Премиерот Димитар Ковачевски во рамките на посетата на Тирана во Албанија, каде што учествуваше на самитот на лидери на Берлинскиот процес, се сретна со Антонела Басани, претседателка на Светската банка за Европа и централна Азија. На средбата, покрај премиерот Ковачевски, беше и вицепремиерот за евроинтеграции, Бојан Маричиќ.

Соговорниците разговараа за тековните проекти и планови на среден рок на Северна Македонија, како и на земјите од регионот. На средбата беа разменети мислења за политичките и економските случувања во регион, како и предизвиците од геополитичките случувања во Европа и светот и како сето тоа влијае врз глобалната економија.

На состанокот се разменија мислења за проекциите за раст на земјите од регионот во текот на оваа година, како и проекциите за глобалната економска и финансиска стабилност.

Партнерството со Светската банка и поддршката што ја добива Северна Македонија е од големо значење, Рамката за соработка е основа на граѓаните да им се овозможат подобри услови за живеење, како и за инвестиции во подобрување на конкурентноста на приватниот сектор, инвестиции во инфраструктурата, развој на човечкиот потенцијал и зајакнување на менаџирањето со јавните финансии.

Со изработка на новата рамка за партнерство на Република Северна Македонија со Светската банка значително ќе се зголеми финансиската поддршка за нашата држава и ќе биде речиси двојно повисока од досегашната.

На средбата беше оценето дека ваквиот вид соработка претставува потврда на поддршката што доаѓа од сериозен партнер, а со тоа се испраќа силна порака до меѓународните партнери и инвеститорите.

Ковачевски и Басани изразија задоволство од силното долгогодишно партнерство на Северна Македонија со Светската банка, како и за развојните резултати постигнати во годините на соработка.