонија поголема од 90%. Оттука, со реализацијата на оваа фаза може да констатираме дека зададените цели од почетокот на проектот се веќе остварени. Ова за нас претставува вредна инвестиција, што значително ќе ја зголеми ефикасноста на полицијата, ќе воведе нови стандарди во полициското постапување и е од исклучително значење за самите полициски службеници кои на терен добиваат софистицирана, доверлива и безбедна комуникација. И конечно, со имплементацијата на овој проект нашата полиција достигнува исто ниво со полициите на земјите членки на Европската Унија во однос на европските телекомуникациски стандарди“, констатираше Спасовски.
„Петнаесет години по започнувањето на овој проект и со вложена опрема од 22 милиони евра, Министерството за внатрешни работи сега треба да презентира напредни комуникациски алатки. Овој дигитален систем обезбедува безбедна и сигурна комуникација меѓу сите полициски служби, вклучително и единиците кои работат во поодалечените погранични области. Оваа опрема е слична на опремата што се користи во земјите членки на ЕУ. Радиокомуникацијата сега ја покрива речиси целата територија на државата. Многу е важно овој систем да се прошири за да се вклучат дополнителните служби за итна помош како што се брзата помош и противпожарните бригади, рече евроамбасадорот Гир.
„Со ова полицијата ќе може подобро да се поврзе со другите служби при итни случаи како на пример при природни катастрофи. Оваа опрема наскоро ќе стане еден од најважните комуникациски канали на обединетиот Европски систем за итна помош Е-112. Придобивките за граѓаните се јасни: побрза реакција од полицијата и другите институции во случај на потреба, поголема општа безбедност и подобрено индивидуално чувство на безбедност. Овој проект носи придобивки и за цела Европа, со оглед на стратешката локација во однос на главните европски коридори и канали на нелегални меѓународни активности. На тој начин дополнително го подобрува нашето партнерство“, рече амбасадорот на ЕУ, Гир.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Поединци од СДС потпалуваат за да има политички пожари, а го бранат и Коцевски како последен бастион за нивниот криминал

Христијан Мицкоски, претседател на ВМРО-ДПМНЕ и премиер на вечерашната трибина на тема „Реформи во здравството, ги градиме темелите на промените“ во организација на ВМРО-ДПМНЕ, а која се одржа во Штип се осврна на актуелни теми меѓу кои ситуацијата со пожарите и гласањето недоверба во Собранието за јавниот обвинител Љупчо Коцевски.
„Гледам една нескриена радост и возбуда кај опозицијата од пожарите. Истата таа возбуда ја имаа и кога секојдневно ја злоупотребуваа големата и ужасна трагедија во Кочани. Така брутално, дневно политички и паушално излегуваат на прес-конференции додека стотици граѓани заедно со пожарникарите и полицијата и луѓето од „Македонски шуми“ борба бијат на дневно ниво против пожарите во Македонија и во време кога за жал нашата татковина во одредени делови е во пламен“, рече Мицкоски.
Мицкоски укажа дека „тие наместо да бидат помеѓу народот одбираат со салонски прес-конференции да потпалуваат и да се радуваат на секој пожар“.
За разлика од претходната владата, сега, кажа тој, актуелната за една година ги стави во употреба авионите, леталата, цела флота на БТР возила, хермелини и пинцгауери за гасење на пожари.
„Кога нивни луѓе ќе ги видиме озарени како потпалуваат пожари за да има политички пожари, како живи ќе ги фатиме со огнот во раце за да имаат потоа причина за прес-конференции, тука се е јасно“, кажа Мицкоски.
Коментираше и за гласањето недоверба за јавниот обвинител Коцевски.
„Уште една тема којашто вчера многу јасно, кристално јасно ја видовме во македонското Собрание како постапуваат против интерпелацијата на државниот јавен обвинител. Сами се соголија. СДСМ и ДУИ останаа единствената сламка за спас на кариерата на државниот јавен обвинител затоа што е јасно дека тој им е последниот бастион во одбрана на нивниот криминал во изминатите 7 години, затоа нема ниту еден отворен случај против висок функционер на СДСМ и ДУИ“, посочи Мицкоски.
Според него, „паѓаат во вода сите оние тиради од прес-конференции за оној страшен ужасен случај во Кочани, оние лажни повици, буцкањата каде лажно велеа дека бараме правда“.
„Па тој случај токму го води, токму овој за којшто сега зборував, нивниот државен јавен обвинител и нема потреба да повикуваат јавно, слободно нека си го викнат, нека си се затворат во канцеларија тие малкумина што останаа во раководството на СДСМ и ДУИ и нека си го прашаат Коцевски до каде е. А ние нема да се откажеме од борбата за правда и подобар живот и правда ќе има, и ќе има подобра иднина која сакаме да ја донесеме“, дополни Мицкоски.
Македонија
Андоновска: Во Институтот за јавно здравје секој тргнувал само од личниот интерес

Директорката на Институтот на јавно здравје и член на ИК на ВМРО-ДПМНЕ, Марија Андоновска, во рамки на вечерашната трибина „Реформи во здравството, ги градиме темелите на промените“, истакна дека наследиле распаднати институции каде што воопшто не се размислувало за услугите и грижа за граѓаните. Таа додаде дека конкретно во Институтот, ниту една работа не била водена согласно законските прописи.
„Мораме да ги поставувавме темелите повторно, и нема да се откажеме и сме силно мотивирани да го направиме тоа. Најдовме распаднати институции, каде што воопшто не се размислувало ниту за услугите, ниту за институциите, а најмалку за граѓаните. Секој тргнувал само од личниот интерес, ниту една работа што ја затекнав во Институтот не беше водена согласно законски прописи, се беше спротивно на законот“, нагласи Андоновска.
Андоновска објасни дека со преземањето на Институтот, затекнале опрема којашто била купена скапо, но не се употребувала повеќе години. Таа информираше дека опремата веќе е ставена во употреба, се со цел граѓаните да може да се обратат во државните институции.
„Затекнавме опрема којашто е купена многу скапо и може да биде многу од корист на граѓаните, но е вон употреба повеќе години. Ја ставивме таа опрема во употреба и направивме се за таа да може да профункционира, повторно да можат граѓаните да се обратат во државните институции, наместо да одат само во приватните и да имаат дополнителни трошоци. Воведовме втора смена и сме единствената микробиолошка лабораторија којашто можат граѓаните да ја посетат и после работното време“, заклучува Андоновска.
Македонија
Стабилно снабдување на онкологија и хематологија, за само една година, две промени во позитивната листа на лекови која не беше обновена 10 години, се пофали Клековски

„Не почнавме од нула, туку од минус. 10 години во Македонија не беше обновена позитивната листа на лекови. 10 години од 2014-та година ниедна промена на позитивната листа, за една година ние успеавме да направиме две промени. Во првата промена 9 генерички лекови, во последната 2 онколошки лекови кои од следниот понеделник ќе бидат достапни во аптеките“, истакна членот на ИК на ВМРО-ДПМНЕ и директор на ФЗОМ, Сашо Клековски на денешната трибина во Штип на тема „Реформи во здравството – Ги градиме темелите на промените“.
Клековски додаде дека фокусот бил ставен на лековите.
„Благодарејќи на поддршката на владата одвоивме неверојатни пет милијарди денари за иновативни лекови, тоа е 70% повеќе од 2024-та година или двојно повеќе до 2023-та година. Тоа се многу повеќе пари, една милијарда повеќе за онкологија, повеќе пари за хематологија, педијатрија. Ова не се само пари, ова се животи спасени и олеснети. Стабилно снабдување на онкологија и хематологија, сите пациенти на неврологија со мултипла склероза опфатени. Луѓето на кои им треба хормон раст не чекаат веќе на тоа, и многу такви примери“, вели Клековски.
Тој истакна дека бројот на ин витро што го покрива ФЗОМ наместо 3 сега е зголемено на 6 и исто така процесот за добивање известување за барателите на ин витро е дигитализиран.