Македонија
Средба Џафери-Чијамба: Проширувањето на ЕУ и натаму останува високо на агендата на романското претседавање со Советот на ЕУ

Претседателот на Собранието на Република Македонија, Талат Џафери, оствари средба со Џеорџе Чијамба, министер делегиран за европски прашања во Владата на Романија, кој престојува во официјална посета на Република Македонија по повод преземањето на претседавањето со Советот на Европската Унија од јануари в година.
Џафери на почетокот на средбата нагласи дека оваа средба претставува поттик за понатамошен развој на меѓупарламентарната соработка меѓу двете пријателски земји на сите парламентарни нивоа, како на ниво на претседатели на парламенти така и меѓу групите за соработка во двата парламента.
Претседателот Џафери нагласи дека билатералните односи и соработка на двете земји на мултилатерален план континуирано се унапредуваат и збогатуваат, при што високо се ценат ангажманот и посветеноста на Романија за полноправно членство на Република Македонија во НАТО и почнување на преговорите со Европската Унија. Во таа насока го информира соговорникот за актуелниот процес на уставните измени како финализација на имплементацијата на преспанскиот договор.
Министерот Чијамба ја поздрави успешната работа на Собранието во целокупниот процес сврзан со договорот меѓу Република Македонија и Република Грција како клучен сегмент во пошироката цел – Република Македонија како земја членка на НАТО и Европската Унија.
Тој за време на средбата информира за подготовките на Романија за преземањето на претседавањето со Советот на Европската Унија од јануари 2019 година нагласувајќи притоа дека проширувањето на ЕУ и натаму останува високо на агендата на романското претседавање.
Планирани се голем број конференции, меѓународни форуми и други придружни настани, при што ќе се обрне големо внимание и на парламентарната димензија, а за поттик на визијата на младата генерација ќе се организира една помирувачка конференција која треба да даде пример на државите од Западен Балкан според германско-францускиот помирувачки процес, посочи тој. Чијамба упати отворена покана за учество на сите парламентарни настани, кои заедно со сите други активности ќе го сочинуваат романското претседавање со Советот на Европската Унија. Тој исто така информира дека има еден пратеник со македонско потекло во романскиот парламент, а највисоките државни институции на Романија неодамна донеле одлука 8 декември пригодно да се одбележува како Ден на македонскиот јазик во Романија.
Двајцата соговорници споделија позитивни видувања за договорот за соработка во областа на образованието, науката, културата, медиумите, младите и спортот, кој е потпишан меѓу двете влади во 2013 година и веќе е ратификуван од страна на романскиот парламент, при што претседателот Џафери изрази заложба за негова скорешна ратификација во Собранието на Република Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: Наместо да фабрикуваат списоци, СДС да каже како 9 милиони евра од набавка на јаглен завршиле кај фирма на Заев блиска до Филипче

„Интересно е како денес, кога излеговме со информации и докази како 9 милиони евра од од набавката на јаглен за ЕСМ во време на СДС завршиле кај фирма на Заев блиска до Филипче, СДС прави фабрикувани списоци“, реагираат од ВМРО-ДПМНЕ на прес-конференцијата на портпаролката на СДСМ, Богданка Кузеска.
„Наместо да одговорат како 9 милиони евра завршиле кај нивниот партиски лидер и поранеше лидер, тие се служат со лаги.
Исто нема одговор, како фирмата која го внесувала јагленот во Македонија на Филипче му купила џип?
Венко Филипче треба да почне да дава одговори, наместо да ги тера во партијата да измислуваат лаги.
Воедно чекаме ЈО да почне да постапува“, стои во реакцијата на ВМРО-ДПМНЕ.
Македонија
(Видео) Митева: Одморалиштето Пониква се става на располагање за рехабилитација на повредените од Кочани

Владата во текот на следната недела ќе донесе одлука со која одморалиштето Пониква, кое е во сопственост на Министерството за внатрешни работи, ќе се стави на располагање на Министерството за здравство, за да се користи како објект за продолжена медицинска нега и рехабилитација, информира денеска на прес-конференција владината портпаролка Марија Митева.
Таа истакна дека одморалиштето Пониква располага со 27 соби и 56 легла, лоцирано е во природна и мирна средина, што го прави исклучително погоден простор за пациентите кои се веќе во фаза од лекувањето во која е неопходна физикална и работна терапија.
„Станува збор за пациенти кои се веќе стабилизирани, но кај кои постои реална потреба за понатамошен третман, се со цел да се спречат и намалат долгорочните последици од изгорениците, како и други можни компликации коишто се поврзани со подолготрајното лекување“, рече Митева.
Појасни дека во моментот се работи на детален оперативен план за распределба и згрижување на пациентите, во соработка со Министерството за здравство и медицинските тимови, кои ќе ја понесат својата опрема во одморалиштето Пониква и ќе обезбедат континуирана медицинска нега директно на терен.
„Ќе се направи план пациентите да бидат распределени во неколку групи и циклуси на терапија, се со цел да се овозможи персонализиран пристап кон секој поединечен случај, во согласност со препораките на лекарите“, кажа Митева.
Покрај медицинската грижа, оваа мерка има и важен психолошки и социјален аспект, потенцира портпаролката и додадека дека „овозможувањето на престој во ваков тип на објект ќе придонесе за меѓусебна поддршка помеѓу пациентите и подобрување на нивната психо-емоционална состојба“.
„Според медицинските проценки, пациентите не смеат да бидат изложени на директно сонце и високи температури, а истовремено, не треба да се соочуваат со дополнителен физички и логистички напор. Затоа, Пониква ги нуди сите предуслови за ваков тип на згрижување. Очекуваме во најкус можен рок да ги завршиме сите овие процедури и институционално да ги донесеме овие одлуки, медицинскиот кадар да контактира со сите пациенти, по што ќе започне сместувањето и спроведувањето на терапиите, согласно веќе утврдениот план“, рече Митева на прес-конференцијата.
Македонија
(Видео) Илиевски: МВР набавува сомнителен софтвер за прислушкување

На почетокот на мај оваа година МВР потпишало Договор за набавка на софтвер кој се користи за прислушкување и шпионажа на телефонските уреди, рече денеска на прес-конференција Методија Илиевски, потпретседател на СДСМ.
„Дали следењето и прислушкувањето новинари, активисти и политички неистомисленици се таргет на МВРО-ВМРО? Софтверот “Селебрајт Инсајтс Про” како и “НовиСпај” се алатки развиени за потребите на српската Безбедносно информативна агенција. Проблематично е тоа што во светските медиуми и официјални соопштенија на Гугл, за овој софтвер се наведува дека бил користен за следење на новинари и активисти. “Амнести интернешнл” во својот извештај објави целосно истражување и форензички резултати за овие случувања. Сега МВР набавува годишна лиценца за софтвер Cellebrite Inseyets Online Pro, годишна лиценца за Recon ITR, Recon Lab, Exterro FTK Enforcement Bundle за 9 милони денари“, истакна Илиевски.
Според него, „ова се скандалозни и загрижувачки информации“.
„Зошто МВР го избра најсомнителниот софтвер, познат по низа скандали и незаконско следење? Ќе се прислушкува ли повторно „на големо“ и тоа без соодветни одобренија од правосудните органи? Ќе има ли кој да контролира и како би се контролирало недозволено следење, снимање, упад во комуникациите на граѓаните? МВР должи одговори на јавноста“, нагласи Илиевски.