Македонија
Средба на Заев – Крстиќевиќ: Добредојде за Македонија во семејството на НАТО

Премиерот Зоран Заев денеска сретна со Дамир Крстиќевиќ, потпретседател на Владата на Република Хрватска и министер за одбрана. На средбата е пренесена поддршка од хрватската Влада за интеграцијата на Република Македонија во НАТО, со најава дека Хрватска ќе го потпише протоколот за членство на нашата држава во алијансата и е изразено добредојде за нашата земја во семејството на НАТО. Исто така, најавена е и поддршка од Хрватска за земјава во јуни да добие датум за почеток на преговорите со ЕУ.
Пренесени се честитки до премиерот Заев, од хрватскиот колега премиерот Андреј Пленковиќ и од Владата во Хрватска, за постигнатиот договор во Преспа, како победнички билатерален договор, но и за регионот и за Европа. Оценето е дека договорот е пример и за меѓународната заедница, како се решаваат сложени отворени прашања. Во таа насока, поздравени се политиките на премиерот Заев, со коишто се смета дека ја понел на себе одговорноста за иднината на нашата земја која наскоро ќе го носи името Република Северна Македонија.
Претседателот на Владата, Заев, се заблагодари за големата и континуирана поддршка што ја имаме од Хрватска и најави дека нашата држава е подготвена да ги земе предвид сите позитивни искуства од Хрватска, како во делот на одбраната, така и во сите други области за коишто ќе се појави потреба со отворањето на поглавјата за преговори со ЕУ.
„Живееме историски моменти“, оцени премиерот Заев пред утрешното потпишување на Република Македонија и земјите членки на НАТО, на протоколот за пристапување на земјава во алијансата.
Претседателот на Владата, Заев, рече дека за нашата држава, како и за регионот и за земјите членки, НАТО значи стабилност, сигурност и безбедност и дека очекува тоа да ги отвори економските перспективи на државата.
„Ги правиме и сите неопходни реформи во безбедносните служби, во борбата против корупцијата, во правосудниот систем, јавната администрација и очекуваме и Европскиот совет во јуни да донесе позитивна одлука и да ги отвориме поглавјата. Овој тренд на позитивни промени фокусирани сме да повлече и бројни инвестиции, што ќе придонесе во квалитетот на живот на граѓаните, како и за задржување на младите, како моторна сила, во државата“, рече премиерот Заев.
На средбата е заеднички констатирано дека Република Македонија и Република Хрватска се две пријателски земји, без отворени билатерални прашања и дека сите актуелни позитивни процеси отвораат големи можности за развој на меѓусебната економската соработка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пожарот во Вардариште е во голема мера изгаснат, полека се враќа протокот на струјата

Пожарот во Вардариште е во голема мера изгаснат, но БППЗ Скопје во моментот се уште вршат догаснување, извести Центарот за управување со кризи.
„ЕВН дел по дел полека го враќаат протокот на струјата во нисконапонскиот дел во нормала. За краток период се очекува целосно нормализирање на состојбите“, соопшти ЦУК.
Македонија
Македонските научници и истражувачи ќе соработуваат со Заедничкиот истражувачки центар на Европската комисија

Македонија ја продлабочува соработка со Заедничкиот истражувачки центар на Европската комисија (JRC). Неодамна потпишаниот договор помеѓу Министерството за образование и наука и овој рефернтен центар за наука и истражување на ЕУ, отвора нови перспективи за македонските научници и истражувачи. Тие добиваат поголеми можности за вклучување во европските истражувачки мрежи каде ќе можат да работат на проекти од области како енергетска безбедност, одржливи материјали за изградба на одржливи згради и инфраструктура, индустрија 4.0 и паметна специјализација.
За да се запознаат научниците и истражувачите со условите и начинот на кој можат да добијат поддршка од JRC, денеска на Машинскиот факултет во Скопје беше организиран инфо ден, на кој се обратија деканот проф. д-р Златко Петревски, претседателот на Владата проф. д-р Христијан Мицкоски, министерката за образование и наука проф. д-р Весна Јаневска и заменик генерален директор на Заедничкиот истражувачки центар, Матијас Оел.
Според деканот Петревски, настанот претставува значаен чекор напред во отворањето на македонското научно-истражувачко општество кон европските мрежи на знаење и иновации. Рече дека им се овозможува на македонските истражувачи да пристапат до врвни ресурси, знаење и заеднички проекти од клучно значење за развојот на државата.
„Соработката меѓу Македонија и Заедничкиот истражувачки центар на Европската комисија влегува во нова ветувачка фаза. Мојата неодамнешна посета на институтот во Испра ја потврди нашата посветеност за продлабочување и проширување на ова партнерство и со големо задоволство тоа го официјализираме со Рамковен договор за истражување, кој ќе биде од клучна важност за спроведување на Стратегијата за паметна специјализација на државата”, рече министерката Јаневска.
Посочи дека соработката дополнително ќе ја промовира мобилноста на истражувачите, нудејќи можности за докторски и постдокторски кандидати од земјава да бидат сместени во научните директорати на Заедничкиот истражувачки центар на Европската комисија.
„Без силна наука и без силно образование, не можеме да имаме силен раст на државата, не можеме да имаме раст на економијата, а со самото тоа понатаму и во другите сектори. Добро е што ќе има размена на научници. Добро е што наши научници ќе патуваат надвор, од надвор ќе доаѓаат научници кај нас. Со тоа се прави трансфер на знаење, се прави мрежа, се публикуваат научни трудови, се помага на индустријата. Тоа е многу важно да се каже дека сите овие научни достигнувања, коишто очекуваме да бидат резултат од овој проект, да помогнат на развојот на индустријата, со тоа и на економијата“, рече премиерот Мицкоски.
Здружениот истражувачки центар е референтен центар за наука и технологија на ЕУ, кој обезбедува независна научна и техничка поддршка за креирање и спроведување на политиките на Унијата. Центарот е вклучен и во процесот на нејзино проширување, преку соработка со земјите апликанти обезбедувајќи им техничка поддршка за ефикасно имплементирање на европските закони во областа на науката и технологијата. Центарот има седум институти во пет земји на ЕУ (Белгија, Германија, Италија, Холандија и Шпанија) кои покриваат широк спектар на теми, вклучувајќи: Одржлив развој и климатски промени; Иновации и технологија; Енергетика и транспорт; Здравство и безбедност на храна; Дигитална трансформација.
Македонија
Голем пожар кај Вардариште, жителите на делови од Ародром, Ново Лисиче и Гази Баба без струја

Пожар кај Вардариште остави беа струја делови од неколку скопски општини.
Жителите преку социјалните мрежи со остри реакции и повици да се стави крај на таквата состојба.
Пишуваат дека веќе два до три часа надлежните не можат да се справат со пожарот, кој како што велат веќе се проширува.
„На 35 степени зачадени ни ја исклучија струјата. Ако отвориш прозор ќе се угушиш од чад“, реагираат засегнатите граѓани.
Регионалниот центар за управување со кризи- Скопје, известува дека Противпожарната бригада, од околу 12:00 часот во кругот на поранешната депонија Вардариште на поголема неутврдена површина, гаснат запалена сува трева и отпаден материјал.
Моментално во гаснењето учествуваат седум противпожарни возила и најмалку 20-тина пожарникари.
Поради опасноста од зафаќање на трафостаница и електрични водови, превентивно струјата е исклучена и поради тоа поголемиот дел од општината Аеродром е без електрична енергија, велат од ЦУК.