Македонија
Спасовски: МВР и Комората за приватно обезбедување се добар пример за меѓуинституционално партнерство

Министерот за внатрешни работи Оливер Спасовски се обрати на Саемот за безбедност што се одржа во трговскиот центар Сити мол, а во рамки на традиционалната кампања – одбележување на Денови на приватното обезбедување, во организација на Комората на Република Северна Македонија за приватно обезбедување.
Спасовски во своето обраќање истакна дека сегментот на приватното обезбедување, како ретко која стопанска дејност во изминативе години бележи впечатлив напредок во секој поглед од неговото работење: организациски, технички, професионален, стручен и нормативен аспект.
„Препознавајќи го тој важен сегмент во делот на безбедноста, Министерството за внатрешни работи и Комората на Република Северна Македонија за приватно обезбедување, уште во 2018 година, поаѓајќи од заедничкиот интерес за продлабочување на партнерскиот однос во унапредување на приватната и јавна безбедност, потпишавме Меморандум за соработка. Овој Меморандум претставува правна рамка што дополнително отвори простор да се размислува и делува околу продлабочување на меѓусебната соработка, користејќи ги сите отворени можности и перспективи во домените на нашата и ваша надлежност – јавната и приватната безбедност”, посочи Спасовски.
Според него крајната цел се повисоки ефикасни нивоа на безбедност во интерес на граѓаните во државата.
„Дека сме добар пример за меѓуинституционално партнерство говори високото ниво на соработка и комуникација, но и постигнатиот степен на развој на дејноста на приватното обезбедување, со конкретни резултати во секојдневното функционирање. И, што е исто така особено важно, очигледните потенцијали што ги нуди и содржи вашата дејност, во контекст на еден поширок јавен интерес”, рече Спасовски.
„За нас како Министерството за внатрешни работи од голема важност и од непосреден интерес се постојаната стручна и професионална надградба на дејноста приватно обезбедување, исто како што е нужен нашиот постојан контакт, размена на искуства и стручна соработка”, нагласи министерот Спасовски.
Спасовски изрази задоволство што и годинашното одбележување на Деновите на приватното обезбедување содржински тежнее кон понатамошно подигање на нивото на квалитет, преку презентација на тенденции кои одат во правец на континуирано унапредување на приватното обезбедување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.