Македонија
Срамота е! Не може еден да договара, а друг да местите – СМС-порака од „Траекторија“

Во кривичниот суд во Скопје утрово продолжи судењето за случајот на СЈО со кодно име „Траекторија“, во кој меѓу обвинетите се Никола Груевски, Миле Јанакиески и Владимир Пешевски.
Предметот е во фаза на доказна постапка, а на денешното рочиште од проектор се презентраа СМС-пораките меѓу обвинетите и други лица во процесот. Обвинителката Лиле Стефанова во првиот дел од судењето презентира 103 СМС-пораки што меѓу себе си ги испраќале ексминистерот за транспорт и врски, Јанакиески, и поранешниот министер за финансии, Зоран Ставрески.
СМС-пораките датираат од крајот на 2012 и 2013 година. Заедно со нив обвинителката приложи и анализа на доставените дата-бази со СМС-пораки. Во СМС-комуникација од 20. 2. 2013 година Ставрески му пишува на Јанакиески: „Не може вака да местиш луѓе“.
Во следната СМС-порака Јанакиески му пишува на Ставрески: „Два дена го бараме планот со финалните суми. Не знам од каде ова дека те местам“. Во СМС-порака од 26. 2. 2013 година Ставрески му напишал на Јанакиески: „Не може еден да договара, а друг да местите. Срамота е“. На тоа Јанакиески враќа порака со содржина: „Никој никого не мести. Не е добро да мислиш дека некој те мести“.
Во изведените СМС-пораки може да се види како двајцата министри биле во постојана комуникација за договарање на деталите како да го реализираат планот за изградба на автопатиштата во Македонија. Во една од пораките пишува дека кинескиот амбасадор бил многу лут, дека треба да се однесе на ручек за да се смири. Во друга СМС-порака станува збор за втора понуда која пристигнала за изградба на делницата Миладиновци-Штип од кинеската компанија „Чајна интернешнл вотер електрик корпорејшн“, која го градела „Козјак“.
„Амбасадорот ги поддржува овие и мислам дека се координирани“, му напишал Јанакиески на Ставрески во 2013 година.
На минатите рочишта од ова судење беа прислушани сите телефонски разговори на македонски јазик, останаа уште неколку кои се на српски и англиски јазик.
Во предметот „Траекторија“, Груевски, Јанакиески, Пешевски и поранешниот директор за државни патишта, Љупчо Георгиевски, се обвинети дека во текот на 2012 и 2013 година презеле дејства со кои во постапката за избор на компанија за изградба на автопатите Миладиновци-Штип и Кичево-Охрид ги искористиле и пречекориле своите овластувања, со што, според СЈО, на државниот буџет му нанеле штета од најмалку 155 милиони евра и за овој износ на компанијата изведувач ѝ овозможиле да стекне имотна корист.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тимска игра на хуманост – Андријана Јовановска типуваше, а Mozzart донираше

Хуманоста е секогаш на прво место, мото по кое се води компанијата Mozzart. Една од наjпознатите и редовни хуманитарни акции е хуманитарниот тикет за викенд кој по втор пат оваа година е добитен. Овојпат типувач беше новинарката Андријана Јовановска која одлучи добивката да ја донира на семејството од Петровец чија куќа изгоре во пожар.
„Многу се израдував кога ми јавивте дека хуманитарниот тикет е добитен и дека ќе може заедно да донираме пари на едно прекрасно семејство на кое му е потребна помош. Станува збор за дедо Трајан Трпковски од с. Петровец, кој на 82 години неодамна го изгуби својот дом во пожар. Верувам дека семејството наскоро ќе ги собере потребните средства и дека ќе имаат нов, топол дом. Да не звучам клише, но фала ви и вам за можноста да типувам преку хуманитарниот тикет, па заедно да им дадеме малку надеж на оние на кои им е потребна“, изјави Андијана Јовановска новинар во CRNOBELO.com.
Куќата на семејството Трпковски изгоре во пожар пред два месеци по што е причинета голема штета. Потребна е итна санација, бидејќи во моментов во неа нема услови за живот. Донацијата од Mozzart ќе биде од исклучително значење за семејството.
„ Драго ми е што по втор пат годинава имаме добитен хуманитарен тикет. Преку ова акција до сега помош стигна на голем број адреси. Се надеваме дека со нашата донација ќе успееме да помогнеме за санација на куќата. Реализацијата на хуманитарниот тикет за викенд продолжува и натаму” , изјави Ивана Стефановска Крстевска од Mozzart.
ПР
Македонија
Финансиска полиција во Пин петрол, сомнеж за проневера на 22 милиони денари

Управата за финансиска полиција до Основното јавно обвинителство Куманово поднесе кривична пријава против управителот на фирмата Пин Петрол, против вработена во АД за поштенски сообраќај Пошта на Северна Македонија и против вработена во Јавното претпријатие за државни патишта за злоупотреба на службена положба и овластување, проневера во службата и несовесно работење во службата.
Управителот е осомничен дека не уплаќал пари на Јавното претпријатие за државни патишта за период од 01.08.2019 до 30.09.2024 година.
„Првопријавениот Д.П. во својство на управител и одговорно лице во правно лице Пин Петрол ДОО Куманово, кое врши работи од јавен интерес согласно Законот за возила на РСМ, иако бил свесен дека од страна на правниот субјект Пин Петрол ДОО Куманово не се врши редовна и перманентна уплата на парични средства по основ на надоместок за јавни патишта кон Јавното претпријатие за државни патишта согласно месечните извештаи за ставки од Регистрација според вид и подкатегорија на возила од надоместокот за Јавни патишта, ја злоупотребил својата службена положба и овластување доверена од Јавното претпријатие за државни патишта со Договор за извршување работи за наплата на надоместокот за употреба на јавните патишта (патна такса) а за кој претходно правното лице Пин Петрол ДОО Куманово има добиено овластување од Министерството за внатрешни работи на РСМ да врши технички преглед на возила, на начин што спротивно на обврските од Договорот не извршил контрола и не преземал никакви мерки и дејствија за реална уплата кон Јавното претпријатие за период од 01.08.2019 до 30.09.2024 година“, соопшти финсиската полиција.
Второпријавената Г.С.П. во својство на службено лице, во АД за поштенски сообраќај Пошта на Северна Македонија во државна сопственост – Скопје, Договорна пошта Куманово со правниот субјект ПИН ПЕТРОЛ ДОО Куманово, со намера да прибави противправна имотна корист за себе, наплатените парични средства од правни и физички лица на име надоместок за јавни патишта, ги присвоила за себе, наместо истите да ги уплати на сметката на Јавното претпријатие за државни патишта.
Третопријавената Н.С. во својство на службено лице во Јавното претпријатие за државни патишта, постапила несовесно при вршењето на своите овластувања и должности на начин што пропуштила должна контрола и надзор на разликата помеѓу приливите од станицата за технички преглед Пин Петрол Куманово по основ Патна такса и покрај тоа што на увид ги имала месечните извештаи од станицата за технички преглед каде е наведено колкав износ по горенаведениот основ е наплатен од нивна страна, со што предизвикала штета на Буџетот на Јавното претпријатие за државни патишта.
Со горенаведените дејствија, пријавените предизвикале штета на Буџетот на Јавното претпријатие за државни патишта во вкупен износ од 22.294.343,00 денари.
Македонија
ССМ на состанок во Влада: Дојдовме да им кажеме на функционерите дека треба да живеат на минималец ако не ги зголемат платите

Делегација од Сојузот на синдикати на Македонија (ССМ) точно напладне влезе на состанок со претставници од Владата. Претседателот на ССМ, Слободан Трендафилов, рече дека не знае зошто сега се состануваат, но кажа дека има пораки кои ќе им ги пренесе на владините претставници.
„Добивме повик од Владата дека денес треба да одржиме состанок. ССМ дојде денеска да ја праша Владата до кога планира работниците да чекаат зголемување плати. Иако немаме информација за што точно ќе биде состанокот, гледаме дека и колеги од други синдикати, кои за жал избегаа од камерите, ќе присуствуваат на состанокот. Дополнително, ќе им кажеме на владините функционери дека едногласно донесовме одлука на јавната седница на органите и телата на ССМ доколку не ги зголемат и минималната плата и платите на сите работници и доколку 12, 6 % не се зголемат платите во јавниот сектор, дека ќе треба да поживеат на минималец“, рече претседателот на ССМ Трендафилов и најави ново известување откога ќе заврши состанокот.
Пред точно една недела ССМ за да го искаже револтот од тоа што Владата без синдикални претставници ја зголеми минималната плата на 400 евра место на 500 какво што беше барањето на синдикатите, на јавна седница која се одржа пред Собранието, пред Стопанската комора и пред Владата изгласа платите на функционерите да се намалат на 500 евра се до новото покачување на минималната плата.