Македонија
Спасовски од Спомен костурница во Куманово: Одовде најдобро се испраќаат пораките

Носителот на листа во ИЕ 2, Оливер Спасовски, од Спомен костурница во Куманово најави поддршка од Куманово и од граѓаните на ИЕ 2 на опцијата „Можеме“, како сигурна понуда за иднината на граѓаните и државата.
„Овде лежат и историјата и иднината. Овде лежи идејата за прогресивна самостојна независна држава, Македонија за сите граѓани, каква што е и ИЕ 2. Оваа изборна единица е и Македонија во мало и овде најдобро се испраќаат пораките, што значи градење Едно општество за сите на кое што работиме. И одовде велиме дека победата на 15 јули ќе биде уште една победа на Република Северна Македонија“ рече Спасовски.
Тој кажа дека граѓаните на Куманово и на ИЕ 2 ги препознаат прогресивните идеи.
„Ги остваривме националните визии, ја запишавме државата на светската карта, имаме силни гаранции за територијалниот интегритет, никој веќе не прашува кои сме. Сега останува со важни мудри и државнички одлуки да ги развиеме економијата и перспективите на младите“ рече Спасовски.
Носителот на листа, Спасовски, посочи дека граѓаните на Куманово и на ИЕ 2 го почитуваат, како што кажа, успешното справување со здравствената и економската криза, наместо водењето популистички потези што немаше да го штитат здравјето на граѓаните, што е карактеристично за опозицијата.
„Куманово препознава што нудат Мицкоски и опозицијата. Ги гледаме истите луѓе од минатото – Груевски обновен во Мицкоски. И исто е, дали е Груевски, Мицкоски, Мисајловски, Николоски, Милошоски… Наспроти сигурноста на „Можеме“ е опасноста од враќање на режимот, со мрачни сценарија, нарачани пресуди, Ало судија од тевтерчето на Горде. Кумановчани знаат што значи напад на фирми и притисоци врз бизнисите. Сите од Старо Нагоричане, преку Гази Баба, Бутел, Шуто Оризари. со Куманово, едногласни се граѓаните дека ја сакаат јасната перспектива и сигурноста наспроти опасноста“, рече Спасовски.
Носителот на листа, Спасовски, зборуваше за економските мерки што беа преземени изминатите три години, како што се покачувањето на минималната плата од 8.000 на 14.500 денари, политиките на мотивирани работници и компании, помошта за ранливите категории граѓани и рече дека тие се основата за идната програма на развој на економијата.
„600 милиони евра поддршка на претпријатијата ќе има. Отворањето на ЕУ перспективите отвораат и европски фондови во вредност од 2.5 милијарди евра. Ја зголемуваме минималната плата за 40 проценти, за 30 проценти просечната плата, утврдуваме минимална пензија, ќе вложуваме во младите луѓе преку Младинскиот додаток, Младинската гаранција и нововработените млади луѓе ќе имаат поврат на персоналниот данок на сметка на младите“, рече Спасовски.
Во врска со вложувањата во Куманово тој посочи дека се реконструирани сите регионални патишта и во следниот мандат реконструкција на култниот спортски центар Соколана и историскиот комплекс Спомен костурница каде што беше одржана вечерашната трибина со граѓаните.
Носителот на листа, Спасовски, нагласи и дека за сигурноста на секоја држава е важно да има и ред, дисциплина и правда.
„Направивме основи да се промени системот во делот на правдата. Го направивме невозможното, го донесовме Законот за јавното обвинителство на што се спротивставуваше Мицкоски и сега гледаме зошто се случувало тоа. Прашувам , уште колку обвинети ќе се појават како спонзори на ВМРО-ДПМНЕ и ќе дојдат информации дека преку тие криминални пари ја финансирале нивната партија. Мора да застанеме на патот на криминалот и корупцијата и мора да има правда за сите. Се обврзуваме на детална проверка за имотната состојба на сите судии и обвинители, ќе има темелна ревизија на 5 проценти од сите судски пресуди во последните 5 години, по случаен избор, судиите кои застаруваат предмети, ќе бидат разрешени по автоматизам“, најави Спасовски.
Тој повика на разговор на секој со секого за важноста на претстојните избори.
„Да кажеме колку е важно да се излезе и да се одлучува на овие избори, помасовно да се излезе, тие ќе бидат безбедни, како што се оди во банка или во продавница, за да добиеме ефикасни институции на системот. Да ја поддржиме коалицијата „Можеме“ и она што го правевме, имаме знаење, визија, храброст и можеме да продолжиме уште повеќе и уште подобро“ повика вечерва носителот на листа на ИЕ 2, Оливер Спасовски, вечерва од Куманово.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Забрана за движење во шумите до крајот на август, за прекршителите казна до 2.000 евра: Владата ја продолжи кризната состојба од 30 дена

На владината седница е донесена одлука за продолжување на кризната состојба во рок од 30 дена.
Со ова продолжување, како што е појаснето во владиното соопштение, се обезбедува навремена помош за сите засегнати подрачја, односно сите ресурси вклучително и човечки, технички, логистички остануваат мобилизирани, сè со цел да се справат со пожарите и заштита на населението од огнените стихии.
„Имено, поради висок ризик од шумски пожари во државата, апелираме до граѓаните да бидат внимателни и да ја почитуваат целосната забрана за движење во шумите и шумското земјиште (донесена од 01.07.2025 година и ќе трае до 31.08.2025 година), во спротивно сите оние кои не се придржуваат кон оваа одлука, која е донесена за спречување на пожари, ќе бидат казнети со парична казна од 1.500 до 2.000 евра“.
Македонија
Трговците да ги намалат цените на училишниот прибор пред почетокот на школската година, одлучи Владата

Владата на 100 седница донесе одлука и ги задолжи трговците да ги намалат цените на училишниот прибор од најмалку 10% во трговија на големо и најмалку 15% во трговија на мало, ова со цел како што велат, спречување на растот на цените на училишниот прибор пред почетокот на учебната 2025/2026 година и заштита на животниот стандард на граѓаните, како дел од кампањата „Помалку трошоци, повеќе за тебе, се грижиме“.
Со оваа одлука, како што информираат од владината служба, трговците на мало и големо кои продаваат училишен прибор, односно ранци и ташни, тетратки, блокови, колажи, моливи и пенкала (економични, пластични), дрвени и мрсни боици, пластелин, теста за моделирање, подлоги, фломастери и текст маркери, темперни, акрилни, водени бои и четки, линијари и дидактички материјали, острилки и гуми за бришење, детски ножици, футроли и етуи, лепило, шестар, дигитрони, украсна хартија, папки и картонски ташни и материјали за изработка се задолжуваат своите производи да ги продаваат по ограничена, т.е. намалена цена, односно најмалку 10% во трговијата на големо и најмалку 15% во трговијата на мало.
Одлуката се однесува на период од 15 август 2025 година до 15 септември 2025 година, а трговците се должни покрај новата намалена цена на производите да ја објават и старата цена која важела на 01.06.2025 година, која цена се зема како базична цена на која се утврдува намалувањето.
„Исто така, пред влезот во продажниот објект или на друго истакнато место во продавницата, треба да биде јасно и видливо истакнат плакат со формат од најмалку А3, кој ќе содржи натпис „Помалку трошоци, повеќе за тебе“, кој е објавен на веб страницата на Министерството за економија и труд, како и натпис: Попуст на училишен прибор, од најмалку 15%.
Македонија
Драматичен финиш: ШК Алкалоид повторно шампион, ШК Мулти есенс непоразен до второто место!

Во трилер-завршница, која ги изненади и најголемите оптимисти, ШК Алкалоид во последното седмо коло од Екипното првенство на Македонија со нерешен резултат 3 : 3 успеа да стигне до својата 27. титула, сметано од 1992 година до денес, при што тринаесетта во низа.
Ждрепката сакаше најтрофејниот шаховски колектив на Македонија токму на крајот да игра со младите играчи кои потекнуваат од школата на Алкалоид, но мечот се претвори во можност за сензација, па само сталоженоста и квалитетот на играње под висок притисок им помогна на сениорите да успеат да се вратат во игра, откако резултатот беше 3 : 1 за ШК Мулти Есенс. Изненадувањето во мечот започна со триумфот на Кирил Николовски на шестата табла, кој го казни грубиот превид на ВМ Звонко Станојоски, по што следуваше и триумфот на втората табла, каде што ВМ Лука Дршаковиќ го надигра ВМ Велимир Ивиќ. Ремито на првата табла, ВМ Александар Инѓиќ против ВМ Леон Ливајиќ, не беше изненадување, но затоа на четвртата табла ИМ Емил Ристески се намачи за да дојде до реми со Стојан Велкоски. Во финишот ИМ Филип Панчевски го совлада Михаил Јорданов на третата табла, а ИМ Тони Лазов блесна во завршницата за да го израмни резултатот во мечот со победа над Матео Ефтовски.
Тоа донесе апсолутен триумф за овие два клуба на конечната табела од Шампионатот! ШК Алкалоид е прв со 13 бода (6 победи и еден нерешен меч), а ШК Мулти Есенс е втор со 12 бода (5 победи и два нерешени меча). И двете екипи останаа непоразени на Шампионатот.
– Со години наназад друг клуб беше наш ривал во борбата за првото место, па откако беше обезбедена таа победа во 4. коло, надвладеа оптимизмот дека работата е завршена. Во меѓувреме младинците од ШК Мулти Есенс играа сѐ подобро од меч во меч и стекнаа голема самодоверба. Тие имаа сѐ што ѝ е потребно на една екипа за успех и навистина ја направија борбата за титулата драматична. Уште еднаш се покажа дека титулите и рејтингот не играат сами, туку победите ги носат играчите кои ќе останат смирени и фокусирани во текот на целата партија и нема да направат грешки. Оваа титула на ШК Алкалоид се должи само на искуството на играчите, кои подобро се снајдоа во последните минути од мечот, додека за ШК Мулти Есенс ова второ место сигурен сум дека има вредност како да се први, бидејќи лани влегоа во елитното друштво и оваа година имаа цел да изборат опстанок, а се случи сензација – изјави ВМ Драган Јаќимовиќ, капитен на ШК Алкалоид.
За шампионскиот тим на Алкалоид, покрај интернационалците ВМ Александар Инѓиќ (актуелен Европски Шампион) и ВМ Велимир Ивиќ на првите две табли, настапија уште и ИМ Филип Панчевски, ИМ Емил Ристески, ИМ Тони Лазов и „велемајсторската гарда“ составена од ВМ Трајко Недев, ВМ Звонко Станојоски и ВМ Драгољуб Јаќимовиќ.
Целосната доминација на ШК Алкалоид на овогодинешните шампионати е комплетирана, со оглед дека претходно женскиот тим на ШК Алкалоид ја освои титулата кај дамите, каде што ИМ Лела Јавакишвили и ВМ Бела Котенашвили играа заедно со ЖИМ Габриела Коскоска, ЖФМ Моника Стојковска, ЖФМ Моника Жежовска и Леа Ефтовска.
Во освојувањето на второто место кај ШК Мулти Есенс учествуваа ВМ Леон Ливајиќ и ВМ Лука Драшковиќ, заедно со Михаил Јорданов, Теодор Јовановски, Стојан Велкоски, Матео Ефтовски, Кирил Николовски и Дино Табаковски. Сите момчиња кои денес се на возраст од дваесетина години од најрана возраст ја учат шаховската игра во јуниорската шаховска школа на Алкалоид!
Следен предизвик за ШК Алкалоид ќе биде новиот настап на Европскиот клупски куп, кој е на програмата од 18 до 26 октомври во Грција.
ПР