Во текот на минатата недела царинските службеници и мобилните тимови спречија обиди за шверцување разна стока, при што е запленета компјутерска опрема наменета за рударење крипто-средства, суплементи, парфеми со потпис на познати модни брендови, ладилник за товарно возило, облека, а спречен беше и обид за нелегално внесување птици.

Во продолжение детали:

– Специјализирана компјутерска опрема наменета за рударење крипто-средства е запленета по извршена контрола на автомобил на влез во државата на граничниот премин Блаце.

– Спречен обид за шверцување 8,26 килограми (19 кутии по 60 кесички) Unicity Balance, суплементи, во вредност од 228 илјади денари, што Службата за мобилни скенери ги пронајде во кабина на камион управуван од македонски државјанин, пријавен за влез во државата на граничниот премин Табановце.

– 173 парфеми со потпис на познатите трговски марки „Том Форд“, „Версаче“, „Армани“ и други се пронајдени во шест картонски кутии сместени на горниот кревет во кабината на камион со македонски регистарски таблички, управуван од македонски државјанин, пријавен за влез во државата на граничниот премин Дојран.

– Царински службеници на влез во државата на граничен премин Дојран спречија обид за шверцување ладилник за товарно возило. Непријавениот ладилник е откриен во просторот за палети на камион со бугарски регистарски таблички, управуван од македонски државјанин.

– Разни производи, меѓу кои фрижидер, стоматолошки стол и кафемат се откриени од страна на мобилните царински тимови при контрола на стока пријавена за увозно царинење во царинската филијала во Тетово.

– Царински службеници на граничниот премин Меџитлија спречија обид за криумчарење на машина и опрема за водоводни цевки. Истите се откриени при контрола на автомобил со грчки регистарски таблички со кој управувал македонски државјанин.

– Машина за потреби во текстилна индустрија, откриена од страна на мобилните царински тимови, пронајдена на креветот во кабината на камион со македонски регистарски таблички, управуван од македонски државјанин, пријавен за влез во државата на граничниот премин Табановце, автопат.

– 160 пара облека од брендовите „Бос“ и „Левис“, но и 930 парчиња нашивни надворешни текстилни етикети, со ознака на брендот DSQ2, се пронајдени во преграда за алат и под креветот во кабината на камион управуван од албански државјанин, пријавен за излез од државата на граничниот премин Блаце.

– Службата за мобилни скенери при контрола на два камиона управувани од македонски државјани, на влез во државата на граничниот премин Табановце, откри непријавени 50 килограми боја и повеќе кутии со средства за полирање возила.

– На влез во државата на граничниот премин Табановце мобилен тим при контрола на автобус откри 26 белгиски канаринци и 4 вреќи со храна за птици. Македонски државјанин што патувал со автобусот сакал нелегално да ги внесе во државата, без соодветни дозволи и документи.

– Спречено шверцување 28 штеки цигари на граничните премини Дојран и Богородица. Притоа 10 штеки цигари без акцизни маркички се пронајдени во прегради во кабината на камион управуван од македонски државјанин, пријавен за влез во државата на граничниот премин Дојран. Другите 18 штеки цигари без акцизни маркички се пронајдени во внатрешноста на бандажот на резервно тркало на камион управуван од македонски државјанин на влез во државата на граничниот премин Богородица.