Македонија
Спасовски-Марин Лопез: Континуираната соработка е од големо значење за креирање услови за модерно полициско работење
Министерот за внатрешни работи Оливер Спасовски, на покана на Агенцијата на Европската Унија за обуки за спроведување на законот (ЦЕПОЛ), оствари средба со директорката на ЦЕПОЛ, Мариа Монтсерат Марин Лопез, а во рамки на Берлинскиот процес, што се одржува во Тирана, Република Албанија.
Двајцата соговорници се согласија дека соработката меѓу МВР и ЦЕПОЛ е континуирана и од големо значење за креирање на услови за модерно полициско работење.
„Соработката помеѓу МВР и Агенцијата на Европската Унија за обуки за спроведување на законот (ЦЕПОЛ), ја започнавме во 2017 година со Работен аранжман кој овозможи учество на службеници за спроведување на законот на Република Северна Македонија на обуки на ЦЕПОЛ, како и учество на службеници за спроведување на законот од ЕУ, кои работат во областа на правдата и внатрешните работи на обуки организирани од страна на Центарот за обука на полиција на РСМ. Притоа, во последниве години соработката бележи особен пораст и се одвива непречено главно преку учество на службениците за спроведување на законот на РСМ на специјализирани/резидентни обуки скроени согласно Стратешката проценка за потреби од обука EU-STNA во организација на Агенцијата, како и преку учество на Програмата за размена на службеници за спроведување на законот. Со задоволство можам да констатирам дека досега околу 120 преставници од МВР ги посетиле обуките на ЦЕПОЛ за размена на најдобри практики”, рече Спасовски, додавајќи дека од големо значење е зајакнувањето на капацитетите на властите на Западен Балкан во борбата против организиран криминал и тероризам.
„Тука би го споменал и проектот кој се реализира од 2020 година „Партнерство против криминалот и тероризмот во Западен Балкан (CEPOL WV PaCT)“ кој произлезе од Декларацијата од Софија и стратегијата на Европската комисија за Западен Балкан, во која Европската Унија споделува многу безбедносни закани со Западен Балкан и работи посветено на зголемување на оперативната соработка со регионот во борбата против организираниот криминал и тероризмот. Од големо значење за нас како држава е зајакнувањето на капацитетите на властите на Западен Балкан во борбата против организираниот криминал и тероризмот, вклучително и спречување и сузбивање на насилниот екстремизам преку зајакнување на соработката помеѓу земјите во регионот како и соработката со Европската Унија”, истакна Спасовски, со уверување дека МВР стои на располагање за сите идни активности на ЦЕПОЛ, а воедно ја изрази и отвореноста за продлабочување на веќе добрата соработка во сите области од заеднички интерес, а кои подразбираат квалитативно надградување на сите аспекти на модерното полициско работење.
Директорката на ЦЕПОЛ, Мариа Монтсерат Марин Лопез, рече дека следната година заедно со нејзиниот тим ќе ја посетат Република Северна Македонија, при што ќе биде презентиран нов пакет на обуки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Герасимовски: Со директорите на училиштата и градинките договоривме конкретни мерки, дератизација, дезинсекција и дезинфекција на сите училишни објекти
Градоначалникот на Општина Центар, Горан Герасимовски, денес одржа работна средба со директорите на основните училишта и градинките, на која беа договорени конкретни активности за одржување на хигиената во образовните установи на највисоко ниво.
Договорено е во текот на викендот да се спроведе повторна дератизација, откако веќе имаше една пред изборниот процес. Веднаш потоа ќе следат дезинсекција и дезинфекција на сите училишни и предучилишните објекти.
„Ова што денеска го договоривме се реализира согласно усвоените кризни мерки на Општина Центар за справување со потенцијални епидемии, заразни болести и појава на глодари опасни по здравјето, а во рамки на актуелната состојба со сметот“ посочи Герасимовски.
Планот, освен дератизација, предвидува темелна дезинфекција и дезинсекција на сите простории каде се учи и престојува, вклучувајќи подови, ѕидови и мебел. Ќе се користат сертифицирани и безбедни препарати, согласно упатствата и стандардите за заштита на здравјето на децата и вработените.
Активностите за чистење на воспитно-образовните установи се преземаат во рамки на заштита на здравјето и безбедноста на децата и персоналот, особено во услови на еколошки и здравствени предизвици и појава на глодари, информираат од општината.
Герасимовски истакна дека општината ќе продолжи со редовно следење на состојбата и континуирана соработка со директорите, со цел да се обезбедат хигиенски услови во средини каде престојуваат вработените и децата.
Македонија
Tримесечна специјализирана обука: Лекарската комора го условува продолжувањето на лиценцата на д-р Кузмановски
Комисијата за етички и правни прашања при Лекарската комора го разгледала поднесеното барање за продолжување на лиценцата за работа на докторот Кузмановски, постапувајќи, како што информираат од таму, со најголема сериозност и одговорност.
„Како резултат на констатираните наводи и за да се гарантира заштитата на пациентите и интегритетот на лекарската професија, Комората, покрај законски утврдените услови, донесе одлука за преземање на дополнителни мерки. Имено, беше одлучено дека д-р Кузмановски, за да може неговото барање да биде одобрено, мора да помине тримесечна специјализирана обука под директно водство на ментор. По завршувањето на обуката, докторот ќе подлежи на испит за детална проверка на стручните знаења и способности.
Имајќи во предвид дека Законот за здравствена заштита прецизно ги утврдува условите за издавање, обновување, продолжување и одземање на лиценците за работа, а во моментов не постои судска пресуда или друг правен акт кој би условил одбивање на барањето за одземање на лиценцата, Комората ја користи законската можност да наметне засилен механизам на контрола и едукација“.
Паралелно со ова, како што велат, во Комората тече и сеопфатна процедура поврзана со неговото етичко однесување како доктор.
Комората, додаваат од таму, даде јавна и остра морална осуда за однесувањето на докторот, јасно ставајќи до знаење дека со своето однесување тој ги крши етичките принципи и го нарушува интегритетот и угледот на лекарската професија.
„За да се донесе конечна, издржана и најправедна одлука, Комората ги очекува извештаите на комисиите формирани од Министерството за здравство и Универзитетската клиника за неврологија, кои треба да дадат поширока претстава за професионалниот лик и стручната способност на докторот во целина. Конечната одлука на Комората ќе биде донесена по темелна анализа на сите прибрани докази и извештаи“.
Македонија
Сообраќајна несреќа на патот Македонска Каменица – Делчево, сообраќајот во прекин
Денеска од 12.02 часот на магистралниот пат Македонска Каменица – Делчево, поради случена сообраќајна несреќа, сообраќајот е во целосен прекин, соопшти АМСМ.
Сообраќајот на државните патишта се одвива непречено, по влажни коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

