Македонија
Спасовски: СДСМ ќе поднесе кривична пријава за кршење на Деловникот на Собранието и правата на пратениците

Парламентарното мнозинство предводено од ВМРО ДПМНЕ и ВЛЕН целосно го ставаат под контрола законодавниот дом и вршат атак врз демократијата во Собранието, нагласи пратеникот и координатор на пратеничката група на СДСМ, Оливер Спасовски, на денешната прес-конференција во Собранието.
Спасовски посочи дека на денешната Комисија за социјална политика, демографија и млади, на пратениците од опозицијата им било оневозможено да предложат измени и дополнувања на дневниот ред. Од страна на новиот претседавач на Комисијата, Имрлије Фетаи Салиу, поставена од претседателот на Собранието, Африм Гаши, било образложено дека дневниот ред бил веќе утврден од претседателот Гаши. Спасовски нагласи дека според членот 131 од Деловникот, Дневниот ред на седницата на работното тело се утврдува на почетокот на седницата, а според ставот 2 во дневниот ред може да се внесат и прашања што ги предложиле пратениците, преседателот на Собрание и Владата.Тој потенцираше, дека на овој начин претседавачот на Комисијата, Фетаи Салиу, не го почитува и грубо го прекршува Деловникот на Собранието.
„Ова покажува дека парламентарното мнозинство предводено од ВЛЕН и ВМРО ДПМНЕ сакаат целосно да го стават под контрола законоданиот дом, при тоа правата на пратениците да ги загрозат да не се остави можноста на опозицијата воопшто да даде било каков предлог и секое едно одржување на седницата да биде само по прашања коишто сака да ги постави парламентарното мнозинство. Ова е невиден атак на демократијата, невиден атак на рушење на демократичноста и демократијата во зкаонодавниот дом, таму кадешто демократијата треба да биде најразвиена затоа што Собранието по правило е храм на демократијата“, рече Спасовски.
На прес конференцијата, Спасовски порача дека пратеничката група на СДСМ, ќе преземе конкретни чекори и ќе поднесе кривична пријава против претседавачот на Комисијата Имрлије Фетаи Салиу заради грубо кршење на деловникот и грубо кршење на правата на пратениците. Исто така, пратеничката група на СДСМ ќе поднесе и иницијатива до Уставниот суд со којашто ќе бара да се утврди прекршувањето на правата на пратениците на кои што им беше оневозможено согласно Деловникот да постават или да предложат измена и дополнување на Дневниот ред. Инаку, ова е уште еден обид на власта да не го прифати барањето на СДСМ за расправа за Законот за бранители.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јахоски оди во притвор, Кривичен ја преиначи првичната одлука

Кривичниот совет при Основниот кривичен суд Скопје, постапувајќи по жалба на Основно јавно обвинителство за гонење организиран криминал и корупција, изјавена против решение на судија на претходна постапка против А.Ј., а поврзано со истрагата за набавка на мазут во ТЕЦ Неготино, по одржана јавна седница како и ценење на наводите во жалбата и одговорот на жалба донесе решение, со кое:
„Мерката куќен притвор, определена со решение на судија на претходна постапка се преиначува и се определува мерка притвор во траење од 30 дена заради постоење на основите од чл. 165. ст.1 т. 1 и 2 односно Опасност од бегство и Околности кои укажуваат дека истиот може да ја попречи истрагата со влијание врз сведоци.
Донесеното решение е доставно до странките во постапката и добиено е известие од надлежната полициска станица дека лицето е обезбедено и спроведено во Истражниот затвор Скопје. Против ова решение странките имаат право на жалба пред Апелациониот суд Скопје“ се вели во соопштението на Кривичниот суд.
Македонија
ДПМНЕ гласаат а не прочитале за што, дел од пензионерите нема да добијат покачување, велат од СДСМ

Според СДСМ, пратениците на ДПМНЕ не го ни прочитале законот кои денес неделовнички го поминаа.
Покачувањето на пензиите, според нив, не е во овој закон.
„Покачувањето на пензиите го изгласавме во септември, минатата година.
Со денешниот закон ДПМНЕ насилно и со кршење на Деловник и процедури ги поминаа измените со кои на еден дел од пензионерите нама да им биде зголемена пензијата за 2.500 денари, но и ги намалија критериумите за избор на директор, за да нивниот Мемов од коалициониот партнер ЗНАМ може да остане на таа функција“.
Дополнително, како што додаваат, денес ДПМНЕ направиле се за да му помогне на Африм Гаши и претседавачката со комисијата да не го стават на седница и да не го изгласаат Законот за бранители.
Како што истакнуваат во СДСМ, за сите прекршувања пратеничката која претседаваше со комисијата ќе добие кривична пријава.
„Тоа што пратениците од ЗНАМ и ДПМНЕ го кочат Законот за бранителите нека го објаснуваат на граѓаните. Се што кажаа досега, се излажаа“, се истакнува во реакцијата на оваа партија.
Македонија
Секогаш е волшебно чувството да се биде тука каде што се поставени темелите на нашиот јазик, рече Гаши при посетата на Музејот на албанската азбука во Битола

Со денешната посета на Битола, претседателот на Собранието на Република Северна Македонија, Африм Гаши, ги продолжи теренските обиколки на општините низ земјава, каде што има или се во фаза на отворање пратенички канцеларии за контакт со граѓаните.
Гаши ја почна оваа посета со средба со градоначалникот на Битола, Тони Коњановски, кој го запозна претседателот на Собрaнието со тековните предизвици и проекти за развој на Општината. На средбата беа разменети и мислења околу можностите за поблиска соработка меѓу законодавната и локалната власт, со цел да се реализираат заеднички проекти кои ќе го подобрат животниот стандард на граѓаните на Битола и да се создадат најдобри можности за развој во овој регион.
Во придружба на пратениците од Битола, Олга Лозановска, Силвана Ангелевска, Бисера Костадиновска-Стојчевска и Пеце Милевски, Гаши ги посети и пратеничките канцеларии, како негова редовна пракса за ставање во функција на канцелариите во секоја општина.
Во таа пригода, Гаши ја истакна својата заложба за зајакнување на комуникацијата со граѓаните, гарантирајќи дека нивниот глас ќе биде слушнат и нивните барања ќе бидат земени предвид во процесите на носење одлуки. Претседателот на Собранието, исто така, се заложи за унапредување и подобрување на капацитетите на овие канцеларии и ги охрабри пратениците да организираат што повеќе средби со граѓаните, со цел нивните потреби да бидат соодветно застапени во Собранието.
За време на престојот во Битола, претседателот Гаши го посети и Музејот на албанската азбука во овој град, посочувајќи дека ова место е вечно засолниште на националната историја и за страста за албанско образование.
„Секогаш е волшебно чувството да се биде тука каде што се поставени темелите на азбуката на нашиот јазик, бесмртен симбол на националното единство и гордост. Оваа пријатна посета послужи како момент на размислување за визијата, храброста и пожртвуваноста на нашите предци, кои ни овозможија да ја имаме и зачуваме азбуката на убавиот албански јазик“, рече Гаши.