Македонија
Спојувањето на концесиите е легално и уште 100 пати да се бара од нив, 100 пати би го дале истиот предлог, Економија се правда дека не манипулира

Додека премиерот Димитар Ковачевски денес уверуваше дека „ако граѓаните се против, рудници не може да има“, Министерството за економија на брифинг пред новинарите детално објаснуваше зошто е правилна одлуката да се спојат двете концесии за рудникот „Иловица – Штука“, откако Управниот суд го поништи решението за одземање на една од двете концесии.
На седница во вторник Министерството за економија треба да даде детаљна информација за сите одлуки, судски и управни постапки што се водени од 2012 година до денес откако некои од министрите јавно кажаа дека биле изманипулирани од министерот за економија Крешник Бектеши кога кренале рака за спојување на концесиите.
Министерството за економија најави дека ќе постапи како што бара Владата и ќе достави информација, но во неа единствен нов документ ќе биде историјат за сите случувања околу концесиите, не од 2012 година, какво што е барањето, туку од 2005 година кога било поднесено барањето за концесија, до денес.
„Уште 100 пати да се случи, уште 100 пати ќе го дадеме истиот предлог до Влада за спојување на концесиите. Работиме согласно законите, а сите законски услови се исполнети, има барање за спојување и ние не можеме да дадеме поинаков предлог до Влада освен спојување на концесиите. Ова е трето барање за спојување што стигнува кај нас од концесионерот. Претходните две беа одбиени оти едната концесија беше одземена, но сега, по одлуката на Управниот суд, концесијата им е вратена и нема законска пречка што би го спречила спојувањето“, велат од Министерството за економија за кое спојувањето е единствен начин по кој треба да се постапи за да се избегнат дополнителни правни постапки што би можел концесионерот да ги преземе.

Министрите не се изманипулирани за спојувањето на концесиите оти сета документација им била доставена за разгледување, уверуваат од Министерството за економија
Министерството за економија не смета дека министрите се изманипулирани и дека немале доволно информации за спојувањето на концесиите оти сите документи им биле доставени и можеле да ги разгледаат. Дополнително во вторник ќе биде составен историјат во кој со датуми ќе бидат наведени сите согласности и позитивни мислења за рудниците од надлежните институции. Информацијата ќе ги содржи сите документи почнувајќи од барањето за првата концесија поднесено во 2005 година, одобрено и потпишано од тогашниот премиер Владо Бучковски, ќе ги содржи имињата на сите поранешни министри, градоначалници и директори кои дале позитивни мислења за рудниците за двете концесии заедно со потписот на експремиерот Никола Груевски, па се до одлуката на Управниот суд и спојувањето на концесиите. Со нив, од Министерството велат дека ќе бидат одговорени сите прашања и дилеми кои се појавија во по спојувањето на концесиите.
Министерството нема документ, ниту пак конкретно објаснување само за итноста со која како дополнителна точка на дневен ред на седница на Влада беше додадено спојување на концесиите. Од таму велат дека од Управниот суд не добиле конкретен рок во кој треба да постапат, но одлучиле тоа веднаш да се случи во интерес на другите обврски на Министерството.
„Имаме и други постапки на кои треба да се посветиме, сакавме оваа да ја завршиме“, велат до Министерството за економија.
Се обидоа да објаснат дека спојувањето на двете концесии е само административно и не повлекува никакви олеснувања за концесионерите освен тоа што место две барања за експлоатација на руда, со спојувањето ќе можат да поднесат едно. За нив е нејасно зошто воопшто концесиите биле нацртани така што едното земјиште, кое зафаќа значително поголема површина, сосема го заобиколува другото.
Нагласија дека со спојувањето на концесиите за четири години е скратено правото на користење што го има концесионерот, односно место до 2046, сега концесионерите ќе можат да ги користат до 2042 година.
Од Министерството велат дека и покрај сегашното спојување на концесиите, сите останати засегнати институции ќе добијат можност да не дозволат да почне со работа рудникот „Иловица-Штука“.
„Иако позитивни мислења за рудниците има во Министерството од сите засегнати институции, елаборат за влијанието врз животната средина нема. Ниту еден. Концесионерите допрва треба да достават кога ќе побараат дозвола за експлоатација на руда. Ако тогаш Министерството за животна средина не го одобри елаборатот, ние како Министерство за економија веднаш ќе ја одземе концесијата и рудник нема да има“, велат од Министерството и нагласуваат дека истото може да го направат и министерствата за внатрешни работи и за земјоделие кои се дел од постапката.
По спојувањето на концесиите, концесионерот „Еуромакс рисорсис“ има рок од четири години, односно до 2027 година да ги обезбеди сите дозволи за да почне експлоатацијата на бакар и злато од „Иловица-Штука“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова во Њујорк: Време е кормилото на ОН да му го довериме на жена

Во рамки на учеството на 80. Генерално собрание на Обединетите нации во Њујорк, претседателката Гордана Сиљановска-Давкова се обрати на состанок на високо ниво по повод 30-годишнината од Четвртата светска конференција за жените.
Во своето обраќање, Сиљановска-Давкова истакна дека иако Пекиншката декларација останува темел на борбата за родова еднаквост, напредокот е нееднаков, кревок и често реверзибилен.
„Насилството врз жените останува неказнето, фемицидот ја осквернува светоста на животот, а жените сè уште се соочуваат со бариери во пристапот до ресурси, лидерство и одлучување,“ рече таа.
Претседателката посочи и на кризата во Обединетите нации, институција основана за заштита на мирот, а денес исправена пред бројни конфликти низ светот. Таа апелираше на храбро лидерство од жени, велејќи:„Ако сме сериозни во врска со мирот, време е да го довериме кормилото на ОН на жена.“
Во нејзиниот говор таа подвлече дека родовата еднаквост не е феминистичка привилегија, туку хуманистички императив, потенцирајќи дека жените се носители на исцелување, сочувство и надеж.
Учесниците на состанокот ја потврдија потребата од посветеност, конкретни политики и ресурси за реализација на визијата од Пекинг и за создавање праведни и просперитетни општества.
Пекиншката декларација, како што потсети Сиљановска-Давкова, повикува на еднакви права и пристап за сите – жени и мажи, девојчиња и момчиња – и тој повик, рече таа, останува ургентен и денес.
Македонија
ДИК со податоци: Пет отфрлени листи за градоначалници

Според податоците добиени од Државната изборна комисија, за претстојните локални избори се потврдени вкупно 861 кандидатска листа – 303 за градоначалници и 558 за членови на советите на општините и на Град Скопје.
Во тек е постапка за отстранување на неправилности кај дел од листите во општините Куманово, Аеродром, Карпош и во Град Скопје.
Според податоците, 8 листи за градоначалници и 20 советнички листи се во постапка на дополнување и корекција по добиени забелешки од општинските изборни комисии.
Досега, се отфрлени 5 листи за градоначалници, по една во општините Бутел, Центар, Куманово, Аеродром и Град Скопје.
По завршувањето на процесот на потврдување, ќе следува ждрепка за утврдување на редоследот на кандидатите на гласачкото ливче. Ждрепката ќе се одржи на 25 септември 2025 година.
Македонија
Градоначалниците од Западен Балкан ја основаа алијансата Green mayors во Драч

Градоначалниците од 19 општини од Западен Балкан потпишаа заедничка декларација со која ја формираа Алијансата на „зелени“ градоначалници – регионална платформа за забрзување на зелената транзиција преку општинско лидерство и прекугранична соработка.
Потпишувањето се одржа во рамки на Форумот на „зелени“ градоначалници во Драч, организиран од OSF–WB (Фондација Отворено Општество – Западен Балкан). Настанот собра над 100 учесници – градоначалници, претставници на училишта, граѓански организации и експерти за енергетика.
Градоначалникот на Битола, Тони Коњановски, на панел-дискусијата истакна:
„Проектот ‘Сончеви училишта’ и слични иницијативи покажуваат како промените можат да започнат на локално ниво. Општината работи на повеќе зелени решенија, како воведување електричен јавен превоз и изолација на стари згради. Нашата цел е да ги подготвиме граѓаните за праведна и одржлива иднина.“
На конференцијата беше посочено дека Битола е меѓу водечките општини во регионот според бројот и квалитетот на реализирани проекти за енергетска ефикасност и зелени решенија.