Македонија
Спасовски: Успешната имплементација на договорот за автоматизирана размена на податоци e доказ за нашата решителност да се вклопиме во безбедносниот систем на Европската Унија

Денеска, министерот за внатрешни работи, Оливер Спасовски, предводи делегација од МВР на 24. состанок на Комитетот на министрите на Конвенцијата за полициска соработка во Југоисточна Европа (КПС ЈИЕ), кој се одржува во Белград, Србија, на тема „Кон практичната примена на договорот за автоматизирана размена на податоци – мини Прум: Во исчекување на првите оперативни резултати“.
„Сметам дека соработката во рамките на Конвенцијата за полициска соработка на Југоисточна Европа и договорот за автоматизирана размена на податоци претставува додадена вредност – првенствено од практичен аспект во однос на интензивирање и воведување нов квалитет на безбедносната соработка и осигурување ефективни криминалистички истраги и менаџирање со безбедносни закани и предизвици, а дополнително – дадена во поширок контекст – е олицетворение, односно манифестирање политичка волја и подготвеност за соработка и имплементирање на веќе воспоставени европски практики“, истакна министерот Спасовски во своето обраќање на првата сесија. Притоа тој потсети на потпишувањето на мини Прум-договорот, со убеденост дека успешната имплементација и подготвеност за соработка во рамките на договорот за автоматизирана размена на податоци, кои Република Северна Македонија ги манифестира во неколку наврати, интензивно работејќи на повеќе нивоа и вложувајќи значителен обем и сопствени финансиски средства, се доказ за нашата решителност да се вклопиме во безбедносниот систем на Европската Унија како дополнителен контрибуторен фактор за забрзување на нашата европска интеграција.
„Северна Македонија во изминатиот период сериозно пристапи кон искористување на можностите што ги нуди соработката во рамките на КПС ЈИЕ. Во таа смисла и, впрочем потенцирав пред малку, дека Министерството за внатрешни работи одвои значителни финансиски средства за создавање сите технички предуслови за ефектуирање на размената на податоци. Така, во Министерството во завршна фаза е набавката и инсталацијата на нов компјутерски систем за автоматизирана идентификација на биометриски податоци (АБИС), кој вклучува отпечатоци од лица, траги од папиларни линии од место на настан и фотографии од регистрирани лица и непознати ликови. Една од клучните компоненти при неговото техничко специфицирање беше и барањето за техничка можност за поврзување во мрежата на Конвенцијата, кое е направено според техничките протоколи на прумската конвенција“, истакна министерот Спасовски дополнувајќи за системите КОДИС и ТЕСТА.
„Исто така, со поддршка на американската амбасада во Скопје и Женевскиот центар за управување со безбедносниот сектор – ДКАФ набавен е и системот за автоматизирана размена на ДНК-податоци – КОДИС, а веќе се одржа и основна обука за негово користење од страна на соодветни експерти. Од значење за поврзувањето на наведените системи е фактот дека опремата за TESTA физички се наоѓа во просториите на Министерството за внатрешни работи, но е под административна надлежност на Министерството за информатичко општество и администрација. Во тек се активности во Министерството за воспоставување контакт со надлежните инстанци на Европската Унија од аспект на обезбедување прецизни чекори за натамошните неопходни административни и технички побарувања за поврзување на двата споменати система преку TESTA“, рече министерот Спасовски на крајот од своето обраќање заблагодарувајќи му се на Секретаријатот на Конвенцијата за полициска соработка на Југоисточна Европа за досегашната поддршка и ангажман во олеснувањето на оперативната комуникација и работата на полициските служби на Југоисточна Европа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Фазлиу: Фирмата „АС Сењак“ на Ахмети е центар на бизнис-пајажина

Помина цела недела откако ја отворивме најголемата политичко-финансиска афера во поновата историја на Македонија. Една недела Али Ахмети и ДУИ се во тотален молк. Една недела се надеваат дека со криење вистината ќе исчезне, посочи Беким Фазлиу од „Вреди“.
„Мислеа дека ако поднесеме иницијатива до Антикорупциската комисија, ние ќе застанеме и ќе чекаме. Се излажаа. Досега знаевме дека фантом-фирмата на фамилијата Ахмети, „АС Сењак“, напумпана со милиони евра народни пари од тендери, служела како посредник за префрлање на акциите на Сашо Мијалков во рацете на српската Алта Банка.
Но, денес го отвораме новото поглавје од оваа афера.
Фирмата „АС Сењак“ не е само обична компанија. Таа е центар на една бизнис-пајажина, фирма-мајка која поседува удели и во други компании.
Истражувајќи ја таа пајажина, дојдовме до застрашувачко откритие. Една од фирмите во која „АС Сењак“ на фамилијата Ахмети е сопственик, земала кредит директно од Алта Банка од Белград!
На 9 Јуни 2025 година, преку компанија во која Ас Сењак е ко-сопственик, се подигнати 5.000.000 Евра кредит од Алта Банка. За истиот кредит, фирмата е обврзана да доставува редовни пријави и известувања кон Народната Банка на Србија.
Да биде кристално јасно: не зборуваме за продажбата на акциите од пред дваесетина дена. Зборуваме за претходна, директна финансиска инјекција од банката на српскиот режим во бизнис-империјата на Али Ахмети“.
Ова, додава Фазлиу, целосно ја руши тезата дека можеби се работело за некаков изолиран, еднократен бизнис-договор. Ова докажува, оценува тој, дека соработката, довербата и финансиските врски меѓу фамилијата Ахмети и банката на Вучиќ постоеле и пред оваа афера.
„Продажбата на акциите на Мијалков не била почеток, туку само продолжение или можеби круна на една веќе воспоставена, тајна соработка. Парите од Белград веќе течеле кон фирмите на Ахмети.
Ова отвора нови, уште посериозни прашања на кои Али Ахмети веќе не смее да молчи:
Али Ахмети, од кога точно датира вашата соработка со банката на режимот на Александар Вучиќ? Кога е земен овој кредит и за што се искористени тие пари?
Дали продажбата на акциите од Стопанска Банка Битола беше можеби начин да се врати овој кредит или дел од некоја поголема зделка што допрва ќе ја дознаеме?
Со што е гарантиран тој кредит? Со имот, со политичко влијание, или со ветување дека ќе ги распродавате националните интереси на Албанците?
Колку вкупно пари од српскиот режим се влезени во фирмите на вашата фамилија? Дали е ова единствениот кредит или има и други“.
Според Фазлиу, тоа не е само политичка корупција, туку финансиска зависност од центри кои отворено работат против интересите на Албанците и на нашата држава.
Додека, како што нагласува, глумат патриотизам пред камерите, зад сцената склучувале зделки и земале кредити од оние против кои наводно се борат.
„Нивниот молк повеќе не е опција. Секој ден молк е само потврда дека се фатени живи во криминал и предавство. Вистината мора да излезе на виделина во целост“.
Македонија
(Видео) Петрушевски: Филипче одработува за планот на Заев, кој на поранешен бугарски премиер предаде стик со материјали и шема за преземање на две големи фирми

Филипче одработува за планот на Заев, кој на поранешен бугарски премиер предаде стик со материјали и шема за преземање на две големи фирми, кажа на прес-конференција
„Венко Филипче цела кампања ја помина во градење позиции за планот на Заев кој треба да заврши со нови отстапки на Македонија доколку СДС добие некогаш можност да ја води државата и со преземање на две големи фирми во Македонија, од страна на фирми блиски до поранешен бугарски премиер“.
Планот на Заев, кој го спроведува Филипче, според Петрушевски, е за целосно виткање на државата, а за тоа би помогнал фактот што една од двете фирми е голема телевизија со национална фреквенција.
„Филипче дословно го тера планот на Заев, и праќа сигнали кон Бугарија дека е спремен да доработи.
Разликата е во тоа што и Филипче и Заев се прочитани, а со тоа се и во паника дека ништо нема да можат да изреализираат затоа што на овие избори ќе доживеат огромен дебакл, со што народот ќе им каже што мисли за нивните бугарски шеми“.
Македонија
Почнаа обуките на административците за модерната верзија на системот за управување со човечки ресурси

Министерството за јавна администрација денеска официјално започна со првиот циклус на обуки за користење на модернизираната верзија на Информациониот систем за управување со човечки ресурси (ИСУЧР), клучна алатка во дигиталната трансформација на јавниот сектор.
Обуките се одвиваат паралелно на две локации, a целта на обуките е да се овозможи детално запознавање на институциите со новите функционалности на системот, неговата практична примена, како и да се обезбеди унифицирано и ефикасно користење низ целиот јавен сектор.
Системот ИСУЧР, кој досега беше нефункционален и ограничено употребуван, сега е целосно обновен, функционален, технолошки унапреден и, за првпат, во целосна сопственост на државата.
Новата верзија овозможува централизирана пресметка на плати, дигитално управување со човечки ресурси, мобилност и кариерен развој во реално време, интероперабилност со други државни системи, како и директен пристап на секој вработен до сопственото електронско досие.
Со овие обуки ќе бидат опфатени сите јавни институции, со цел до крајот на 2026 година целосно да се интегрираат во ИСУЧР. Обуките се задолжителни за сите вработени задолжени за човечки ресурси и ќе бидат поддржани со постојана техничка поддршка.
Системот ќе се ажурира редовно, на секои шест месеци, според реалните потреби и технолошкиот напредок, нов стандард во јавната администрација на Република Македонија.
Министерството за јавна администрација останува посветено на создавање ефикасни, транспарентни и европски институции што работат за граѓаните.