Македонија
Средба Битиќи – Џентилони: Северна Македонија е од стратешко значење за Унијата

Заменик-претседателот на Владата задолжен за економски прашања, координација на економските ресори и инвестиции, Фатмир Битиќи, во Брисел оствари средба со европскиот комесар за економија, финансии, даноци и царина, Паоло Џентилони.
Заменик-претседателот на Владата, Битиќи, оваа средба со комесарот Џентилони во Европската комисија ја реализира во рамките на престојот во Брисел, каде што учествува на билатералниот скрининг за Поглавјето 9, „Финансиски услуги“, кој почна вчера, и за Поглавјето 28, „Заштита на потрошувачите и јавно здравје“, кој ќе почне на 1 март 2023 година.
На средбата двајцата соговорници се согласија дека Европската комисија важи за силен партнер на Северна Македонија во нејзините напори за членство во ЕУ.
На средбата Битиќи изрази голема благодарност за макрофинансиската поддршка, како и за поддршката на ЕУ поврзана со пребродување на тековната енергетска криза.
Комесарот Џентилони потенцира дека целиот Западен Балкан е од стратешко значење за Унијата и дека целиот регион е дел од планот за енергетска транзиција на Европа (RePowerEU), кој има цел диверзификација на изворите на енергија и зголемување на капацитетите од обновливи извори на енергија.
Џентилони исто така истакна дека ЕК го поздравува носењето на новиот закон за органски буџет како голем реформски чекор за Северна Македонија.
Комесарот Џентилони исто така даде и краток осврт на моментната состојба во ЕУ, каде што според последните зимски проекции во 2023, сепак, најверојатно, ќе биде избегната рецесија, како и очекувањето дека инфлацискиот притисок полека ќе се намалува.
Вицепремиерот Битиќи ја потенцира големата важност на праведната енергетска транзиција и се заблагодари за поддршката што Северна Македонија ја има во овој сегмент преку проект на Делегацијата на Европската Унија во Скопје.
Битиќи исто така се осврна на македонската економија, која трговски е најизложена кон ЕУ и која во 2022 забележа висока стапка на инфлација најмногу поради зголемените цени на енергентите, раст на БДП во рамките на проекциите од нешто под 3 % и дека за 2023 година очекувањата се реалниот раст да биде 2,9 % што е на линија со последните проекции на ММФ и Светската банка.
Вицепремиерот Битиќи информира дека Северна Македонија со помош на ЕУ, во текот на 2022, со зголемувањето на капацитетот на интерконекторот со Бугарија, конечно се ослободи од 100 % зависност при снабдувањето со гас од „Газпром“ и сега на пазарот има можност да се појавуваат и други доставувачи на гас во Северна Македонија.
Кога сме кај енергетиката, вицепремиерот информира дека поради добрата местоположба, во 2022 имавме бум на инвестиции во фотоволтаични централи, а интересот е сè поголем и на почетокот од 2023.
Вицепремиерот Битиќи истакна дека по примерот на ЕУ, каде што големите предизвици (на пример: енергетска диверзификација) се решаваат заеднички преку соработка, така и регионот на Западен Балкан треба да презема заеднички координирани мерки создавајќи меѓусебна зависност наспроти зависност од надвор, со цел побргу и полесно да може да ги пребродува кризите.
Комесарот Џентилони се согласи дека клучот е соработката и дека оваа средба се случува точно навреме преку координирани мерки да може да се работи и на редефинирање на синџирите на снабдување преку нивно доближување до земјите на ЕУ, а тоа секако е огромен потенцијал за земјите од Западен Балкан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Се’ уште гори кај Јасен, активни пожари на четири локации низ Македонија

Денес до 18 часот се регистрирани вкупно 10 пожари на отворен простор. Од нив, четири се активни и моментално се гаснат, додека шест се целосно изгаснати.
Активните пожари се лоцирани во различни делови на земјата. Еден од нив е во Националниот Парк Јасен во општина Македонски Брод, каде што гори мешана шума. Друг пожар е пријавен во село Теарце, општина Теарце, каде што се гори ниска вегетација. Во општина Сарај, во село Радуша, исто така се активни пожари кои зафаќаат сува трева и мешана шума. Четвртиот активен пожар е во општина Кичево, на потегот помеѓу селата Челопејци и Миокази, каде исто така гори мешана шума, соопшти Центарот за управување со кризи.
Надлежните служби постојано апелираат до граѓаните да ги почитуваат сите препораки и забрани за палење оган на отворен простор, со цел да се спречи ширење на пожарите и да се заштитат природните ресурси.
Македонија
Најмногу туристи ни дојдоа од Турција во јуни

Според податоците од Државниот завод за статистика, во јуни годинава во земјата биле регистрирани вкупно 126.415 туристи, од кои 20,1 отсто се домашни, а 79,9 проценти странски туристи.
Од странските туристи кои ја посетиле земјата во јуни 2025 година, најмногу дошле од Турција – вкупно 34.366 лица, следат Србија со 8.897, Германија со 8.011 и Холандија со 3.604 туристи.
Во периодот јануари – јуни 2025 година, во однос на истиот период од претходната година, вкупниот број на туристите е зголемен за 13,5%, со намалување од 2,5% кај домашните туристи и зголемување од 19,7% кај странските туристи. Вкупниот број на ноќевања во првото полугодие се зголемил за 8,5%, при што кај домашните има мало намалување од 1,1%, а кај странските зголемување од 13,3%.
Македонија
Забрана за нови вработувања, поткуп, користење државен имот за кампања – ДКСК потсетува на забраните од денот на распишувањето на изборите

Државната комисија за спречување на корупцијата (ДКСК) информира дека во периодот од распишувањето на локалните избори во 2025 година до конституирањето на советите на општините и Градот Скопје важат специфични забрани и мерки.
Нови инвестиции и вонредни исплати од буџетот не смее да почнат или се извршат, освен ако претходно се обезбедени средства во согласност со законот.
Забрането е почнување постапки за нови вработувања или престанок на работен однос во државните и во јавните институции, освен во итни случаи.
Политичките партии и кандидатите не смее да користат противправни или анонимни извори на финансирање.
Државниот имот и буџетските средства не смее да се користат за изборна кампања или финансирање политички активности.
Поткупот на избирачи и давањето или ветувањето подарок за гласање е строго забрането.
Во периодот од 20 дена пред изборната кампања до нејзиното завршување не смее да се одржуваат јавни настани поврзани со изградба или пуштање во употреба објекти со државни средства.
Министерството за финансии е задолжено да ги објавува сите буџетски исплати во изборниот период, освен редовни плати, пензии и комунални трошоци.
Јавните фондови, претпријатијата и другите субјекти со државен капитал треба да достават податоци за моторните возила до ДКСК во рок од десет дена од распишувањето на изборите.
Користењето службени простории, опрема и возила за изборни активности е забрането.
Забранети се притисокот и заплашувањето гласачи и нивните блиски лица.
ДКСК ќе ја следи законитоста на изборниот процес и ќе презема мерки при сомневање за прекршување на законите.
Во изборниот период Комисијата нема надлежност да дава мислења по барања поврзани со постапките на државните и на локалните органи.
ДКСК ги повикува медиумите, здруженијата на граѓани и јавноста да пријавуваат прекршувања на забраните предвидени во законот.