Македонија
Стоилковиќ на средба со чешкиот амбасадор Лудва: разменети мислења за актуелните политички и економски состојби во двете земји

Потпретседателот на Владата на РС Македонија и министер за односи меѓу заедниците, Иван Стоилковиќ денес оствари работна средба со делегација од Амбасадата на Република Чешка во Скопје, предводена од амбасадорот, Јарослав Лудва.
На средбата, инаку прва официјална меѓу двајцата соговорници, беа разменети мислења и ставови за актуелните политички и економски состојби во двете земји, како и за можностите за продлабочување, но и потврда на меѓусебните одлични дипломатски односи.
Стоилковиќ го запозна амбасадорот Лудва со досега сработеното од стапувањето на функцијата, а на средбата стана збор и за идните планови, односно клучните прашања и приоритети на Министерството за односи меѓу заедниците.
На крајот од средбата заклучокот на двајцата соговорници беше дека заштитата на етничките заедници со фокус на промената на перцепцијата и фактот дека тие треба да го добијат местото што го заслужуваат и во земјата во која живеат да се чувствуваат како рамноправни граѓани со сите права и обврски кои произлегуваат од Уставот, треба и понатаму да остане приоритет на Министерството за односи меѓу заедниците, како и дека постојат многу точки за кои може да се зборува и на кои може заеднички да се работи во иднина, а првата е зголемување на економската соработка и инвестициите на Република Чешка во Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Обидите на „Вреди“ да клеветат, не се ништо друго освен политичка злонамерност и завист, велат од ДУИ

Министерскиот состанок на ОБСЕ во 2023 година беше најголемиот и најзначајниот меѓународен настан организиран досега во Северна Македонија, настан кој собра министри за надворешни работи и делегации од целиот ОБСЕ простор, ставајќи ја нашата земја во центарот на светската дипломатија цели три дена, реагираат од ДУИ откако денеска „Вреди“ кажаа дека Бујар Османи и во МНР спроведувал сомнителни криминални тендери.
Настанот, велат од ДУИ, беше пофален од сите партнери и меѓународни институции, опишан како совршено организиран и момент што ги направи горди сите граѓани.
Според партијата на Ахмети, сите надлежни државни институции, вклучувајќи ги и тие за надзор ја потврдија неговата законитост, транспарентност и примерна реализација.
„Обидите на „Вреди“ да клеветат не се ништо друго освен политичка злонамерност и завист.
Ниту еден извештај не утврдил незаконитост. Ниту една постапка не е прекршена. Ниту еден договор не е нелегален.
Вистината е едноставна: Северна Македонија ја пречека светската дипломатија и реализираше настан кој ќе остане запаметен како дипломатски и организациски триумф. Овој успех им припаѓа на граѓаните, на институциите и на секој што работеше со посветеност за да го прикаже најдоброто од нашата земја.
Разбираме дека за оние кои никогаш немаат организирано ништо со меѓународна вредност е полесно да шират клевети отколку да ја прифатат реалноста.
Но фактите остануваат факти и ниеден политички шум не може да избрише една национална приказна за успех“.
Кампањата на клевети на „Вреди“ за ДУИ, не е напад само врз една личност туку тоа е навреда за секој службеник, волонтер и граѓанин кој придонесе како што велат, Министерскиот состанок на ОБСЕ да биде извор на гордост за Северна Македонија.
Македонија
На Табановце се чека 20-ина минути

Од 9.45 часот сообраќајот на автопатот Тетово – Скопје е нормализиран, инфмормираат од АМСМ.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен. Поради летните одмори, се бележи зголемена фреквенција на возила, на Табановце времето на чекање за влез и излез од државата е 20-ина минути, на другите граничните премини од македонска страна нема подолги задржувања за влез и излез од државата.
АМСМ препорачува приспособена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде што има можност од појава на одрони. Ова особено се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Одбележана 24-годишнината од загинувањето на десеттемина армиски припадници кај месноста Карпалак

Делегација од Министерството за одбрана и Генералштабот на Армијата, предводена од државниот секретар Елизабета Чуповска-Ристова и директорот на Генералштабот, бригаден генерал Орце Јордев, денеска положија венец со свежо цвеќе на спомен-обележјето на македонските бранителите, кои своите животи ги загубија кај месноста Карпалак во 2001 година.
Десеттемина прилепски бранители, Сашо Китаноски, Нане Наумоски, Бранко Секулоски, Марко Деспотоски, Ердован Шабаноски, Љубе Грујоски, Дарко Вељаноски, Веби Рушитоски, Горан Миноски и Пеце Секулоски, ги положија своите животи за зачувување на независноста, суверенитетот и на територијалниот интегритет на татковината.
Во спомен на бранителите на спомен-обележјето свежо цвеќе положија и делегации од Владата предводена од заменик-претседателот на Владата за политички систем, Љупчо Димовски, од кабинетот на претседателката и врховен командант на Армијата, претставници од семејствата на загинатите припадници на Армијата, од здруженија на граѓани и од политички партии.
Венци со свежо цвеќе ќе бидат положени и пред спомен-обележјето на македонските херои во центарот на Прилеп.