Еднаков третман при инвестирање во јавните и приватните здравствени установи (ПЗУ) кои се дел од здравствената мрежа и имаат склучени договори со Фондот за здравствено осигурување (ФЗО). Можност за вклучување приватни здравствени установи што немаат договор со ФЗО во економските програми за финансиска поддршка, како и потреба од понепосредна и подинамична имплементација на проектот „Учиме од бизнис-заедницата“, се дел од мерките што ќе го подобрат работењето на приватните здравствени установи во земјата, беше истакнато на денешната прес-конференција на Сојузот на стопанските комори на Македонија (ССК).

Доктор Борислав Јосифовски, член на управен одбор и претставник на приватните здравствени установи во Сојузот, посочи дека во консултација со членовите на Групацијата на приватно здравство ги поздравува реформскиот курс на Владата и иницијативата за еднакви можности и го користи моментот за ревизија на постојните решенија и пракси. Во насока на зголемување на квалитетот на здравствените услуги потребно е, покрај другите сектори, да се поддржи и развојот на приватното здравство.

„Според постојната состојба во здраствената мрежа изготвена од Министерството за здравство, во моментот над 70 отсто од вкупниот број здравствени установи се ПЗУ, кои се разликуваат од јавниот сектор (ЈЗУ) исклучиво по сопственоста, која е приватна за разлика од јавниот сектор каде што основач е Владата, но во извршување на својата дејност и двата сектора, доколку се потписници на договори со ФЗО, обавуваат јавни функции за граѓаните. И покрај тоа што ПЗУ и ЈЗУ се еднакви пред законот, сепак досегашното искуство за кое и јавноста е сведок говори дека инвестициите во здравството во изминатите 25 години, а кои се на товар на буџетот или ФЗО, се исклучиво наменети за јавниот сектор“, изјави Јосифовски.

Дополнително тој додаде дека потребно е сериозно да се разгледа можноста за вклучување приватни здравствени установи што немаат договор со ФЗО во економските програми за финансиска поддршка. „Во понудениот план за економски раст не е опфатен здравствениот сектор, кој како и другите стопански гранки генерира средства во буџетот. Треба да бидат препознаени и вклучени во мерките на планот за економски раст и здраствените установи во кои доминантно се даваат услуги на странски државјани, што би значело поттик во имплементацијата на нови медицински доктрини и технологии, како и во подигањето на нивото на здравствени услуги и на домашен план“, изјави Јосифовски.

За подобрување на комуникацијата и реализацијата на одредени проблематики, Јосифовски ја истакна важноста од понепосредна и подинамична соработка на ПЗУ со ресорните владини институции, што веќе постои во рамките на проектот „Учиме од бизнис-заедницата“.

„Целта е да се утврди веродостојноста на понудените закони и подзаконски акти со можност да се валоризираат веќе постојните понудени рершенија и со измени и доплнувања успешно да се отстранат одредени недоречености што во секојдневната пракса прават недоразбирања помеѓу факторите: јавните службеници (преставници на министерства и инспектори), давателите на услуги и корисници на услугите“, рече Јосифовски.