Македонија
Средба Сугарески – Бочварски

На денешната работна средба меѓу директорот на Царинската управа, Горан Сугарески, министерот за транспорт и врски, Благој Бочварски, и државниот секретар, Митко Трајчулески, се разговарало за активности што се однесуваат на градежни проекти на Царинската управа за изградба или реконструкција на граничните премини и градежни интервенции, информираат од кабинетот на Сугарески.
„Реализацијата на предвидените активности за осовременување на граничните премини ќе придонесат кон поголема функционалност, забрзан проток на сообраќајот и зголемен квалитет на услугите за вработените и патниците како корисници на граничните премини“, истакна Сугарески.
Се разговарало и за реконструкција на граничните премини Ќафасан и Деве Баир и за набавка на нов национален едношалтерски систем, кои се дел од проектот за олеснување на трговијата и транспортот за Западен Балкан, финансиран со заем од Светската банка, а се реализира преку проектната единица во рамките на Министерството за транспорт и врски, информираат надлежните.
Соговорниците на денешната средба утврдиле дека активно се работи на реализација на проектите, a динамиката при изведување е задржана во согласност со предвидувањата.
„Царинската управа ќе продолжи интензивно да соработува со сите владини и државни институции кои се надлежни за протокот на стоки, добра и патници со цел олеснување на царинските процедури“, известуваат од оваа институција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Фетаи со делегацијата на Европската служба за надворешни работи: Владата е посветена на враќањето на владеењето на правото и борбата против корупцијата

Заменик-претседателот на Владата задолжен за добро владеење, Арбен Фетаи, денес оствари средба со делегацијата на Европската служба за надворешни работи, предводена од Зузана Михаљцова Шутиакова, шефица на одделението за Западен Балкан.
На средбата, Фетаи нагласи дека Владата на Северна Македонија е посветена на враќањето на владеењето на правото во земјата, преземајќи конкретни чекори во борбата против корупцијата и нејзиното спречување.
Фетаи ја информираше европската делегација за чекорите што ги презел неговиот кабинет во оваа насока, вклучувајќи го усвојувањето на Годишниот план за работа, кој е главно насочен кон борбата против корупцијата, формирањето на Меѓуресорското тело за координација на борбата против корупцијата, како и усвојувањето на новата Стратегија за финансиски истраги и конфискација на незаконски стекнат имот.
Беше разговарано и за Реформската агенда на Владата, која продолжува со полн капацитет, во согласност со целите за усогласување со законодавството на ЕУ.
Македонија
За влез на Табановце се чека до половина час

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен. На ГП Табановце се бележи зголемена фреквенција на возила времето на чекање за влез во државата е околу 20-30 минути. На останатите гранични премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Муцунски ја пречека Кос: Евроинтеграциите не се само декларативна заложба, туку и јасна стратешка определба на Владата

Срдечно добредојде за еврокомесарката Марта Кос во Скопје, напиша на социјалните мрежи шефот на македонската дипломатија, Тимчо Муцунски по средбата на скопскиот аеродром.
„Попладнево, во пресрет на утрешниот Самит на лидерите од Западен Балкан, имав чест да ја пречекам на скопскиот аеродром еврокомесарката за проширување на Европската унија, Марта Кос.
Евроинтеграциите не се само декларативна заложба, туку и јасна стратешка определба на Владата. Пред нас е исполнета агенда – денеска, заедно со претседателот на Владата, Христијан Мицкоски, ќе оствариме средба со еврокомесарката.
Утре, на состанокот на лидерите од ЕУ и Западен Балкан, фокусот ќе биде ставен на Планот за раст, реформската агенда, како и на предизвиците со кои се соочуваат нашата држава и регионот на патот кон полноправно членство во Европската унија“, појасни Муцунски.