Македонија
Средба на министерката за труд и социјална политика и директорите на центрите за социјална работа

Министерката за труд и социјална политика, Јагода Шахпаска, денеска оствари средба со директорите на центрите за социјална работа на ниво на држава, на која се разговараше за потребите и предизвиците со кои тие се соочуваат и нивното понатамошно успешно решавање и надминување.
Министерката Шахпаска во разговор со присутните директори посочи дека достапноста, одговорноста, отчетноста и ефикасноста се принципите врз кои треба да функционираат сите фактори во општествениот систем за тој да функционира, со посебен акцент на лицата што се одговорни за решавање на социјалните предизвици, како што се центрите за социјална работа.
На средбата се разговараше на повеќе теми што се опфатени во делокругот на работењето на центрите за социјална работа. Старателството, водењето случај и неговата имплементација, подготвеноста на дневните центри за лица со попреченост за повторно нивно отворање, состојбата со капацитет на згрижувачки семејства и мали групни домови, како и интегрирање на социјалните случаи како активни учесници во пазарот на трудот.
На средбата се разговараше и за функционирањето на шелтер-центрите, особено за порастот на семејното насилство изминатиов период, каде што најголем број жртви се старите лица.
„Со поголемото интегрирање на социјалните случаи како активни учесници на пазарот на трудот и нивно извлекување од сиромаштија, покрај тоа што го намалуваме бројот на корисници на социјална помош, им помагаме на овие лица активно да се вклучат во општеството и самостојно да функционираат, што претставува дел од социјалната реформа“, истакна министерката Шахпаска.
Таа повика на поголема вклученост во идејни решенија и реализација на проекти од страна на центрите, а во соработка со oпштините, за адаптација, реконструкција и градење домови, градинки, центри и слично, односно поголем обем на капитални инвестиции. Заеднички беше заклучокот дека соработката и поддршката продолжуваат и понатаму за да се создаде општество што се грижи за оние на кои им е тоа потребно, со акцент на најранливите категории граѓани, соопшти Министерството за труд и социјална политика.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Годишно по 20 македонски студенти ќе добиваат стипендии за студии во Унгарија

Македонските студенти ќе можат да користат 20 стипендии годишно за да студираат во Унгарија на унгарски или на странски јазик. Приоритет ќе имаат апликанти кои сакаат да студираат во областа на наука, технологија, инженерство и математика (СТЕМ), како и медицински и здравствени науки и земјоделство.
Стипендиите ќе се доделуваат за редовни додипломски, постдипломски, едностепени магистерски студии и за докторски студии. Исто така и за скратени студии од три до десет месеци за стекнување академски кредити.
Меморандумот за разбирање со кој се регулира соработката во рамките на Програмата Стипендиум Хунгарикум за периодот 2026–2028 година денеска го потпишаа министерката за образование и наука Весна Јаневска и унгарскиот министер за надворешна политика и трговија Петер Сијарто.
Меморандумот предвидува студентите да добиваат платена школарина, сместување во студентски домови во кампусот на високообразовната институција или средства за покривање на трошоците за сместување, право на здравствени услуги, користење на бесплатни библиотечни услуги, како и месечен надоместок за покривање на основните трошоци.
Министрите Јаневска и Сијарто се согласија дека потпишувањето на Меморандумот ги потврдува и јакне пријателските односи меѓу двете земји и ја унапредува соработката во областа на високото образование, во интерес на развој на општество базирано на знаење.
Македонија
Без дозвола реконструиран, со употреба на несоодветни материјали: дискотеката во Кочани не ги исполнувала ниту минималните услови за угостителска дејност

Вчера се приведени 13 лица инволвирани во трагедијата во Кочани, потсети денеска на прес-конференција јавниот обвинител Љупчо Коцевски.
Тој извести и дека денеска до Основниот суд во Кочани е поднесено обвинение против 34 физички и три правни лица за кривични дела поврзани со пожарот во дискотеката „Пулс“ во Кочани.
„Денеска до Основен суд во Кочани се поднесува обвинителен акт против 34 физички и три правни лица за кривични дела со кои предизвикале значителна опасност за животот и телото на луѓето и за имотот од поголеми размери, на место на кое се собрале поголем број на луѓе, односно за пожарот при настапот на музичката група ДНК на 16 март, каде што животот го загубија 62 лица, 157 се здобиле со тешки повреди и 54 лица со повреди“, изјави Коцевски.
За полицајците се бараат мерки за обезбедување на присуство, бидејќи при акциската контрола дозволиле употреба на пиротехника.
Јавниот обвинител предложи спрема осомничените да се определат соодветни мерки за забрана за напуштање на живеалиштето и да се јавуваат кај институциите за спроведување на законот, одземање на патните исправи и слично.
Обвинетите делото го сториле со свесно постапување рече обвинителот, и дејствувале спротивно на прописите за заштита.
Палењето на пиротехниката не било пријавено во полицијата.
Тој рече дека тие се гонат за тешки дела против општата сигурност.
Во деталите за случајот Коцевски кажа дека објектот не ги исполнувал ниту минималните услови за угостителска дејност.
За објектот, меѓу другото, немало основен проект за реконструкција со пренамена со соодветна статика и сеизмика, електротехнички и термички елаборати како и елаборат за заштита од пожари.
Не донеле и изработиле план за заштита и спасување.
Наспроти ова, првообвинетиот, сопственикот на објектот, преземал градежни дејствија и реконструиал и вградувал несоодветни материјали кои носата ризик од предизвикување на пожар, објасни Коцевски.
Во објектот не бил испочитуван ниту еден пропис во однос на квалитетот на вградените материјали, носивоста и стабилноста на конструктивните материјали, излезот, и влезот, паркингот, средства за ганење на пожари.
Обвинет е и братот на сопственикот на објектот кој продавал влезници, за поголем број на посетители од дозволеното и дозволувал влез на лица помлади од 18 години иако бил свесен за незаконските дејствија, појасни Коцевски како дел од деталите.
Тој потенцира дека во дискотеката никогаш не бил спроведен инспекциски надзор.
Оцени дека секоја од алките во случајот со трагедијата во Кочани имала моќ да го спречи трагичниот настан но никој не го сторил тоа.
Македонија
Се одложи судењето за убиството на бездомното куче Феликс, активистите в недела излегуваат на протест

Се одложи судското рочиште за свирепото убиство на бездомното куче Феликс. Поради тоа, актвистите за заштита на правата на животните повикаа на мирен протестен марш, што ќе се одржи на 15 јуни (недела), со почеток во 12:00 часот, пред Министерството за внатрешни работи.
„Судот немаше друг избор, почитувајќи го начелото на правичност, освен да ја одложи главната расправа поради наводни здравствени причини на бранителот на обвинетиот, токму во момент кога требаше да се произнесе одбраната. Случајност или сепак не?“, велат од граѓанската иницијатива ЗЕЛЕН ХУМАН ГРАД, кое е организаторт на протестот.
„Вчера требаше да сведочи Злате Димески — предложен од одбраната и присутен на самото место на убиството. Злате Димески го донесе стапот со кој беше убиен Феликс и на видеоснимките се гледа како немо набљудува со рацете зад грб додека Феликс беше немилосрдно претепуван и за жал подоцна им подлегна на повредите“, се наведува во соопштението.
Давањето можност убиецот да го брани лице кое со право може да се смета за соучесник — нем набљудувач кој не само што во ниту еден момент не се обиде да го спречи насилството врз недолжно животно туку и е истиот тој што го обезбеди оружјето за извршување на убиството, според Зелен хуман град, претставува дополнителна неправда и болно извртување на правото на фер судење.
„До кога ќе ја чекаме правдата за Феликс, имајќи ги предвид сите одложувања, годишни одмори, судска ферија? Ќе ја добиеме ли воопшто?“, прашуваат од Здружението.
На протестот ќе побараат итно расчистување на случајот и максимална затворска казна за сторителот Љубе Крстевски како и за неговиот соучесник Бранко Билбиловски, воведување минимум од 1 година задолжителна затворска казна за кривичното дело убиство и мачење животни од Кривичниот законик, формирање локални (општински служби за заштита на животните), донесување закон за Комунална полиција (со полиција за животни), превентивни мерки за редуцирање на насилството врз животните и системска едукација.