Македонија
Средба Гаши-Ќехаја: во фокусот, унапредување на економската соработка и инфраструктурното поврзување меѓу Македонија и Косово
Претседателот на Собранието на Република Северна Македонија, Африм Гаши, денеска оствари средба со амбасадорот на Република Косово во Република Северна Македонија, Флоријан Ќехаја.
Гаши оцени дека билатералните односи меѓу Република Северна Македонија и Република Косово се на високо ниво, со плодна соработка во бројни области. Тој изрази задоволство што парламентарната соработка меѓу Собранието на Република Северна Македонија и Собранието на Република Косово се карактеризира со интензивна динамика, како и уверување дека овој тренд ќе продолжи и во тековниот парламентарен состав. Осврнувајќи се на бројните билатерални средби, тој особено ја нагласи соработката меѓу пратеничките групи за соработка од двата парламента. Подвлече дека пратениците од двете земји успешно соработуваат и се поддржуваат и на мултилатерален план, во рамките на меѓународните парламентарни собранија.
Честитајќи му го изборот за претседател на Собранието на Република Северна Македонија, амбасадорот Ќехаја му посака на Гаши успех во извршувањето на оваа значајна функција и изрази очекување за продлабочување на успешната соработка. Тој изрази задоволство што Република Северна Македонија има афирмативен став за пристапувањето на Република Косово кон сите мултилатерални и регионални организации и иницијативи, како и благодарност што пратениците од Делегацијата Собранието на Република Северна Македонија во Парламентарното собрание на Советот на Европа го дадоа својот глас за поддршка на членство на Република Косово во оваа организација.
Гаши и Ќехаја се осврнаа на заедничките заложби за натамошно унапредување на економската соработка и инфраструктурното поврзување меѓу Република Северна Македонија и Република Косово, при што како приоритетно беше нагласено завршувањето на патната делница Скопје-Блаце. Соговорниците ја нагласија потребата за осовременување и подобрување на капацитетите на граничните премини, со воведување на концептот на заеднички контроли, што во дополнителна мерка ќе ја олеснат комуникацијата меѓу граѓаните од двете држави и бизнис заедницата.
На средбата стана збор за претседавањето на Република Северна Македонија со Процесот за соработка во Југоисточна Европа (ПСЈИЕ), како значаен форум за политички и дипломатски дијалог, во кој на еднаква основа се вклучени сите држави од регионот. Претседателот Гаши информираше дека во рамките на претседавањето, Собранието на Република Северна Македонија ќе биде домаќин на 11. Пленарната сесија на Парламентарното собрание на ПСЈИЕ, што ќе се одржи 18 до 20 јуни годинава.
На крајот од средбата, претседателот Африм Гаши и амбасадорот Флоријан Ќехаја разменија мислења за можните идни средби и состаноци меѓу пратениците од собранијата на Република Северна Македонија и Република Косово.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Невреме во Тетово: Поплавени улици, домови, гаражи
Силно невреме го зафати Тетово, поплавени се улици, домови, гаражи.
Невреме со силни врнежи од дожд, град и грмотевици попладнево ја зафати Општина Тетово и околината.
„Врнежите предизвикаа поплавување на дел од улиците, посебно кај касарната на влезот на Тетово и на неколку куќи во Мала Речица-Општина Тетово“, информира вечерва Регионалниот центар за управување со кризи (РЦУК) Тетово.
За невремето известени се и ТППЕ-Тетово, ЈКП-Тетово и одговорни лица во Општина Тетово.
Македонија
Митева: Состојбата во односите со Бугарија е последица на погрешните политики на СДС
„Ситуацијата не е настаната од вчера за денес. Не зборуваме ние за состојба која била совршена до вчера, а од денес не е совршена. Зборуваме за причинско последични состојби и дека состојбата во која сме дојдени е резултат на погрешно преземани политики на СДС”, истакна портпаролката, пратеничка и членка на ИК на ВМРО-ДПМНЕ Марија Митева.
Митева продолжи и додаде:
„Во делот на тоа што се случува помеѓу Бугарија и Македонија е состојба која ја предизвика СДС со погрешните политики”, вели Митева Митева истакна дека состојбите кои ги креира СДС се тотално погрешни.
„Состојбите кои ги креира СДС од позиција на опозиција се тотално погрешни и користи политика за дневно политички поени без никаква суштина”, кажа Митева.
Митева истакна дека за разлика од СДС, ВМРО-ДПМНЕ е многу посветена.
„За разлика од СДС, ВМРО-ДПМНЕ е многу посветено и ќе ја оправда довербата која на 8-ми мај ја доби од граѓаните”, заклучи Митева.
Македонија
Николоски: Македонија не се откажува од идејата за квалитетно железничко поврзување со Бугарија
Влегуваме во силен инвестициски циклус во изградба и модернизација на патната и железничката мрежа во Македонија преку која ќе изградиме квалитетни транспортни мрежи во регионот и ќе допринесеме за побрза интеграција со Европската Унија, е ставот на заменик претседателот на Владата и министер за транспорт Александар Николоски кој денеска го пренесе на средби со министри за транспорт од земји на Европската Унија, средби со колегите министри од земјите на Западен Балкан како и со претставници од различни институции на Унијата во рамки на дводневниот состанок на министри за транспорт на ЕУ што се оддржува во Унгарија.
Министерот Николоски ја потенцира важноста на поддршка на земјите од Европската Унија за спроведување на овие проекти и како што нагласи, нивната реализација ќе значи економски развој и подобра комуникација за сите земји од регионот.
Во одвоени средби со министерот за градежништво и инвестиции на Унгарија Јанош Лазар, со заменик претседателката на Владата и министерка за инфраструктура на Албанија, Белинда Балоку како и претседателот на Заедницата на европски железници Алберто Мацола, информираше дека Македонија ги засилува инвестициите во изградба и модернизација на европските транспортни коридори 8 и 10, поврзувајќи ја оската Исток-Запад, како и брзо поврзување со југ со Атина и на север со земјите од Централна Европа.
Тој ги потенцираше силните заложби на македонската влада за изградба на модерни автопати на западниот дел на коридор 8 кои треба да обезбедат квалитетно регионално поврзување, притоа нагласувајќи дека до крај на оваа година источниот дел од овој коридор ќе биде завршен.
Во однос на железничкото поврзување приоритет е изградба на двоколосечна брза пруга на Коридор 10, проект кој ќе даде дополнителна вредност на целокупната економија во регионот. Во однос на пругата на коридор 8, тој нагласи дека Македонија не се откажува од идејата за квалитетно железничко поврзување со Бугарија.
Изградбата на брза пруга на Коридор 10 како и квалитетно патно и железничко поврзување со Албанија и Бугарија се проекти кои ќе донесат големи придобивки за сите земји од регионот и ќе овозможат сигурен и брз транспорт на производи и патници. Затоа мора заеднички да настапиме со добри развојни програми и планови и да побараме силна поддршка од нашите партнери од Европа, истакна министерот за транспорт Александар Николоски.
Тој исто така информираше дека Македонија започна и со модернизација на неколку гранични премини како дел од проектот за олеснување на трговијата и транспортот меѓу земјите од Западен Блакан.
Состанокот на министри на земјите од Европската унија е одлична можност да ги презентираме нашите планови и активности за развој и модернизација на инфраструктурата во Македонија и да дадеме сериозен придонес за регионалниот развој и интеграцијата на цел регион, посочи министерот Николоски по средбите.
На средбите тој ја истакна цврстата заложба на Владата за остварување на зацртаните цели на земјата кои се однесуваат на пристапниот процес за членство во Европската Унија.