Македонија
ССНМ: Објавена декларација за подобрување на работничките и на професионалните права на новинарите и медиумските работници

Подобрување на професионалните и на работничките права, како и на условите за работа на новинарите и медиумските работници, се главните пораки од декларацијата што денеска на прес-конференција во Скопје беше презентирана од Самостојниот синдикат на новинарите и медиумските работници и Меѓународната федерација на новинарите (ЕФН).
Декларацијата, која беше поддржана и од Здружението на новинарите на Македонија и од Институтот РЕСИС, беше создадена по тридневната „Мисија за скрининг и застапување за професионалните и работничките права на новинарите и медиумските работници“ во Македонија, дел од проектот „Работнички права за независно новинарство“, поддржан од Европската Унија.
Декларацијата се базира на тоа дека професионалните новинари и медиумите треба да може да работат во слободна медиумска средина, без притисоци и закани, за да се гарантира функционирањето на демократските процеси во Македонија, како и од премисата дека само безбедни и добро платени новинари и медиумски работници може да продуцираат новинарство што го штити јавниот интерес.
Декларацијата беше презентирана од генералниот секретар на Меѓународната федерација на новинарите, Ентони Беланжер, дел од тимот на мисијата заедно со Нисрин Саламех од ЕФН и медиумскиот експерт и консултант, Деирдре Кевин.
По тридневните средби со надлежните институции за медиумската легислатива, како и со редакции и медиумски организации, мисијата се запозна со состојбата на слободата на медиумите во Македонија и со условите во кои работат новинарите.
„Никогаш не заборавајте дека новинарите работат во јавен интерес, никогаш не заборавајте дека новинарите работат во интерес на граѓаните на својата земја. Демократијата мора да брани слободен и независен печат. Демократијата мора да им овозможи на медиумите и на новинарите да работат во добри услови. Демократијата мора да обезбеди етичка и економска независност на своите новинари и медиумски плурализам“, рече Беланжер на прес-конференцијата.
Тој испрати и силна порака дека Законот за медиумите мора да ги зема предвид демократските стандарди, но и меѓународните документи и одлуки како на МФН така и на главните агенции на Обединетите нации.
Претседателот на ССНМ, Павле Беловски, се осврна на борбата за работничките и професионалните права, како и на важноста на поддршката од професионалните организации, како ЕФН.
„Оваа посета или мисија за нас е важна од повеќе аспекти, пред сè, многу ни значи поддршката што ја добиваме од Меѓународната федерација на новинарите, која претставува стотици илјади новинари од целиот свет, но е важна и поради искуството и знаењето што го имаат тие, како и од Деирдре Кевин, кога се работи за борбата за работничките права и застапувањето за нивно остварување како преку директна борба така и преку подобрување на законските решенија, кои се однесуваат на медиумите“, рече Беловски.
Експертот за медиумска легислатива, Деирдре Кевин, ја истакна потребата од развивање целосно нова легислатива за медиумите.
„Многу е важно да се проодлжи со процесот на подобрување на медиумската легислатива, особено усогласување со Европскиот закон за слобода на медиумите. Ова се однесува и на заштитата на условите за работа на новинарите. Секако, потребна е и транспарентност на финансирањето на медиумите. Преку ЕУ-проект во 2023 година веќе беа изработени низа анализи и препораки за нов закон за медиуми, со кои се подобруваат и заштитуваат работничките права на новинарите. Исто така, се препорачува и формирање фонд за медиумски плурализам и квалитетно новинарство“, рече Кевин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Зголемен интензитет на сообраќај поради летните одмори

На 27.08.2025 од 05:00 часот регионалниот пат Р-1106 Нова Брезница – Македонски Брод преку националниот парк Јасен ќе биде пуштен за сообраќај во термините од министерство за внатрешни работи. Се препорачува внимателно возење, почитување на сигнализацијата и прилагодување на брзината поради можни одрони на патот.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на граничните преминиод македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
На ГП Меџитлија откриени над 300 шишиња со хемиски препарати за прскање: спречен обид за криумчарење

Царинските службеници на граничниот премин Меџитлија спречија обид за криумчарење на поголема количина препарати за заштита на растенија.
Во раните утрински часови, на 26.08.2025 година, при вршење на редовна царинска контрола на патничко моторно возило Mercedes со македонски регистарски таблички, со кое патувало семејство што изјавило дека се враќа од одмор во Турција и преку Грција пристигнало на влез во нашата земја, од страна на царинските службеници биле откриени 322 шишиња хемиски препарати за прскање, од кои 300 шишиња инсектицид CORAGEN 20 SC и 22 шишиња фунгицид Bellis BASF со вкупна вредност од 16.058,00 евра.
Препаратите биле сокриени на повеќе места во возилото – во багажниот простор зад куферите со лични работи, во просторот за резервна гума и на задните седишта. Возачот не поседувал соодветна дозвола за увоз, иако станува збор за стока што подлежи на посебен режим на дозволи со што безбедноста на производите не е гарантирана .
Стоката е задржана, возилото со кое била транспортирана е одземено, а против лицето ќе биде поведена кривична постапка. Случајот е предаден на Одделението за истраги при Сектор за контрола и истраги за понатамошно постапување.
Македонија
Претежно сончево и топло со температури до 36 степени

Времето денеска, претежно сончево и топло. Ќе дува слаб до умерен ветер од јужен правец. Минималната температура ќе биде во интервал од 6 до 14, а максималната ќе достигне од 27 до 36 степени.
Во Скопје, сончево со мала до умерена облачност. Ќе дува слаб ветер од јужен правец. Минималната температура ќе се спушти до 12, а максималната ќе достигне до 36 степени.
Во следните два дена ќе се задржи претежно сончево и топло време со постепен пораст на дневните температури. Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен југозападен, а во недела северен ветер, кој ќе услови опаѓање на дневните температури. Потоа следува период на стабилно и потопло време.