Македонија
Стоилковиќ – Вучевиќ: испратени пораки за продлабочување на соработката меѓу двете земји и положбата на српскиот народ во земјата, како и на македонскиот народ во Република Србија
Во рамки на денешната официјална посета на земјава делегацијата предводена од премиерот на Република Србија Милош Вучевиќ, а во присуство на заменик-претседателот на Владата и министер за односи меѓу заедниците Иван Стоилковиќ, оствари средба со дијапората во Амбасадата на Република Србија во РС Македонија.
На средбата уште еднаш беа испратени пораки за продлабочување на соработката меѓу двете земји и положбата на српскиот народ во земјава, како и на македонскиот народ во Република Србија.
„Чест ми е што можам да ве поздравам, инсистирав на оваа средба затоа што ова, но и фактот дека имаме Србин во Владата на РС Македонија за нас не е само прашање на симболика, туку суштинско. Добивме уверување дека Коридор 10 е определба на оваа Влада, а зборувавме и за максимално поедноставување на процедурите на границите. Што се однесува до нас, ние сме максимално подготвени да го направиме ова. Многу е важно и Македонија да биде дел од „Експо“ и мило ми е што токму заменик-претседателот и министер Стоилковиќ ќе го води тој проект“, истакна на средбата српскиот премиер Вучевиќ и упати апел до српската заедница во земјава во сите различности кои, како што рече, ги имаaт двата народа, да го зачуваат националниот идентитет.
„Истото сакам да им го порачам и на Македонците кои живеат во Србија“, рече премиерот Вучевиќ.
„Денешната посета на премиерот Вучевиќ е круна на неодамнешната подготовителна посета на Белград и сето она што го сработевме во претходниот период“, порача заменик-претседателот и министер за односи меѓу заедниците Иван Стоилковиќ.
Претходно во текот на денот потпретседателот и министер Столковиќ го пречека премиерот Вучевиќ на Меѓународниот аеродром Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филков се сретна со министерката за правда на Косово: разговарано за случајот „Монструм“ и за „Диво насеље“
Денес министерот за правда, Игор Филков оствари работна средба со министерката за правда на Република Косово, Албулена Хаџиу, во Приштина
На средбата се разговараше на повеќе теми кои се од интерес на двете држави. Беа разменети искуствата и добрите практики во реформските процеси, кои се движат во ист правец. На средбата беше дискутирано и за две отворени прашања од интерес на двете земји.
Разговарано беше за случајот „Монструм“, за кој што од косовска страна беше презентирано дека барањата за екстрадиција се процесуирани од страната на Јавното обвинителство и дека веднаш откако ќе биде донесено решение или ќе имаат конкретни информации за истото ќе го информираат Министерството за правда на Република Северна Македонија.
Во однос на нивните барања за случајот „Диво насеље“, министерот Филков посочи дека сите предмети се земени во работа и дека се постапува со нив согласно националното законодавство и сите меѓународни стандарди.
Двајцата министри ја искажаа својата определба да продолжи соработката помеѓу двете институции во насока на остварување на заедничките заложби.
Македонија
ВЛЕН: ДУИ ги заборави Албанците, единствено се грижеше за богатството на неколку луѓе од врвот на партијата
„ДУИ е политичка партија која ги изневери Албанците. ДУИ е политичка партија која ги заборави Албанците, а се грижеше единствено за богатството на неколку луѓе од врвот на партијата. Денес сакаме јавно да поставиме прашање дали ДУИ е спремна да се соочи со одговорноста за тоа што работеше единствено за личен интерес на поединци од својот врв“, прашуваат од ВЛЕН.
„Дали ДУИ е спремна конечно да и објасни на јавноста за десетици и десетици афери и скандали кои се случија во минатите години.
Каде завршија 14 милиони евра отпишани долгови спрема фирми снабдувачи со електрична енергија, чии сопственици беа деца и роднини на луѓе од врвот на ДУИ и СДСМ?
Каде завршија скоро 400.000 евра доделени незаконски како спонзорства на разни фитнес студија и спортски клубови од страна на МЕПСО, без никакви критериуми и транспарантност?
Каде завршија парите од доделените десетици и десетици концесии за фотоволтаични и хидро централи доделени на деца и роднини на истите функционери од претходната власт?
Каде завршија парите од криминалните набавки за мазут во четири очи за потребите на с ТЕЦ Неготино, спроведени со сомнителни фирми во минатото?
Дали ДУИ ќе им објасни на своите гласачи, но и на сите гласачи Албанци, каде завршија парите одземени од нашите луѓе во стотиците коцкарници кои ги отворија во нивните мандати?
Дали ДУИ ќе каже за чиј интерес и сметка работеше фирмата Еуровиа која ги добиваше сите тендери во неколку министерства предводени од кадри на ДУИ?
Најдобронамерно им упатуваме порака на ДУИ да се посветат на расчистување на својот двор. Граѓаните бараат одговори за сите криминали кои се случија минатите годинии.
Гласачите дадоа јасна порака. Не сакаат повторно да гледаат и слушаат од луѓе кои докажаа дека ги интересира само своето богатење.
Добро е што ДУИ конечно прифати дека е опозиција. Ние ќе направиме се што е потребно, граѓаните да бидат задоволни и да знаат дека власта работи за нивниот интерес“, велат од ВЛЕН.
Македонија
Инаугуративна седница на ИППГ за поддршка на Кримската платформа
Денес во Собранието се одржа Првата седница на Интерпартиската парламентарна Група (ИППГ) за поддршка на Кримската платформа.
Седницата ја отвори и со неа претседаваше претседателот на Собранието на Република Северна Македонија, Африм Гаши, кој воедно е иницијатор и претседател на ова неформално тело. Претседателот Гаши им се заблагодари на пратениците за поддршката на неговата иницијатива и им посака активна, посветена и продуктивна работа во Групата.
„Денешнава седница и формирањето на оваа Група го приклучува Собранието кон гласноговорниците против руската агресија и испраќа моќна порака дека човековите слободи и права, владеењето на правото, меѓународно признатите граници и територијалниот интегритет мора да се почитувани и заштитени“, рече Гаши во своето обраќање.
На седницата се обрати и амбасдорката на Украина, Н.Е. Лариса Дир; потпретседателот на Собранието, Антнонио Милошоски, потпретседателот на Собранието, Јован Митревски и во име на потпретседателката на Собранието, Весна Бендевска се обрати пратеникот, Павле Арсоски.
Амбасадорката Дир нагласи дека Украинците ја чувствуваат поддршката од Република Северна Македонија, која високо се цени на сите нивоа на управување во Украина. Искажа благодарност за формирањето на ИППГ како додадена вредност на постојаните помош и поддршка која нашата држава ја дава на Украина, и во материјален и во политички и во дипломатски контекст.
Во своите обраќања говорителите ја подвлекоа отворената, непоколеблива и постојана поддршка на Република Северна Македонија кон Украина за зачувување на суверенитетот и територијалниот интегритет. Се согласија оваа ИППГ да се фокусира на неколку главни точки во својата работа и делување: консолидација на политиката на непризнавање на обидот за припојување на Крим; осуда за кршењето на човековите права, меѓународното хуманитарно право, заканите за животната средина, засилен мониторинг на спроведувањето на рестриктивните мерки и нивно доследно спроведување; потоа надзор и будност за секојдневното зголемување на безбедносните и хибридни закани; како и политика за обезбедување слобода на навигација и спречување на блокадата на транспортните коридори.