Македонија
Спасовски од Прилеп: Мирна новогодишна ноќ

Преземените и реализирани градежни работи вредни околу 35 милиони денари, средства обезбедени од буџетот на МВР не само што генерално ќе ги подобрат условите за секојдневно работење на нашите колеги при Одделението за внатрешни работи Прилеп, туку истовремено се и предуслов за очекувано и натамошно подобрување на ефикасноста на полициските служби, дотолку повеќе што со извршените работи и просторно, не само инфраструктурно, се решаваат наследените проблеми преку обезбедување на нов простор за дел од службите при ОВР Прилеп“, изјави министерот за внатрешни работи Оливер Спасовски при неговата денешна работна посета на ОВР Прилеп во присуство на дел од раководството на МВР.
Спасовски оствари работна средба и со раководството на оваа организациона единица на која што стана збор за актуелни теми што ги засегаат граѓаните , по што присутните извршија увид во завршените градежни работи на објектот на ОВР Прилеп.
Безбедносната состојба на подрачјето на ОВР Прилеп од областа на криминалитетот, јавниот ред и мир и сообраќајот за 2021 година беше оценета како релативно добра и стабилна. Состојбата прикажана со статистички податоци на ниво на ОВР Прилеп во поглед на криминалитетот заклучно со ноември 2021 година, споредбено со 2020 година, бележи намалување од околу 30 проценти.
Министерот Спасовски изразувајќи задоволство од постигнатите резултати во работата на ОВР Прилеп потенцираше дека позитивните статистики дополнително мотивираат да се продолжи со активностите врз основ на однапред утврден динамички план за работа, со цел инвестирање во подобрување на општата инфраструктурна кондиција на сите оние објекти за кои што е оценето дека е неопходна реконструкција или санација, а за кои изведбата би била извршена согласно меѓународно прифатените стандарди како на ниво на градежно изведување така и на ниво на техничко-професионални стандарди.
Тој информираше дека во моментов се работи на седум објекти во разни организациони единици низ државата и тоа: ОВР Делчево, ОВР Берово, ОВР Радовиш, ОВР Свети Николе , ЕВР Карпош, ЕВР Гази Баба и објектот на Одделот за заштита на определени личности и објекти, за што од буџетот на Министерството се издвоени околу 82 милиони денари.
„Дозволете ми да потенцирам дека изминативе неколку години, преку низа конкретни, мерливи и проверливи активности, вклучително и во овој сегмент успеавме – не само да се поместиме од нулта точка, туку и преку континуираната ангажираност да докажеме дека и тоа како може со сопствени сили и со сопствени средства да се креираат и воспостават квалитетни претпоставки, како во поглед на натамошно подобрување на материјално-техничката состојба во којашто работат полициски службеници, така и во поглед на поквалитено остварување на нивните секојдневни работни обврски а во интерес на сите наши граѓани“, рече Спасовски.
Ги брифираше новинарите и за безбедносната состојба во текот на новогодишната ноќ на територијата на државата, која помина мирно, без поголеми нарушувања на јавниот ред и мир. Притоа, регистрирано е намалување на бројот на кривичните дела на територијата на цела држава, приведени се вкупно 12 лица, а регистрирани се 18 прекршоци на јавниот ред и мир, од кои најголем дел физички напади и физички пресметки. Во текот на новогодишната ноќ се случиле и седум сообраќајни незгоди, од кои најголемиот број со материјална штета, при што не се регистрирани жртви.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Стефковски приреди велигденска трпеза: Да се почитуваме како народ за да опстоиме како држава

Градоначалникот на општина Гази Баба Бобан Стефковски вчеравечер приреди велигденска трпеза по повод Воскресението христово – Велигден.
Во обраќањето пред присутните, градоначалникот Стефковски говореше за ликот и делото на Исус Христос и за тоа дека ниту една друга личност, како личноста на Исус Христос и ниту еден друг настан како настанот со воскресението не предизвикале таков интерес и не направиле таков пресврт во историјата на светот и човекот.
„И доаѓањето на Исус Христос неговото живеење и неговото заминување биле пропратени со необични појави и случувања. Кога се родил во Витлеем се појавила необична ѕвезда на небото, а додека живеел од него излегувала сила која ги лекувала. Болни исцелувал, грешни поправал, гревови простувал и никој ниту пред него, ниту по него не живеел со таква сила“, наведе Стефковски.
Дополнително тој се осврна и соживотот кој го имаат граѓаните од различни етнички заедници во општината.
„Од оваа година започнавме една нова традиција. За Бајрам се собравме на Ифрат со граѓаните од Исламска вероисповест, а денес на третиот ден од Велигден сме собрани тука на Велигденска трпеза. Само со взаемно почитување на религијата и традицијата ќе ја покажеме нашата големина пред се како индивидуи, а потоа и како народ“, истакна градоначалникот Стефковски.
На крајот од своето обраќање Стефковски им упати порака на граѓаните и порача: Мојата порака до сите наши граѓани, без разлика на етничката, верската или било каква друга припадност е да се почитуваме помеѓу себе, да си помагаме секогаш кога тоа е потребно. Во тагата да тагуваме, а во радоста да се радуваме – заклучи Стефковски.
На велигденската трпеза присуствуваа свештеници од МПЦ, пратеници во Собранието на Република Македонија, советници и голем број на граѓани.
Македонија
ВЛЕН: Определбата на Ахмети е да предизвика политичка криза и предвремени избори

Не случајно народот вели “Парите дупчат каде ниту бургијата не може!”. Со недели слушаме како ДУИ рони крокодилски солзи за истрагата во Кочани, каде според нив, неосновано се осомничени нивни поранешни функционери. Сепак, вистината е многу сурова. Ахмети наместо да се грижи за неговите поранешни министри за економија, Бектеши, Незири, Сарачини, Кучи, нему единствен фокус му е Пуцко и неговата фамилија, велат од ВЛЕН.
„За него не е важно што негови луѓе набавувале токсичен мазут во износ од 160 милиони евра и труеле цела нација. Преку послушникот на кичевскиот клан, Ислам Абази, прави се’ што може да го спаси од притвор лицето А.Ј. со кауција од 2 милиони евра. Клучното прашање е зошто, на пример Дрин Ахмети не депонира кауција за поранешните министри на неговиот вујко? Или, нивните маки и маките на нивните семејства се неважни за Ахмети?“, прашуваат од коалицијата.
Од таму прерупредуваат дека определбата на Ахмети е, како што велат, да предизвика политичка криза која би резултирала со предвремени парламентарни заедно со локалните избори.
„Нему очајно му треба “Пржинска Влада” во која преку МВР со кое би раководела опозицијата, би се направило се’ за да се уништат доказите против поранешните корумпирани кадри на ДУИ. Затоа, не сакаат само локални избори, бидејќи влегуваат во сигурен катастрофален пораз“, велат од ВЛЕН.
Македонија
(Фото) Спречени обиди за криумчарење парфеми, тутун, облека со потпис на познати модни брендови

На Меѓународен Аеродром Скопје државјанин на Обединети Арапски Емирати родум од Индија се обидел да криумчари во државата 76 парфеми. Патникот при пристигнување во државата се определил на зелен канал при што поради сомневање е селектиран на царинска контрола. При контролата во двата куфери кои ги носел со себе се пронајдени парфеми со потекло од Дубаи коишто патникот не ги пријавил, извести Царинската управа.
Во друг случај на Меѓународен Аеродром Скопје при контрола на патник кој требало да патува со лет на релација Скопје – Лондон – Лутон биле пронајдени 260 пакувања од по 50 грама тутун.
Возач на камион се обидел во државата преку граничниот премин Табановце да шверцува соларен инвертер. Во обидот е спречен од Службата за мобилен скенер која при извршената контрола утврди дека во кабината има неправилности по што е извршен и физички преглед кога е пронајден соларниот инвертер.
Царински службеници на граничниот премин Табановце во куферите на еден од патниците кои патувале со автобус кој сообраќал на релација Скопје – Белград пронајдоа 129 парчиња суплементи Zeo Medic, додаток во исхрана. Суплементите се запленети, а против патникот ќе биде поведена соодветна постапка.
Спречен обид за шверц на 3.150 ќесички маџун со додатоци, откако патник се обидел истите преку граничен премин Богородица нелагално да ги внесе во државата. Лицето кое патувало со автомобил на прашање дали има нешто да пријави за царина одговорило дека нема ништо за пријавување. Поради сомневање возилото е селектирано за детален преглед при што во багажниот простор во три патнички куфери помеѓу личните предмети, е пронајдена непријавената стока.
Мобилен царински тим на Царинска испостава Табановце при контрола на камион, заплени 463 парчиња облека со потписот на Ралф Лаурен, Диор, Бос и други модни брендови поради основано сомневање за повреда на право од интелектуална сопственост.
Патник преку граничен премин Ново село се обидел да шверцува разна стока, меѓу која ножеви, клучеви, рибарски прибор, слушалки, машинка за стругање. Во намерата е спречен од царинските службеници кои при контрола на возилото, во багажникот и помеѓу седиштата ја открија непријавената стока, соопшти Царинската управа.