Македонија
Стаменковска-Стојковскa: Манчевски го направи МИОА кластер на зараза од Ковид-19

Дамјан Манчевски го направи Министерството за информатичко општество и администрација кластер на зараза од Ковид-19, обвини дополнителната заменик-министерка, Невенка Стаменковска-Стојковска. Таа рече дека некои од вработените, кои изминативе денови биле на работните места во Министерството, се потврдени позитивни на тестирањето на Ковид-19.
„Денес, сите вработени на МИОА од зградата на поранешна ‘Нова Македонија’ се известени во наредните 14 дена да не доаѓаат на работа. Тоа што се случи овие денови во Министерството за информатичко општество и администрација е сè она за што предупредував и алармирав уште пред еден и пол месец, на 1 јуни“, вели заменик-министерката.
Таа рече дека на 1 јуни предупредила оти со одлуката на Владата на СДСМ да ги врати вработените од јавниот сектор на работните места, без воведени протоколи за работа, ги доведува во ризик здравјето и животот на вработените.
„Јавно апелирав до Дамјан Манчевски и Венко Филипче да не си играат со здравјето и животот на вработените во јавната администрација и прашував дали вработените се обучени, информирани и известени за ризиците што постојат на нивното работно место, дека е можно да имале контакт со лице заболено од Ковид-19, дали се преземени какви било мерки за заштита на вработените и дали одговорните во институциите го известиле Државниот инспекторат за труд за повреда при работа, професионално заболување, што е воедно и императивна обврска за работодавецот. Наместо одговори, и од Манчевски и од Филипче бев обвинувана дека сум ширела паника и дека тие се погрижиле за сè и сè било во ред. Дамјан и Венко, не ширев јас паника, но вие со вашето неодговорно однесување го проширивте коронавирусот помеѓу вработените на МИОА. Почитувани, со жалење и огорченост известувам дека денес МИОА се претвори во ново жариште на зараза на Ковид-19“, вели Стаменковска-Стојковскa.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Чекање до 45 минути на Табановце и Пелинце, а на Богородица околу 30 минути

Со зголемувањето на летните одмори и интензивните туристички патувања, на македонските гранични премини повторно се бележат големи гужви. Најголемиот притисок се чувствува на ГП Табановце и ГП Пелинце, каде времето на чекање изнесува околу 45 минути, додека на ГП Богородица возачите чекаат околу 30 минути за излез од државата.
На останатите гранични премини засега нема подолги задржувања за влез и излез од земјава, но надлежните предупредуваат дека состојбата може брзо да се промени со оглед на високата фреквенција на сообраќај.
Од Автомотосојузот на Македонија (АМСМ) информираат дека сообраќајот на државните патишта се одвива по суви коловози, но апелираат до возачите на зголемена претпазливост, особено во критичните делници низ планински и речни региони.
„Апелираме до сите учесници во сообраќајот да ја прилагодат брзината на движење според условите на патот и да ја почитуваат поставената сигнализација. Особено внимание е потребно на делниците Катланово – Велес, Маврово – Дебар – Струга, Виница – Берово и Кочани – Делчево, каде постои можност од одрони“, изјавија од АМСМ.
Најмногу возила има од и кон Србија и Грција, а засилено движење се очекува и во текот на викендот, кога се очекува нов бран на заминувања и враќања од одмор.
Македонија
Денес сончево и топло, попладне дожд

Времето денеска ќе биде сончево и топло со мала до умерена локална облачност. Попладне претежно во северните делови ќе има услови за локална нестабилност со пороен дожд и грмежи. Ќе дува слаб до умерен јужен, а во западните делови повремено засилен ветер од југозападен правец. Кон крајот на денот ветерот ќе го промени правецот во северен. Минималната температура ќе биде во интервал од 14 до 23, а максималната ќе достигне од 32 до 39 степени Целзиусови.
Во Скопје ќе биде сончево и топло, попладне со умерен развој на нестабилна облачност. Во делови од котлината ќе има услови за краткотраен дожд и ретки грмежи. Ќе дува слаб до умерен ветер од југозападен, а кон крајот на денот од северен правец. Минималната температура ќе се спушти до 22, а максималната ќе достигне до 38 степени Целзиусови.
Според најавите од Управата за хидрометеоролошки работи (УХМР) од утре ќе настапи позначителна промена на временската состојба. Ќе преовладува променливо облачно, нестабилно и посвежо време со услови за повремени локални врнежи од дожд, наместа поројни и проследени со грмежи, особено во вторник.
Дневната температура ќе биде во опаѓање и до средината на следната седмица се очекува да опадне за 8 до 10 степени во споредба со денешната.
Македонија
Мицкоски вечерва на Македонскиот фолклорен фестивал во Пустец, Албанија

Премиерот Христијан Мицкоски вечерва ќе ја посети Општина Пустец, Албанија. Генералниот секретаријат најави дека премиерот ќе се обрати на Македонскиот фолклорен фестивал Преспа кој се огранизира во Пустец, Албанија.
Фестивалот ќе се одржи на плоштадот „Гоце Делчев“ во Пустец со почеток во 18 часот. Ќе настапат фолклорни групи и културно-уметнички друштва од Северна Македонија и Мала Преспа, кои ќе ги претстават богатствата на македонското културно наследство.
Настанот се одржува под мотото „Единство, традиција и гордост на едно место“, а го организираат Општина Пустец, македонското друштво „Преспа“, и институции од Албанија и Македонија, со поддршка од Министерството за економија, култура и иновации на Албанија.