Македонија
Спасовски на Форум на министри во Подгорица
„Регионот на учесничките на МАРРИ е регион чувствителен по многу прашања – Западен Балкан, дел од Европа, но сè уште не и дел од Европската Унија. Регионалната иницијатива за миграција, азил и бегалци (МАРРИ) со својата постојана канцеларија во Скопје постои и фунционира повеќе од 17 години. Години во кои покажавме дека можеме да комуницираме меѓу нас, дека можеме да соработуваме и преку конструктивна дискусија да носиме одлуки корисни за регионот“.
Ова меѓу другото го истакна министерот Оливер Спасовски во своето прво обраќање на денешниот МАРРИ Форум на министрите за внатрешни работи на земјите членки на оваа Регионална иницијатива за миграција, азил и бегалци што се одржа во Подгорица, Црна Гора.
Потенцирајќи дека МАРРИ бездруго е докажана успешна регионална приказна, успешен регионален проект кој успеа да опстои и покрај многуте премрежја, вклучително и актуелните со пандемијата од Ковид-19, министерот Спасовски нагласи дека Република Северна Македонија останува посветена на оваа иницијатива.
„Нашата посветеност ја темелиме врз фактот дека МАРРИ како регионален субјект и денес му е многу потребен на регионот. Релевантноста на МАРРИ и денес е многу актуелна, бидејќи како основна тема за работа ја има миграцијата која сама по себе е постојана. Не постои друг општествен процес кој има подолга историја, а примерите од последните неколку години, па и тие од периодот на пандемијата, покажаа дека овој процес не може да биде прекинат“, истакна Спасовски.
Со оглед дека Република Северна Македонија и формално го презеде претседавањето со МАРРИ иницијативата во наредниот едногодишен период, министерот Спасовски во своето повторно излагање на Форумот презентираше дел од проектите, идеите и иницијативите што се планираат како битни за време на македонското претседавање.
„Сериозно пристапивме на процесот на осмислување на приоритети на кои би сакале да се фокусираме во текот на нашето претседавање, приоритети на чие спроведување ќе работиме како претседавачи со Иницијативата и коишто претставуваат континуитет на претходните неколку циклуси на претседавања од останатите учеснички. Сметаме дека е многу важно на овој начин да се обезбеди одржливост на идеите преточени во конкретни активности, со што на нашите партнери и донатори им кажуваме дека можат да имаат доверба во МАРРИ, во регионот на Западен Балкан, а со тоа и во секоја од учесничките поединечно“, рече Спасовски.
Притоа тој нагласи дека најголем акцент ќе стави на финализирање на процесот на изготвување нова модерна МАРРИ стратегија за периодот 2021-2024 година, а во насока на демонстрирање капацитет за развивање среднорочни и долгорочни активности, компатибилни и флексибилни за адаптација на можните предизвици.
Според министерот Спасовски: „Дополнително, имајќи предвид дека во последните неколку години значително е зголемен обемот на работа на претставниците од одделите за азил, предвидовме организирање настани за претставување на најдобрите пракси од аспект на организациска поставеност на овие единици. Ќе го искористиме ова за присуство на претставници кои работат во полето на азилот во релевантни институции од земји членки на Европската Унија, со надеж дека некои од нивните искуства ќе бидат применливи и кај нас. Воедно, предвидовме серија активности посветени на продлабочување на соработката меѓу Регионалниот центар и членовите на МАРРИ Комитетот и МАРРИ координаторите, како и промоција на активностите до крајните корисници во администрациите на земјите учеснички. Понатаму, во фокус го ставаме и прашањето на соработката на нашиот регион со земјите на потекло на мигрантите кои ги користат илегалните рути за движење низ нашите територии, што е една тема која одамна се провлекува како потреба или горливо прашање на кое треба да му се најде одговор“.
Домаќинот на Форумот, министерот за внатрешни работи на Црна Гора, Сергеј Секуловиќ, во обраќањето пред присутните истакна: „Предизвиците кои се однесуваат на миграцијата, азилот и расселените лица, имајќи ја предвид глобалната безбедносна ситуација, сигурно нема да бидат помалку актуелни во времето кое доаѓа. Црна Гора е подготвена да ги вложи сите напори за да придонесе за создавање цврсти политички врски и односи помеѓу соседните држави за да може и на ова важно поле на дејствување да биде остварена целта која нè приближува до интеграциските вредности и стандарди. Во таа смисла, нашите регионални иницијативи, меѓу кои и МАРРИ, веќе подолго од деценија претставуваат прилика за јакнење на врските и заедничките вредности на патот кон ЕУ“.
Министерот Секуловиќ на крајот упати честитки до министерот Спасовски и Северна Македонија на преземањето на едногодишното претседавање со оваа иницијатива и порача: „Црна Гора секогаш ќе биде подготвена да продолжи со активниот придонес со цел афирмација на регионалната стабилност и забрзување на интегративните процеси“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Цветковски: Продолжуваме по патот што води до развој на општина Лозово, продолжуваме со многу проекти
На денешниот настан одржан во општина Лозово, во рамки на вториот круг од локалните избори кои ќе се одржат на 2 ноември, се обрати кандидатот за градоначалник од редовите на ВМРО-ДПМНЕ, Бошко Цветковски кој истакна дека ќе продолжи да работи чесно и одговорно, со визија за иднината во општина Лозово за да младите останат, а возрасните живеат достоинствено.
„Ветувам дека нема да застанам, ќе продолжам со иста енергија, со иста решителност и со уште поголема љубов кон нашето Лозово. Јас реализирам и тоа е суштината на се што не разликува, затоа да бидеме искрени разликата помеѓу нас и нив е јасна како ден, тие зборуваат јас работам, тие ветуваат јас исполнувам, додека тие ја гледаат општина како плен, јас ја гледам како дом, дом за сите нас, додека тие мислат на лична корист, јас мислам на заедничка иднина“, рече Цветковски.
Кандидатот за градоначалник на општина Лозово посочи дека се што е ветено досега е реализирано во повеќе области, како во образованието, така и во инфраструктурата, притоа истакнувајќи дека ќе продолжи по истиот пат на развој за напредок на општина Лозово.
„Нашиот збор вреди и затоа што нашиот збор е даден пред народот, а не во темни договори, секое кажано нешто сме го претвориле во дело, кога рековме дека ќе има пат го направивме, дека ќе има улици ги реализиравме, кога ветивме дека ќе има бесплатен оброк за децата од нашето училиште, бесплатна градинка, екскурзии, стипендии, канализации, инфраструктура, тоа не остана на хартија, тоа стана реалност. Затоа кога велам нашиот збор вреди тоа не е празна реченица, тоа е потврда, доказ што го гледате секој ден. Продолжуваме кон патот што води до победа, развој и достоинствен живот на сите. На 2 ноември секој од вас треба да го направи својот избор, сите заедно да гласаме за бројот 9“, вели Цветковски.
Македонија
Три групи да внимаваат поради промената во зимско време, лекарите со совети за да се избегне нарушување на ритамот
Американската академија за медицина на спиење (ААСМ) со години се залага за прекин на поместувањето на часовникот, тврдејќи дека стандардното (зимско) време е поздраво.
„Дури и промена од еден час може да предизвика значителни проблеми со спиењето и здравјето“, често истакнува ААСМ, како што објави Асошиејтед Прес (AП).
За луѓето со кардиоваскуларни проблеми, ненадејното нарушување на ритамот може да биде дополнителен стрес. д-р Филис Зи, раководител на одделот за медицина на спиење на Медицинскиот факултет Фајнберг на Универзитетот Нортвестерн во Чикаго, објаснува:
„Нарушувањето на циркадијалниот ритам, дури и привремено, може да влијае на кардиоваскуларниот систем со зголемување на крвниот притисок и воспалителните маркери кај подложни лица.“
Совет: Особено е важно хроничните пациенти да продолжат да ја земаат терапијата во новото време, но да ја следат својата состојба и да се консултираат со лекар ако почувствуваат влошување.
Постарите лица честопати природно имаат промени во ритамот на спиење. Според Фондацијата за спиење, „Постарите возрасни лица може да доживеат поизразени ефекти на поместување на часовникот поради промени поврзани со возраста во архитектурата на спиењето.“ Ова може да доведе до поголема дневна поспаност и конфузија.
Совет: Се препорачува да се одржува редовен распоред колку што е можно повеќе, изложеност на утринска светлина и лесна физичка активност во текот на денот.
Најголемиот предизвик за родителите е што децата веројатно ќе се разбудат еден час порано во новото време. д-р Крег Канапари, директор на Центарот за педијатриски сон на Универзитетот Јеил, познат по своите совети до родителите, истакнува во своите публикации за Њујорк Тајмс: „За децата, особено помладите, дури и промена од еден час може да го наруши целиот распоред. Клучот е или постепена адаптација пред промената, или строго придржување кон новиот распоред по промената, со разбирање дека првите неколку дена ќе бидат тешки.“
Совет: Ако не сте го поместиле времето за спиење на вашето дете постепено, бидете трпеливи. Користете затемнување на собата наутро и обидете се да се држите до вашиот нов распоред за оброци и дремки.
Додека нашето тело се прилагодува на новото време во текот на следните неколку дена до една недела, сите можеме да се чувствуваме малку уморни или нефокусирани. Експертите генерално советуваат: поминете време на отворено наутро за да го „ресетирате“ внатрешниот часовник, јадете лесна вечера и избегнувајте ја сината светлина на екранот најмалку еден час пред спиење.
Ноќва почнува зимското сметање на времето. Стрелките на часовникот во 3 часот по полноќ ќе се поместат еден час наназад. Со тоа, времето во 03:00 часот ќе се смета како 02:00 часот.
Македонија
МЗ: Кај клиничкиот центар „Мајка Тереза“ ниту се гради, ниту се планира да се градат станбени градби
Во врска со медиумските објави за наводна изградба на зграда на паркингот кај ЈЗУ Универзитетска клиника за радиотерапија и онкологија, Министерството за здравство ја информира јавноста дека во рамките на Универзитетскиот клинички центар „Мајка Тереза“ ниту се гради, ниту се планира да се градат станбени градби.
Сите градежни интервенции што се изведуваат во оваа зона, велат од Министерството, се исклучиво поврзани со здравствената дејност и функционалната инфраструктура на јавните здравствени установи.
„Во делот на нашите надлежности, ја уверуваме јавноста дека работењето на Клиниката се одвива непречено и пристапот за пациентите е обезбеден“, велат оттука.
Се додава и дека Министерството за здравство нема надлежност да утврдува урбанистичко-планска документација, да издава одобренија за градење или да определува сопственичко-правен статус на парцели. Овие прашања се во надлежност на органите на локалната самоуправа, пред сè Општина Центар, како и на другите институции од областа на урбанизмот и катастарот.

