Македонија
Средба Битиќи-Дукс: Да се искористат унгарските искуства за пристапувањето кон ЕУ
Заменикот на претседателот на Владата задолжен за економски прашања, координација со економските ресори и инвестиции, Фатмир Битиќи, оствари средба со амбасадорот на Унгарија, Ласло Дукс, со кого разговараа за актуелните состојби поврзани со мерките за поддршка на економијата во услови на пандемијата на коронавирусот, економската соработка помеѓу двете земји и поддршката од Унгарија во процесот на пристапување на земјава во ЕУ.
Вицепремиерот Битиќи и амбасадорот Дукс се согласија дека економската соработка помеѓу двете земји се развива во позитивна насока, при што Унгарија од 27. место во однос на трговската размена, за само неколку години, стана 9-ти трговски партнер на Северна Македонија, а во меѓусебниот разговор изразија очекување дека овој тренд ќе продолжи и понатаму.
Битиќи нагласи дека соработката со земјите членки на ЕУ останува врвен приоритет на Владата и додаде дека се надева на поддршка од Унгарија во процесот на преговори и пристапување кон ЕУ, како и дека ќе може да се искористат унгарските искуства во процесот и при привлекување фондови за реализација на развојни проекти во нашата земја.
Вицепремиерот потенцира дека во периодот што следува ќе работи на поттикнување на соработка со сите земји во регионот на Западен Балкан, со цел во секоја земја да се креираат конзистентни и кохерентни економски политики, кои ќе придонесат за зголемување на конкурентноста на секоја од земјите, но и регионот во целина, наместо создавање конкуренција помеѓу земјите, со цел да станеме поатрактивен партнер на ЕУ.
Битиќи и Дукс разговараа и за можноста за унапредување на соработката помеѓу Северна Македонија и Унгарија за што вицепремиерот посочи дека во земјата во периодот што следува ќе се реализираат голем број крупни проекти за развој на железничката и патната инфраструктура, енергетиката, како и проекти за заштита на животната средина и управување со водни ресурси за кои постои искуство и знаење кај унгарските компании.
Амбасадорот Дукс го реафирмира ставот дека Северна Македонија може да очекува помош и поддршка од Унгарија во пристапниот процес, а со вицепремиерот Битиќи се заложија да продолжат со интензивна комуникација во насока на унапредување на меѓудржавната економска соработка и поефикасното интегрирање на нашата земја во ЕУ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Посебен режим на сообраќај во Скопје за празникот Водици
На 19.01.2026 (понеделник) Единицата за безбедност на патниот сообраќај при СВР Скопје ќе воведе посебен режим на сообраќај за одредени сообраќајници во Скопје.
Во центарот на Скопје за сообраќај ќе биде затворена ул. „Филип Втори Македонски“ на потегот од крстосницата со бул. „Гоце Делчев“ до крстосницата со ул. „11 Октомври“ во двете насоки.
Во општина Ѓорче Петров за сообраќај ќе бидат затворени сообраќајницата од црквата „Свети Петар и Павле“, бул.„Партизански Одреди“ до ул.„Ѓорче Петров“, ул.„Ѓорче Петров“ до ул.„Васил Чакаларов“, како и од црквата „Свети Пантелејмон“, ул.„Козле“, дел од ул.„Васил Чакаларов“ до Железничкиот мост на реката Вардар. Во општина Аеродром за сообраќај ќе биде затворен локалниот пат кон Горно и Долно Лисиче.
СВР Скопје апелира со сите учесници во сообраќајот да ги прочитуваат наредбите кои ќе ги даваат униформираните полициски службеници.
Македонија
Утре локални врнежи од дожд, на планините снег
Утре на пониските места ќе има слаби локални врнежи од дожд, а на повисоките места и на планините од снег. По одредени котлини ќе има појава на магла. Ќе дува слаб ветер од променлив правец. Минималната температура ќе биде во интервал од -2 до 2, а максималната ќе достигне од 2 до 6 степени, информира УХМР.
Во Скопје, променливо облачно со слаби локални врнежи од дожд и појава на магла. Минималната температура ќе се спушти до 0, а максималната ќе достигне до 5 степени.
За време на викендот на пониските места ќе има слаби локални врнежи од дожд, а на повисоките места од снег.
Во поденелник и вторник има преодно стабилизирање на времето, а од среда повторно ќе има врнежи претежно од снег. Од утре до крајот на неделата има услови за појава на магла по одредени котлини. Дневната температура ќе има тенденција на опаѓање.
Македонија
Министерството за здравство ги кани на соработка нашите лекари кои работат во странство
Министерството за здравство информира дека на веб-страницата на МЗ од денес е активиран електронски модул на кој лекарите кои моментално работат или специјализираат во странство може да изразат интерес за соработка со нашиот здравствен систем.
-Во рамки на нашите заложби за дигитализација во здравството, овој електронски модул претставува директен канал за стручна соработка со дијаспората, со цел полесно мапирање профили и експертизи кои може да придонесат во нашиот здравствен систем. Меѓусебната соработка со овие лекари е предвидено да опфати обуки, едукации, менторство, консултации или проектна поддршка, како и други стручни ангажмани. Во оваа прилика ги повикувам да се пријават нашите лекари кои работат во странски медицински центри, лекари кои се на специјализација или супспецијализација во странство, или лекари кои се ангажирани во странски академски и научно-истражувачки установи, потенцира министерот за здравство, Азир Алиу.
Пријавувањето се врши исклучиво преку електронскиот модул на веб-страницата на Министерството за здравство, по што Министерството ќе ги контактира лекарите за конкретна соработка што одговара на нивниот профил.
Во електронскиот модул насловен „Лекари од дијаспората“ предвидено е лекарите да пополнат повеќе лични и професионални податоци, детали за клучните области на експертиза, лиценци, сертификати, листа на публикации, како и сегменти на соработка за кои изразуваат интерес.

