Македонија
Спасовски-Предоју: Продолжуваме заедно за побезбедна Европа
Денеска министерот за внатрешни работи Оливер Спасовски за време на работниот престој во Букурешт, Република Романија, се сретна со својот романски колега, вицепремиерот и министер за внатрешни работи на Романија, Марјан-Каталин Предоју.
На средбата, изразувајќи благодарност за топлиот пречек, министерот Спасовски упати честитки до колегата Предоју по повод назначувањето на функцијата вицепремиер и министер за внатрешни работи на Романија. Притоа, тој изрази задоволство за можноста за соработка на прашања од заеднички интерес како за двете министерства за внатрешни работи, така и за двете пријателски земји.
Оценувајќи ја досегашната билатерална соработка меѓу двете Министерства за внатрешни работи како плодна и отворена, министерот Спасовски го изрази своето уверување дека таа ќе продолжи да се развива со зголемен интензитет и во иднина.
„Оваа одлична соработка следи како резултат на добрите односи кои постојат меѓу двете земји, потврдувајќи ги нашите заложби за зацврстување и одржување на истите, како и нашата заедничка позиција во спротивставување на актуелните безбедносни закани, одржување на мирот, стабилноста и безбедноста на нашите граѓани и држави. Клучен фактор во овој вид соработка игра и местоположбата на СЕЛЕК Центарот во Букурешт, кој претставува уникатна оперативна организација, која ја олеснува брзата размена на информации меѓу агенциите за спроведување на законот од земјите членки во делот на прекуграничен криминал, а координира и регионални операции, ставајќи ги на едно место ресурсите од 12-те земји членки, меѓу кои и Романија, за откривање и разбивање на криминални мрежи”, рече Спасовски, додавајќи дека меѓународната оперативна соработка, која е на високо професионално ниво, се остварува преку сите меѓународни и регионални канали на полициска соработка и подразбира брза, квалитетна и ефикасна размена на оперативни сознанија, односно редовно постапување по барања упатени од двете држави за различни видови на проверки во сите форми на организиран и сериозен криминал.
Како уште еден показател за одличната билатерална соработка, министерот Спасовски го посочи Договорот помеѓу Владата на Република Северна Македонија и Владата на Романија за зацврстување на соработката во областа на внатрешната контрола и спречување и борба против корупција.
„Со Договорот помеѓу Владата на Република Северна Македонија и Владата на Романија за зацврстување на соработката во областа на внатрешната контрола и спречување и борба против корупција испративме сериозна порака за сузбивање на коруптивното однесување на полициските службеници и другите вработени лица во надлежните органи, како и на организираните криминални групи кои се бават со овие незаконски активности. Во рамки на Договорот веќе се воспостави заедничка соработка помеѓу двете министерства за внатрешни работи, како што е обуката од областа на внатрешната контрола и спречување и борба против корупција во Романија, Букурешт. Истовремено, нашата соработка дополнително се зајакна со потпишувањето на Меморандумот за разбирање меѓу Министерството за внатрешни работи на Република Северна Македонија и Министерството за внатрешни работи на Романија за поддршка и соработка во областа на заеднички обуки, кој има за цел реализација на програми за размена стручен кадар и кадети, размена на искуства и податоци, изработка на заедничка програма за обука, како и спроведување заеднички обуки и проекти”, истакна министерот Спасовски.
Министерот за внатрешни работи на Романија Марјан Каталин Предоју ја истакна добрата соработка помеѓу двете Министерства за внатрешни работи, со уверување дека тие и во иднина ќе продолжат да ги поддржуваат нашите заложби по прашањата од заеднички интерес како што се борбата против илегалната миграција, тероризмот, компјутерскиот криминал и размената на обуки и искуства помеѓу полициските службеници подвлекувајќи дека во нив имаме партнер и поддржувач не само на билатерален план туку и на регионало ниво. Предоју во оваа прилика истакна дека особено го цени учеството на нашите претставници во СЕЛЕК со кои изминатиов период имавме успешна реализација на голем број заеднички истраги. Од страна на министерот Спасовски беше упатена покана за посета на МВР на Република Северна Македонија, која министерот Предоју со задоволство ја прифати.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Граѓаните во првиот круг од изборите гласаа за Македонија, во вториот круг излезете уште помасовно
На денешниот настан во општина Лозово под слоганот „Вистинскиот избор! Твојот човек! Твоето место! За твојата иднина!“, во рамки на изборната кампања за вториот круг од локалните избори кои ќе се одржат следната недела на 2 ноември, се обрати претседателот на ВМРО-ДПМНЕ, Христијан Мицкоски.
Тој се осврна и на кандидатот и актуелен градоначалник на Лозово, Бошко Цветковски посочувајќи дека е трудољубив млад човек, прекрасна личност и голем Македонец, човек којшто го сака своето родно место и човек кој се бори за проект повеќе за Лозово и неговите жители.
„Затоа, сакам јасно ад ставам до знаење дека ја има мојата лична, недвосмислена поддршка и исто така ја има поддршката на владата со која заедно со општина Лозово ќе направиме многу проекти овдека. Така што, јас сум убеден дека Бошко не само што е добар и успешен градоначалник, туку сигурен сум дека ќе биде добар и уште поуспешен градоначалник во следните четири години“, посочи Мицкоски.
Понатаму, Мицкоски истакна дека, на овие избори граѓаните јасно кажаа која политичка партија е таа којашто е нивен избор во Македонија.
„На овие избори во 59 општини ВМРО-ДПМНЕ и Коалицијата или веќе освои градоначалник, или убедливо води и во шест општини е многу блиску до првото место, односно е второпласирана. Во првиот круг освоивме 33 општини и веќе имаат градоначалници од редовите на коалицијата предводена од ВМРО-ДПМНЕ, двајца против кандидати на нашите кандидати за градоначалници веќе се откажаа, што значи 35 и од 24 очекувам, сите 24 да бидат градоначалници. Ние ниту еден човек нема да оставиме, за секое место, за секоја општина ќе се бориме, затоа што знаеме дека нашите противкандидати не нудат иднина, туку нудат враќање назад во она тешко минато, минато кога се ограбуваше и национално се понижуваше нашата Македонија. Така што, на крајот овие избори очекувам ВМРО-ДПМНЕ и Коалицијата да имаат 59 градоначалници“, рече Мицкоски.
Додаде дека волјата и недвосмислената поддршка на народот се потврди со тоа што во 58 општини ВМРО-ДПМНЕ и Коалицијата победија на советничките листи и во најголемиот дел од тие општини. Имаме, кажа Мицкоски, веќе убедливо мнозинство во советите.
Мицкоски зборуваше и за тоа дека на овие избори имаме две опции, едната е масовно да се поддржи коалицијата предводена од ВМРО-ДПМНЕ, во случајот со Лозово кандидатот и актуелен градоначалник Бошко, со кој е убеден дека многу ќе се направи за општината.
„Втората опција е опцијата која е, практично, коалиција којашто беше влада до пред година и половина, а претходно седум години ја ограбуваше Македонија, ја распродаваше и понижуваше Македонија и ги ограбуваше граѓаните. И таа опција ја нема поддршката на владата. Сакам многу јасно да ставам до знаење дека таа опција ја нема поддршката на владата и не случајно тоа го кажувам тука, затоа што овде резултатот на локалните избори, за жал беше со поддршка за кандидатот за градоначалник којшто доаѓа од таа коалиција на СДСМ и ДУИ која седум години ја ограбуваше и национално понижуваше Македонија. Таа опција ја нема нашата поддршка и ве молам да не паѓаме на лагите на тој кандидат. Тој кандидат доаѓа овде за избори и кога ќе биде поразен повторно ќе го нема и ќе се појави за следните избори. Да гласаме за човек којшто цело време е овде со вас во Лозово“, повика Мицкоски.
Македонија
Масакрот на кучиња во Кичево не бил пријавен во МВР, полицијата постапува по допрен глас
Министерството за внатрешни работи постапува по допрен глас, по извештаите за убиства на повеќе од 40 кучиња во Кичево пред два дена, и информациите на здруженијата за заштита на животните „Анима Мунди“ и кичевското „Грифон“. До овој момент, во ОВР Кичево не е добиена пријава за случајот, информира портпаролот на СВР Охрид, Стефан Димоски.
„По допрен глас, полициски службеници преземаат мерки за утврдување на фактичка состојба, извршени се обиколки и преглед на посочените места при што, не се забележани траги или предмети кои упатуваат на таков настан“, велат од полицијата за „Макфакс“.
ОВР Кичево дополително ќе преземе и други оперативни мерки и ќе изврши дополнителни разговори со ветеринарни служби и со други лица со цел, добивање на информации. Доколку се добијат потврдни информации, по консултација со јавен обвинител, ќе се преземаат натамошни мерки.
„Анима мунди“ побара одговори од градоначалникот Фатмир Дехари
Активистите од Здружението за заштита на животните „Анима мунди“ претходно повикаа на истрага и одговори. Оттука велат дека телата биле пронајдени на различни локации низ градот, меѓу кои и во близина на основното училиште „Санде Штерјоски“.
Од здруженијата нагласуваат дека животните биле убиени со супстанции што можат да усмртат и човек и дека дел од нив имале траги од огнено оружје.
„Фатмир Дехари, прашуваме јавно: дали е нормално во вашиот град да се убиваат животни со екстремно разорни отрови што за помалку од пет минути можат да усмртат дете? Дали е нормално некој вооружен да шета низ градот и да стрела по животни додека граѓаните спијат? Пријавивте ли во полиција? Како за половина час беа собрани и фрлени 40 трупа од страна на „Кичевски Комуналец“ – без полиција, без увид, без истрага, иако на дел од телата има траги од огнено оружје? И каде се, зошто ги нема на депонија?“, прашуваат.
„Анима мунди“ повика на јавна одговорност од градоначалникот и раководството на општината, како и инспекциските служби на терен. Дехари досега не се произнесе во однос на овие прашања.
„Невиден хорор, кој помина плачеше“
Порталот „Сакам да кажам“ претходно објави сведоштво на граѓани кои им рекле дека вработени во Комуналното претпријатие биле повикани од дома за да ги отстранат пцовисаните кучиња откако на социјалните мрежи излегле снимки, бидејќи беше неработен ден и претпријатието не работеше.
„Невиден хорор, умрени кучиња насекаде и на патот и во школскиот двор. Кој помина плачеше“, изјавил сведок.
Кичево со години има проблем со прекубројност на бездомни животни. Општината за третман на уличните кучиња од буџетот годишно издвојува околу 20.000 евра.
Македонија
Цветковски: Продолжуваме по патот што води до развој на општина Лозово, продолжуваме со многу проекти
На денешниот настан одржан во општина Лозово, во рамки на вториот круг од локалните избори кои ќе се одржат на 2 ноември, се обрати кандидатот за градоначалник од редовите на ВМРО-ДПМНЕ, Бошко Цветковски кој истакна дека ќе продолжи да работи чесно и одговорно, со визија за иднината во општина Лозово за да младите останат, а возрасните живеат достоинствено.
„Ветувам дека нема да застанам, ќе продолжам со иста енергија, со иста решителност и со уште поголема љубов кон нашето Лозово. Јас реализирам и тоа е суштината на се што не разликува, затоа да бидеме искрени разликата помеѓу нас и нив е јасна како ден, тие зборуваат јас работам, тие ветуваат јас исполнувам, додека тие ја гледаат општина како плен, јас ја гледам како дом, дом за сите нас, додека тие мислат на лична корист, јас мислам на заедничка иднина“, рече Цветковски.
Кандидатот за градоначалник на општина Лозово посочи дека се што е ветено досега е реализирано во повеќе области, како во образованието, така и во инфраструктурата, притоа истакнувајќи дека ќе продолжи по истиот пат на развој за напредок на општина Лозово.
„Нашиот збор вреди и затоа што нашиот збор е даден пред народот, а не во темни договори, секое кажано нешто сме го претвориле во дело, кога рековме дека ќе има пат го направивме, дека ќе има улици ги реализиравме, кога ветивме дека ќе има бесплатен оброк за децата од нашето училиште, бесплатна градинка, екскурзии, стипендии, канализации, инфраструктура, тоа не остана на хартија, тоа стана реалност. Затоа кога велам нашиот збор вреди тоа не е празна реченица, тоа е потврда, доказ што го гледате секој ден. Продолжуваме кон патот што води до победа, развој и достоинствен живот на сите. На 2 ноември секој од вас треба да го направи својот избор, сите заедно да гласаме за бројот 9“, вели Цветковски.

