Македонија
Спасовски: Членството на СДСМ расте, нови 200 члена во Петровец

Потпретседателот на СДСМ и премиер, Оливер Спасовски го отвори промотивниот штаб на СДСМ во Петровец, каде се поделија нови 200 членски книшки.
„Победници, социјалдемократки и социјалдемократи, пред нас е голема победа и најважна, победа која не носи во ЕУ и НАТО, победа против режимот на ВМРО-ДПМНЕ“, рече Спасовски.
Спасовски се осврна на успешните реформи во последните 2.5 години.
„Покажавме што значи да се вети и да се исполни, За само 2.5 години направивме повеќе од што ВМРО-ДПМНЕ направи на кое било поле. За само 2.5 години исполнивме 90 отсто од програмата „План за живот“, со нас државата тргна на прав пат и парите се враќаат кај граѓаните“ додаде тој.
Спасовски истакна дека со СДСМ нема делење, имаме еднакви можности за сите, не е важно кој од каква етничка или религиозна припадност доаѓа, важно е дека сите се еднакви пред законот, важно е дека сите имаат еднакви можности, тоа е доказ дека го промовиравме и имплементиравме моделот на едно општество за сите.
„Економијата ја вративме на прав пат. Платите растат, пензиите растат, имаме рекорден број на странски инвестиции, субвенционираме придонеси на компаниите кои ќе покачат плата до 6.000 денари, го имплементиравме проектот „Мој ДДВ“ и покажавме и докажавме што значи парите да се враќаат назад кај граѓаните“.
Спасовски заклучи дека гласот за СДСМ на 12 април е глас за развој, интеграции, повеќе пари и силна економија наспроти глас за враќање во минатото и изолации што ВМРО-ДПМНЕ го нуди.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Улица во Кисела Вода денес без струја

Корисниците на улицата Кумановска во општина Кисела Вода денес ќе останат без електрична енергија во периодот од 12:00 до 15:00 часот, информираат од ЕВН Македонија АД.
Прекинот е најавен поради технички зафати на дистрибутивната мрежа.
Македонија
Денес сончево и топло, од четврток промена на времето

Утрото ќе биде ведро и посвежо, а преку денот се очекува претежно сончево и топло време, со слаб до умерен ветер од јужен правец. Минималните температури ќе се движат од 6 до 14 степени, додека максималните ќе достигнат од 27 до 33.
Во Скопје ќе преовладува сончево време, со утринска температура до 12 и дневна до 33 степени, информира УХМР.
До среда ќе се задржи стабилно и топло време. Од четврток попладне следува период на променливо облачно време со локални врнежи. Во петок се очекуваат и гремежи, како и умерен до засилен југоисточен ветер.
Температурите ќе бидат во постепено опаѓање, особено за време на викендот.
Македонија
Сиљановска-Давкова во Њујорк: Време е кормилото на ОН да му го довериме на жена

Во рамки на учеството на 80. Генерално собрание на Обединетите нации во Њујорк, претседателката Гордана Сиљановска-Давкова се обрати на состанок на високо ниво по повод 30-годишнината од Четвртата светска конференција за жените.
Во своето обраќање, Сиљановска-Давкова истакна дека иако Пекиншката декларација останува темел на борбата за родова еднаквост, напредокот е нееднаков, кревок и често реверзибилен.
„Насилството врз жените останува неказнето, фемицидот ја осквернува светоста на животот, а жените сè уште се соочуваат со бариери во пристапот до ресурси, лидерство и одлучување,“ рече таа.
Претседателката посочи и на кризата во Обединетите нации, институција основана за заштита на мирот, а денес исправена пред бројни конфликти низ светот. Таа апелираше на храбро лидерство од жени, велејќи:„Ако сме сериозни во врска со мирот, време е да го довериме кормилото на ОН на жена.“
Во нејзиниот говор таа подвлече дека родовата еднаквост не е феминистичка привилегија, туку хуманистички императив, потенцирајќи дека жените се носители на исцелување, сочувство и надеж.
Учесниците на состанокот ја потврдија потребата од посветеност, конкретни политики и ресурси за реализација на визијата од Пекинг и за создавање праведни и просперитетни општества.
Пекиншката декларација, како што потсети Сиљановска-Давкова, повикува на еднакви права и пристап за сите – жени и мажи, девојчиња и момчиња – и тој повик, рече таа, останува ургентен и денес.