Македонија
(Видео) Спасовски: Уништени 10 тони дрога во вредност од 26 милиони евра
„Денеска, во електропечката на ‘Макстил’ – Скопје, со палење беа уништени приближно 10 тони разни наркотични дроги, одземени до август 2022 година, по основ на правосилни судски одлуки донесени по завршени кривични постапки, како и врз основа на судски решениjа за нивно ништење. Станува збор за уништени повеќе од 8,2 тони марихуана, потоа околу 100 кг хероин, хашиш, кокаин, над 1.000 растенија, семки од канабис, како и 1,2 милион психотропни супстанции, што претставува најголемо уништено количество запленета дрога досега, која на црниот пазар би достигнала вкупна вредност од 26 милиони евра“, истакна министерот за внатрешни работи, Оливер Спасовски, на настанот во челичарницата на ‘Макстил’, реализиран со соработка на МВР, Државната комисија за уништување наркотични дроги, психотропни супстанции и прекурсори и Агенцијата за управување со недвижен имот, на кој, покрај раководството на МВР, присуствуваа и министерот за правда, Тупанчевски, директорот на Агенцијата за управување со одземен имот, Асани, директорката на Царинската управа, Кутирова, претседателот на Кривичниот суд, Џолев, републичкиот јавен обвинител Јовески, шефот на скопското Јавно обвинителство, Бубевски, претседателот на собраниската Комисија за одбрана и безбедност, Талевски, пратеници и полициски аташеи и гости од соседството.
Како што нагласи Спасовски, оваа досега најголема количина уништена дрога е резултат на многуте оперативни акции и континуираните активности што МВР ги спроведува во изминатите неколку години со цел спречување на нелегалната трговија со дрога и прекурсори, при што само во периодот јануари-јули 2022 како резултат на овие активности беше запленета дрога во вредност од 205,5 милиони евра, која ќе биде уништена по завршување на законски предвидените процедури, сузбиени 9 организирани криминални групи и спречени 7 меѓународни транспорти.
Претседателката на Комисијата за уништување наркотична дрога, психотропни супстанции и прекурсори, судијката Даниела Димовска, заедно со другите членови на Комисијата, постапи по 449 правосилни пресуди, од кои е попишана одземената наркотична дрога, која е предмет на ништење.
Притоа целата акција на транспорт и ништење на дрогата беше спроведена со максимална безбедност и во строго контролирана средина, а „Макстил“, со отстапување на своите капацитети, уште еднаш се потврди како компанија што активно соработува со надлежните институции и органите на власта демонстрирајќи ја својата општествена одговорност за прашања од јавен интерес, информираа од МВР.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нормализиран сообраќајот на патниот правец Охрид – Ресен
Сообраќајот на патниот правец Охрид – Ресен е нормализиран, извести АМСМ.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани –Делчево.
Македонија
Јаневска – Рокас: соработката со Европската унија е од суштинско значење за реализација на планираните образовни промени
Министерката за образование и наука Весна Јаневска денеска оствари средба со новоакредитираниот амбасадор на Делегацијата на Европската унија, Михалис Рокас.
Посакувајќи му успешен мандат, Јаневска се заблагодари на амбасадорот Рокас за континуираната поддршка на ЕУ во процесот на реформирање на националниот образовен систем.
На средбата, таа ги претстави тековните активности и планот за поквалитетно образование на сите нивоа.
„Стремежот за полноправно членство во Европската Унија продолжува да биде важен општествен стимул и значаен фактор на кохезија за македонските граѓани, кои пак, од нас како Влада очекуваат современо и модерно образование. Истрајни сме во определбата да ги реализираме промените кои ги претставивме на почетокот на нашиот мандат. Оптимизам и решителност постои, а соработката со Европската унија е од суштинско значење за остварување на зацртаната цел, рече Јаневска на средбата.
Евроамбасадорот укажа на подготвеноста на ЕУ и понатаму да биде посветен партнер на државата во градењето современ образовен систем, кој ќе образува европски граѓани.
Македонија
Сиљановска Давкова – Гутереш: Не смее да се дозволи, билатерализацијата во случајот со македонската евроинтеграција да стане камен на сопнување за проширувањето
Претседателката Гордана Сиљановска Давкова, во рамки на учеството на 79. Генерално Собрание на Обединетите Нации во Њујорк оствари средба со Генералниот секретар на Обединетите Нации, Антонио Гутереш.
На средбата претседателката ги потенцираше принципите на светската организација како основа на којашто мора да функционира меѓународниот поредок, без разлика дали се работи за мали или големи држави. Таа на својот соговорник му посочи дека во случајот со македонската евроинтеграција не смее да се дозволи билатерализацијата да стане камен на сопнување за проширувањето на Европската Унија, која е настаната како мировен процес.
Генералниот секретар на ОН, Гутереш, на средбата искажа лутина поради пречките коишто Северна Македонија ги има на патот кон Европската Унија. Порачувајќи дека е голем почитувач на македонската евроинтеграција, во разговорот тој ја потенцираше својата лична солидарност за напорите на земјата да биде дел од ЕУ.
Генералниот секретар како добар познавач на процесите на евроинтеграција и состојбата во регионот на Западен Балкан, нагласи дека македонската евроинтеграција, целосно заслужено, треба да се случи колку што е можно побрзо.