Македонија
Специјални очила за докторите, Итна помош воведува телемедицина

Специјални очила за докторите на Итна медицинска помош е иновацијата која Министерството за здравство ќе почне да ја применува како резултат на денес потпишаниот меморандум за соработка со Амбасадата на Израел во Република Македонија и со Фондот за иновации и технолошки развој. Министерот за здравство, Венко Филипче, најави дека специјалните очила се само дел од планот за подобрување на квалитетот на Итната медицинска служба.
„Истовремено со огласите за нови вработувања и нови возила воведуваме и иновација, а тоа се специјални очила коишто ќе овозможат комуникација на докторите коишто се на лице место со центрите, по системот на телемедицина каде што работат специјалисти во одредени области. На тој начин сметаме дека значајно ќе се подобри квалитетот на Итната медицинска служба во однос на давањето сервиси на лице место, како и начинот на транспорт до соодветната институција“, најави министерот Филипче.
Освен специјалните очила, министерот Филипче рече дека договорот со Израел ќе овозможи тренинг на докторите и на медицинските сестри кои работат во Итната помош. Ќе настојуваат искуствата од системот во Израел, за кој министерот вели дека е одлично организиран, да ги пренесат и кај нас.
Министерот потсети дека се потпишани договорите за набавка на нови возила, а се распишуваат огласи за прием на кадар, сега за 40 лица, а се подготвува и оглас за 40 вработувања само за доктори оти тие најмногу недостасуваат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: Левица и Апасиев беа против извршители, а од нив купуваат одземен имот за 3 пати пониска цена

Левица и Апасиев кои што декларативно, само за собирање на политички поени, беа против извршителите, сега, на дело, се соработници и од нив купуваат имот одземен од македонски граѓани или фирми, велат од ВМРО-ДПМНЕ преку соопштение.
„Тие се фатени живи во сомнителна зделка на деценијата, во која конфискуван имот од извршител во центарот на Скопје го купиле за три пати пониска цена од пазарната.
Само Димитар Апасиев и Левица можат да купат преку извршител одземен имот од некој граѓанин или фирма кои не можеле да го враќаат кредитот, и тоа по багателна цела.
Освен ова, уште поспорен е и ставот на Левица дека извршителот немал ништо со купопродажните преговорите, туку дека тие се договориле со банката и објектот го земале со хипотекарен кредит.
Оттука, легитимно се покренуваат дилеми и се поставуваат прашањата за евентуални договори под маса на сите засегнати страни, Левица и Апасиев, банката и извршителот. Како на пример, ако договарале со банката, како истите ја постигнале таа цена, кога во овој дел од градот, односно централното градско подрачје, цената за метар квадратен е за три пати повисока? Дали има некој скриен договор или друга услуга која не е заведена во договорот?
Додека Апасиев и Левица купуваат одземен имот за три пати пониска цена од пазарната од извршители, кои конфискуваат имоти од граѓани во финансиски потешкотии, граѓаните ја немаат таа среќа да се договорат со некоја банка ниту за приближно таква ниска цена.
За сето ова јавноста очекува и заслужува одговори, а надлежните органи треба да покренат сеопфатна истрага во која темелно ќе го истражат случајот“, се вели во партиското соопштение.
Македонија
(Видео) Приведен прилепчaнец поради видеото со пукањето од балкон, се трага по уште едно лице

Приведен е 51-годишен прилепчанец од селото Црнилиште Општина Долнени поврзан со видеото со пукањето споделено на „Фејсбук“. МВР трага и по неговиот син.
Од полицијата информираа дека во домот на 51-годишниот Џ.Ќ. во селото Црнилиште, прилепко, најдени се полуавтоматска ловна пушка, репетирачки карабин и полуавтоматски пиштол кои ги поседувал со дозвола, како и 395 куршуми различен калибар, 17 парчиња ловен патрон и еден ресивер поврзан на видеонадзор инсталиран во домот.
„Пронајдените предмети се одземени поради сомнение за предвизвикување општа опасност“, велат од МВР.
Со оглед на тоа што оружјето го поседувал со дозвола, привремено е одземено по што ќе следи постапка за одземање на дозволата.
Тој е приведен, а се преземаат мерки за пронаоѓање на неговиот син.
Македонија
Студено време со врнежи од дожд, а на повисоките места снег

Времето денес е претежно облачно и студено со врнежи од дожд, а на повисоките места од дожд и снег. На планините врнежите ќе бидат од снег. Ќе дува умерен до засилен северен ветер (наместа над 70 km/h).
Дневната температура ќе биде во интервал од 5 до 13 степени.
Во Скопје, облачно и студено со врнежи од дожд.
Попладне и во вечерните часови на повисоките делови од котлината врнежите ќе бидат од дожд и снег. Ќе дува умерен до засилен северен ветер. Дневната температура ќе достигне до 9 степени, јавува УХМР.