Македонија
Средба Заев – Пајат: Потврдени придобивките од договорот од Преспа

На вториот ден од посетата на Атина, премиерот Зоран Заев заедно со вицепремиерот за економски прашања, Фатмир Битиќи, оствари средба со амбасадорот на САД во Грција, Џефри Пајат.
Амбасадорот Пајат му честита на премиерот Заев за импресивните постигнувања во изминатиот период нагласувајќи дека договорот од Преспа е најпозитивното изненадување во неговиот досегашен петгодишен мандат како амбасадор на САД во Грција.
На состанокот беше истакнато дека важноста и вредноста на договорот од Преспа е уште поголема ако се има предвид тоа што новата грчка влада и премиерот Мицотакис ги поддржаа и засилија пријателството и сојузништвото меѓу двете земји.
Премиерот Заев и амбасадорот Пајат изразија огромно задоволство што денеска Грција не само што не е пречка за напредокот туку силно и поактивно го поддржува европскиот интегративен пат на Северна Македонија.
Премиерот Заев изрази благодарност за севкупната поддршка што Северна Македонија ја добива од САД во континуитет и особено за поддршката при склучувањето на договорот од Преспа, време кога силни влијанија неуспешно се обидуваа да го спречат остварувањето на демократските стратешки евро-атлантски интеграции на земјата.
Дополнително, на средбата се разговараше за економските можности што се отворени со договорот од Преспа, а премиерот и амбасадорот ја реафирмираа поддршката за економските комори да ги зајакнат соработките и да развиваат регионални економски проекти, особено во сферата на зелената агенда, енергетиката, како и обновливите извори на енергија. Амбасадорот ги поздрави напорите на Владата на Република Северна Македонија за целосно исфрлање на јагленот како ресурс за енергија за сметка на обновливите извори на енергија.
Премиерот Заев и амбасадорот Пајат се осврнаа на важноста од членството во НАТО и можностите за заедничко обезбедување на регионалната и глобалната стабилност и безбедност, а како примери беа посочени иницијативите за чување на небото на Северна Македонија од страна на соседните земји преку „ер полисинг“, како и развојот на Криволак во регионален НАТО тренинг-центар.
Дополнително, Заев и Пајат изразија задоволство од развојот на регионалниот енергетски проект „Александруполи“, со што се отвора можноста за сигурно и безбедно снабдување со природен гас од разни доставувачи, диверзификација на изворите и пат за Северна Македонија и регионот да станат енергетски независни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре облачно време, од петок дожд и заладување

Времето утре ќе биде променливо облачно со сончеви периоди. Попладне ќе има услови за изолирана појава на краткотраен дожд и ретки грмежи. Ќе дува слаб до умерен ветер од јужен правец, информира УХМР.
Минималната температура ќе биде во интервал од 8 до 16, а максималната ќе достигне од 25 до 30 степени.
Во Скопје, променливо облачно со сончеви периоди. Ќе дува слаб до умерен ветер од јужен правец. Минималната температура ќе се спушти до 15, а максималната ќе достигне до 30 степени.
Од петок до почетокот на следната седмица под влијание на серија влажни воздушни маси времето ќе биде претежно облачно и посвежо со повремени врнежи од дожд. Наместа врнежите ќе бидат пообилни (над 20 l/m²).
Во петок ќе има локална појава на нестабилност со пороен дожд, грмежи и засилен ветер. Дневната температура значително ќе опадне (од 10 до 13 степени) во однос на денешната.
Македонија
Утре авионска дезинсекција против ларви од комарци во Скопје

Градот Скопје ги известува граѓаните дека на 25.09.2025 година (четврток), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.
Македонија
(Видео) Велјановски: Секогаш кога ДУИ губи, прибегнуваат кон потпалување на меѓуетничките односи

Секогаш кога ДУИ губи, секогаш кога граѓаните ќе ги прочитаат нивните вистински коруптивни намери, тие прибегнуваат кон потпалување на меѓуетничките односи и загрозување на соживотот, кажа на прес-конференција Александар Велјановски, пратеник на ВМРО-ДПМНЕ.
ДУИ, вели тој, нема аргументи и политики, единствена политика им е деструктивноста и уништувањето на соживотот на граѓаните.
ВМРО-ДПМНЕ, како што рече, најостро ја осудува срамната и опасна изјава на поранешниот министер за економија Крешник Бектеши, дадена при промоција на кандидатот на ДУИ за градоначалник на Тетово, Бајрам Реџепи.
„Бектеши, без трошка одговорност, велича оружје и отворено ја оправдува војната од 2001 година, претставувајќи ја како политички капитал. Тоа е скандал од невидени размери и директен удар врз меѓуетничките односи во државата.
Ова е класичен говор на омраза кој ја враќа Македонија во најтешките времиња. Наместо за иднината, граѓаните некој повторно сака да слушаат етнички провокации и поттикнување на поделби.
Македонците се столбот на Тетово. Со векови наназад тие се дел од неговата историја, култура и идентитет. Со својот труд и љубов кон овој град го изградиле и го зачувале. На овие избори како и многу пати претходно, токму Македонците со својот единствен сплотен глас и својата волја ќе одлучат кој ќе биде татко на Тетово и каква иднина ќе има овој град.
Ја повикуваме СДС јавно и веднаш да ја осуди оваа изјава и да се огради од својот коалициски партнер. Време е да се оттргнат од зависноста кон ДУИ и да покажат барем минимална одговорност. Секое молчење е соучесништво. Но, бидејќи СДС со години е навикнат да биде нем и покорен партнер на ДУИ, секој нивен денешен молк значи само едно, дека станале партнери и во омразата“.
Апелира до сите политички партии, организации и институции, да го осудат овој чин како отворен говор на омраза. Во Македонија, како што нагласи, нема место за политичари кои својата кампања ја градат на закани, омраза и величање оружје.
„Нашата обврска е да ја изградиме Македонија како силна, праведна и европска држава. Земја на мир и стабилност, а не на поделби и закани. Народот очекува јасна позиција, а ние ќе продолжиме да ја браниме Македонија од сите што сакаат да ја претворат во заложник на криминални и етнички поделби“.