Во Стајковци се отвора нова спортска сала во основното училиште „Кирил и Методиј“, инвестиција обезбедена од буџетот на Општина Гази Баба, која чини 20 милиони денари.

Бобан Стефковски, градоначалник на општина Гази Баба, порача дека е среќен што по 50 години, населеното место Стајковци и учениците од Стајковци и од околината добиваат спортска сала, во која ќе може да ги реализираат часовите по физичко и по здравствено образование.

„Салата е опремена со најсоодветна опрема и спортски реквизити и тука учениците ќе може да практикуваат повеќе видови спорт: мал фудбал, кошарка, одбојка, ракомет, гимнастика и борачки вештини. Особена чест е за мене што на моја иницијатива салата ќе го носи името на Бобан Ивановиќ, македонски херој, кој животот го загуби бранејќи ја Македонија во акцијата во Диво Насеље. Со оваа одлука споменот за Бобан Ивановиќ ќе биде вечен и никогаш нема да се заборави. Исто така, во текот на денешниот ден свечено пуштивме во употреба и отворен спортски комплекс, во чии содржини има фудбалско игралиште со подлога од вештачка трева, ново кошаркарско игралиште и детско катче и жителите од околината од сите возрасти и од сите генерации ќе може да спортуваат, да се дружат и да се рекреираат“, порача тој и дополни:

„Општина Гази Баба на почетокот на оваа година почна со голема градежна офанзива, така ќе продолжиме и во иднина, со цел реализација на сите проекти што се од нашата изборна програма и навистина да им направиме подобри услови за живеење на нашите сограѓани во општина Гази Баба“.