Македонија
ССНМ: Колективните договори се основа за подобрување на работничките права во медиумите

Денот на трудот, 1 Мај, Самостојниот синдикат на новинари и медиумски работници го одбележува со предупредување/укажување дека новинарите и медиумските работници во Македонија работат во услови на прекаријат каде што само една третина од вработените во медиумите (околу 700 од 2.100) се покриени со колективен договор.
Позитивни и подобрени права по Колективните договори ги ползуваат само вработените во јавниот сектор, односно таканаречените „државни“ медиуми, додека новинарите и медиумските работници во приватниот сектор се уште се соочуваат со низа прекршувања на работничките права и нивна помала заштита.
„Укажуваме дека во услови на ниски плати, каде што речиси 70 проценти од медиумските работници и 50 проценти од новинарите земаат плати под просечната тешко е остварливо начелото на професионално и објективно известување бидејќи само социо-економски обезбедни новинари може да бидат чувари на јавниот интерес. Работа во услови на прекаријат, несигурни работни места, краткорочни договори или само хонорарни договори, непочитување на одредбите за годишен одмор, за работното време, неисплата на прекувремена работа или празнични дневници се уште се болни точки за новинарите и медиумите кои по дефиниција извршуваат работа од јавен интерес која е еден од столбовите за развој на едно демократско општество“, велат од ССНМ.
Овој 1 Мај потсетуваме дека борбата за подобрување на условите за работа, зголемување на ниските плати, навремена исплата на платите и во јавниот и во приватниот сектор, е основа и оди рака под рака со борбата за слобода на изразување и слободно информирање на граѓаните. Борбата е постојана и зависи од здружувањето и заедништвото при инсистирањето за подобрување како на социо-економските услови, така и на условите за професионално и објективно известување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Манасиевски: Дали Филипче е воодушевен од Заев и дали и тој мисли како него дека македонскиот јазик е ист со бугарскиот

Заев тврдеше дека Македонците и Бугарите се ист народ и дека Македонскиот и Бугарскиот јазик се исти. Дали и Венко Филипче го мисли истото, со оглед на тоа дека кажа дека народот треба да учи од Зоран Заев и дека нема друг како него, праша Валентин Манасиевски од ВМРО-ДПМНЕ.
„Заев ги опустоши Македонските национални интереси, и како кловн кој ги засмејуваше регионалните политичари. Дали Венко Филипче се гордее и со тоа?“, рече Манасиевски.
Додаде дека е добро што народот знае со сигурност дека Венко Филипче е втор Зоран Заев, и што може да очекува.
Македонија
Сиљановска-Давкова: Работниците и синдикатите со право протестираат за повисоки плати и пошироки права

Порака од претседателката Сиљановска-Давкова по повод 1 Мај – Меѓународниот ден на трудот:
Денеска го славиме 1 Мај – Меѓународниот ден на трудот, ги славиме оние кои работат вредно, посветено и пожртвувано, како и сите оние кои оставиле историски печат во долгата и тешка борба за вреднување на работничкиот труд и почитување на работничките права.
На овој ден им оддаваме заслужена посебна почит и признание на работниците – генерации и генерации на мнозинството луѓе со најголем придонес во создавањето и изградбата на државата и општествените вредности.
Први мај е ден кога работниците и синдикатите со право протестираат за повисоки плати и пошироки права, потенцирајќи го социјалниот карактер на македонската држава што има уставна обврска да води сметка за хуманизмот, социјалната правда и солидарноста како темелни вредности на уставниот поредок.
Први мај е вистинскиот ден кога ние, носителите на власта треба да се запрашаме: дали и како се остварува правото на работа, дали секој има слободен избор на вработување, дали вработените се заштитени при вработувањето, дали се соодветно материјално обезбедени при невработеност, дали секому под еднакви услови му е достапно секое работно место, дали заработувачката е соодветна на трудот, дали секој вработен има право на дневен, неделен и годишен одмор, дали се почитуваат колективните договори?
Пред нас се многу проблеми и дилеми што мора да се надминат.
Социјалната правда не смее да се применува селективно, ниту да се перцепира како недостижен идеал. Таа е невозможна без соодветно вреднување на човековиот труд и без уважување на работничкото достоинствено. Тоа подразбира правична плата, квалитетни услови за работа, безбедност и сигурност во работењето, можност за надградување и напредување.
Во демократски политички систем мора да се слуша гласот на работникот, да се почитува синдикалното организирање и правото на штрајк, да се негува социјалниот дијалог, да се гради партиципативна демократија.
Убедена сум дека само задоволниот работник може да биде продуктивен, ефикасен и ефективен.
Да го чуваме и да вложуваме во нашиот највреден ресурс – човекот!
Честит 1 Мај – Денот на трудот!
Македонија
ВМРО-ДПМНЕ: Левица да каже како од левичарска партија се стекна со имот вреден 1 милион евра за 400 000 евра

Партија која гласно се претставува како борец за правда наеднаш се здобива со имот кој вреди 1 милион евра, а Апасиев го купува за 400 000 евра, и притоа манипулира како тоа било подрум, подрум од 409м2, реагира ВМРО-ДПМНЕ на обвинувањата на Левица.
„Левица глумат револуционери и како тие ќе го ‘спасат’ системот преку театрални настапи, кои инаку се популистички, а зад кулисите прават зделки за моќ, привилегии и удобност.
Колку од нивната гласна идеологија е продадена со тој договор?
Нивното “храбро“ однесување претставува само обид за да го одвлечат вниманието на граѓаните, додека тие самите тивко се интегрираат во системот, и си ги продаваат тие идеали позади кои тврдат дека стојат.
Додека нивните членови јавно ги напуштаат преку фејсбук објави, Апасиев купува имот вреден тројно повеќе, во центар на Скопје од 409м2, и лаже дека купил подрум и си го манипулира членството, за притоа да пие кафе во истиот објект каде другар му отвори кафуле.
Од “борци“ станаа пиуни со двојни стандарди и ја претворија Левица во приватна сопственост. Партија која тврди дека се бори против елитизам сега има лидер елитист.
Левица да каже од каде им се средствата и како се вклопуваат во сликата на антикапиталистичка партија, многу лесно ги променија боите, а можеби само левичарската црвена на Апасиев не била ништо повеќе од костим“, се вели во соопштението на ВМРО-ДПМНЕ.