Во политичкиот дел на Програмата за парламентарна поддршка на Собранието, финансирана од швајцарската амбасада и имплементирана од НДИ, а со цел продолжување на процесот за осамостојување на собраниското обезбедување, претседателот на Собранието на Република Северна Македонија, Талат Џафери, и делегацијата од Собранието, во чиј состав се координатори на пратеничките групи, оствари средба со претседателката на германскиот Бундестаг, Бербел Бас.

На средбата Џафери се заблагодари за постојаната и континуирана поддршка на Бундестагот во последните 5 години преку споделување искуствата во сферите во кои беа потребни реформи во насока на осaмoстојување на законодавната власт во Република Северна Македонија, при што и со оваа студиска посета се покажа дека Бундестагот е подготвен да го поддржи заокружувањето на процесот на независност на Собранието.

Во однос на мултилатералната сорботка во рамките на НАТО, Бас ги поздрави усвојувањето на декларацијата за Украина и приклучувањето на Република Северна Македонија на санкциите против Руската Федерација иако не е членка на ЕУ, чекор со кој повтроно се покажува зрелоста на државата и нејзината јасна определба за членство во Унијата. Во овој контекст Џафери искажа увереност дека државата ќе добие датум за отворање на пристапните преговори со Унијата на самитот во јуни. Претседателката Бас одговори дека и на лично и на институционално ниво ќе стори сѐ за да се реализира оваа заложба и се осврна на билатералното прашање со Бугарија искористувајќи ја директната средба за да постави конктерни прашања во врска со билатералниот спор.

Џафери информира за повеќе аспекти на наметнатиот билатерален спор од страна на Бугарија и покрај потпишаниот договор за добрососедство и нагласи дека недозволливо е за една држава да влијае или да му укаже на друг народ какво лично, национално или јазично чувство треба да има затоа што ваквото чувство не е предмет на договор, дополнително, никој не успеал да ја поправи или смени историјата, но многумина успеале да се надминат себеси и да се свртат кон иднината.

Соговорниците се согласија дека пријателите треба да разговараат директно и отворено, во насока на што Џафери упати покана за официјална посета на Бас на Македонија, а таа ја прифати со задоволство и истакна дека штом ѝ дозволи календарот за работа на Бундестагот, ќе ја реализира посетата.