Македонија
Спасовски: Преку соработка на полицијата и приватното обезбедување до унапредена јавна безбедност

Министерот за внатрешни работи, Оливер Спасовски, присуствуваше и се обрати на научно-стручна дебата на тема „Јавната и приватна безбедност – преку координација и соработка до заедничка превенција на безбедносните ризици и закани“ во организација на Институтот за безбедност, одбрана и мир при Филозофскиот Факултет во Скопје, а во присуство на професори и студенти, како и припадници на секторот за приватно обезбедување.
Во рамките на дебатата е и промоцијата на книгата „Јавната и приватна безбедност – координација и соработка“, која е резултат на истражувачката студија „Јавната и приватна безбедност – координација и соработка“ и содржи резултати од истражувачкиот проект што го поддржа Комората на Република Северна Македонија за приватно обезбедување, а го реализира тим од Филозофскиот факултет во Скопје во состав: проф. д-р Оливер Бакрески, проф. д-р Марјан Ѓуровски и м-р Лета Барџиева-Миовска, воедно и автори на книгата, а голема важност има и ангажманот на МВР, односно на м-р Сашо Тасевски, особено при спроведувањето на истражувањето во МВР.
„Јавната безбедност претставува дел од безбедноста, односно оној, така да кажам, најконкретен облик на безбедноста насочен кон заедница и кон нејзините граѓани, притоа во потполност регулирана со позитивното право на државата, така што граѓаните имаат увид и влијание во работата на субјектите на јавната безбедност, а тоа е примарно за полицијата“, истакна министерот Спасовски во своето обраќање, при што нагласи дека има простор за кооперативност и унапредување на мотивираната соработка и активности и кај МВР и кај Комората за приватно обезбедување, но и кај академската заедница од областа на безбедноста.
„МВР, препознавајќи ја неоспорната потреба од соработка помеѓу полицијата и приватното обезбедување како дејност која технички, организационо, стручно, професионално направи драстични позитивни надградби во изминатата деценија, уште во 2018 година тој факт и содржински го реализира преку потпишувањето на меморандумот за соработка, за партнерство со Комората на приватното обезбедување, а во насока на продлабочување на меѓусебната соработка и координација за заедничко надополнување во организирањето и спроведувањето на превентивни мерки и програми, во интерес на зголемување на безбедносните стандарди и практики“, потенцира министерот Спасовски.
Министерот Спасовски истакна дека студијата ги нотира општите трендови во доменот на координацијата и соработката помеѓу полицијата и приватната безбедност, кои се однесуваат на зголемување на бројот и опсегот на партнерски активности; динамизирање на размената на информации; поголем степен на обезбедување приватни безбедносни услуги за традиционални функции на спроведување на законот; пораст на искористување на ресурсите и институционализација на партнерствата.
„Практично, овој труд јасно сугерира дека услугите на државниот и на приватниот сектор може да се комбинираат со цел да се намали криминалот, а да се зголеми безбедноста. Конечно, примерите со состојбите за време на пандемијата на Ковид-19 дополнително ја аргументираа потребата од активен ангажман, соработка и координација на сите безбедносни фактори како императив сам по себе, особено во поглед на квалитетен прв одговор и поставување на силите врз основа на претходни искуства со слични сценарија“, истакна на крајот министерот Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Власта системски го отстранува албанскиот јазик од јавната сфера, велат од ДУИ

Уставниот суд е во завршна фаза на подготовки за укинување на Законот за употреба на јазиците, истакнуваат од ДУИ.
Од оваа партија како што велат изразуваат загриженост кон последните трендови со кои Власта, преку серија институционални чекори, системски го отстранува албанскиот јазик од јавната сфера.
Паралелно, според ДУИ, Инспекторатот за примена на законот е фактички блокиран, одземена му е автономијата, инспекторите шест месеци не земаат плата, и немаат основни услови за работа, вклучително и пристап до службени возила.
„Самиот директор, поставен од Владата, јавно призна дека возилата се користат за негови лични цели, додека институцијата не функционира.
Скандалот е продлабочен од страна на Министерот за политички систем, кој вчера изјави дека ќе го смени директорот на Инспекторатот не поради неработење, туку за да му го покаже местото.
Оваа изјава е директна демонстрација на институционален притисок и понижување врз службената употреба на албанскиот јазик“.
Ги повикуваат сите албански општествени фактори, да се спротивстават на овие системски закани врз Албанскиот јазик.
„Сите албански општествени фактори, вклучувајќи ги и остатоците од ВЛЕН кои останаа дел од Владата, да преземат одговорност кон и јасно да се спротивстават на овие системски закани врз Албанскиот јазик.
Албанскиот јазик не е политичка привилегија , тој е уставна категорија и дел од темелите на Охридскиот договор“.
Македонија
Ниту повредените, ниту семејствата на починатите не се сами, Кочани е наш приоритет, велат од Владата

Трагедијата во Кочани во која животот во загубија 62 млади лица е од невидени размери, велат од Владата и додаваат дека нивна обврска покрај целосна истрага и расветлување на случајот, носење на сите инволвирани лица пред правдата, е и обезбедување соодветна здравствена заштита и медицинска помош на сите повредени и нивни семејства.
„До сега како Влада обезбедивме 30 милиони денари за транспортот и сместувањето на придружбата односно за членовите на семејствата на повредените пациенти.
Но, нашата грижа не завршува тука, бидејќи Кочани е наш приоритет и никој не смее да биде заборавен.
Дополнително отворивме телефонска линија која е во директна комуникација со претседателот на Владата. Повредените и нивните семејства можат да се јават на телефонскиот број 070/355-526 за да ги искажат своите барања, конкретни предлози и потреби кои ги имаат.
Понатаму, на владина седница ќе донесеме одлука со која одморалиштето Пониква кое располага со 27 соби и 56 легла се пренамени во центар за рехабилитација, во кој медицински кадар ќе може да работи како на психофизичката состојба така и на пружањето на медицинска нега за брзо закрепување на повредените граѓани“.
Ова, како што нагласуваат во официјалното соопштение е заедничка борба, и додаваат дека ниту повредените, ниту семејствата на починатите млади лица не се сами.
„Како Влада ќе направиме се што е во наша надлежност да помогнеме и да се обидеме да ја намалиме болката“.
Македонија
Грантови до 10.000 евра за млади и ранливи групи преку мерките од Оперативниот план, најавува Владата

Од Владата најавуваат дека грижата за младите продолжува преку сеопфатна стратегија и оперативен план од 40 милиони евра кој ќе опфати над 16.000 граѓани.
„Се објави јавниот повик од Оперативниот план за вработување за 2025 година, кој се однесува на две нови мерки наменети за невработени лица кои сакаат да започнат сопствен бизнис.
Во рамки на Оперативниот план за вработување за 2025 година, официјално се објави повикот за Мерка 1.1 и Мерката 1.2.
Преку Мерката 1.1 се доделува грант од 430.500 денари (околу 7.000 евра), за граѓаните над 29 години, а преку мерката Мерката 1.2. се доделува грант до 615.000 денари (10.000 евра) за започнување сопствена дејност за лицата до 29 години“.
Како што се појаснува во соопштението, за лица со попреченост се предвидени средства до 250.000 денари над основниот грант, со цел да се создадат еднакви услови за сите заинтересирани.
Двете мерки, според најавеното, вклучуваат и целосна поддршка преку обука за претприемништво, изработка на бизнис план и шестмесечно менторство, со цел граѓаните не само да добијат финансиска поддршка, туку и знаење и насоки за успешно водење на сопствен бизнис.
„Преку мерките и проектите владата ја потврдува посветеноста на создавање на инклузивен пазар на трудот и зајакнување на поединецот како клучен актер во економскиот развој на земјата.
Преку овие мерки се создаваат реални улови за развој, вработување, самовработување, како и развој на претприемништвото и долгорочен економски раст“.