Македонија
Стојановски: Власта го одби нашиот предлог за зголемување на средствата за субвенциониран оброк за студентите

Парламентарното мнозинство повторно едно зборува, а сосема друго прави. Лицемерството на власта и колегите пратеници од мнозинството, како што видовте предмалку, доби уште една потврда, обвини пратеникот од ВМРО-ДПМНЕ, Бојан Стојановски.
„Колегите пратеници од мнозинството денес повторно го одбија нашиот предлог за зголемување на средствата за субвенциониран оброк за студентите од 120 на 160 денари. Уште еднаш покажаа дека не се грижат за студентите и дека оној таканаречен договор од пред два дена беше само театар и пиар-обид на власта за ќарување евтини политички поени.
Исто така, колегите од власта денес го одбија нашиот предлог-закон за директна помош за граѓаните преку поврат на дел од ДДВ, односно популарно наречен „Викенд без ДДВ“. За нас како пратеничка група е тотално нејасно зошто ова е неприфатливо за мнозинството, иако и самите знаат дека е одличен предлог за колку-толку да се ублажат последиците од кризата во која тие нѐ доведоа.
По којзнае кој пат, пратениците од мнозинството денес одбија и не го прифатија нашиот предлог-закон за акцизите со кој што веднаш и драстично ќе се намалат високите цени на горивата. Одбивајќи го овој предлог, тие директно удираат врз џебот и семејниот буџет на граѓаните. Но, очигледно тоа нив не ги засега.
И четвртиот предлог-закон, кој мнозинството денес го одби, е Законот за личниот доход, односно одложување на прогресивното даночење за кое ние велиме дека воопшто не е време. Иако нивната даночна политика досега се покажа како катастрофална, тие упорно не отстапуваат од неа и не престануваат да го празнат џебот на граѓаните“, изјави Стојановски.
Според него, власта наместо во овие тешки услови за живеење, кога инфлацијата е меѓу највисоките во Европа, кога цените на горивата се ултрависоки и кога граѓаните и компаниите едвај врзуваат крај со крај, навистина и искрено да им помогне на граѓаните и стопанството, тие, како што вели, без око да им трепне одбиваат да ги слушнат потребите, барањата и проблемите на граѓаните.
Пратеничката група на ВМРО-ДПМНЕ и коалицијата упатува силна порака до власта дека нема да отстапи од заложбите и борбата за подобар живот за сите граѓани и дека ќе продолжи да предлага законски решенија, кои ќе значат олеснување на граѓаните во секојдневната борба со проблемите, порача Стојановски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотресот на Света Гора почувствуван и во Македонија

Силниот земјотрес на Света Гора почувствуван и во југоисточниот дел на Македонија.
„Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, денес 7 јуни 2025 година регистрираа серија на земјотреси чии епицентри потекнуваат од соседна Република Грција.
Според досегашните податоци со кои располага опсерваторијата, почувствуван е земјотресот во 14 часот и 46 минути чиј епицентар се наоѓа 290 km југоисточно од Скопје, со Рихтерова локална магнитуда M L 5.2.
Земјотресот беше почувствуван во југоисточниот дел на Републиката со интензитет од III степени според Европската макросеизмичка скала“, известија од Сеизмолошката опсерваторија.
Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.
Македонија
(Видео) Василевски: Нула нови градинки за 4 години во Аеродром, околу 700 деца чекаат за запишување секоја година

Изминаа речиси 4 години откако ВМРО-ДПМНЕ ја освои локалната власт. И По 4 години, ВМРО-ДПМНЕ во Општина Аеродром не изгради ниту една од ветените 4 нови градинки, рече денеска на прес-конференција Бојан Василевски, ОО СДСМ Аеродром.
„Овиe градинки беа првиот од 7-те топ приоритети на Муцунски и Митески во програмата со кои ја освоија довербата на нашите сограѓани од Аеродром. Митески и Муцунски ветија целосно нови градинки во Острово, Мичурин, Лисиче и Долно Лисиче, но еве, четири години подоцна, ниту една од овие ветени градинки до денес не е ни започната со градба“, вели Василевски.
Според него, околу 700 дечиња годишно се на листа за чекање за упис во градинка, заради недостатокот на места во градинките во Аеродром.
„ВМРО-ДПМНЕ во Аеродром покажа целосна незаинтересираност за решавање на овој проблем. Единствениот објект на градинка кој се гради во моментов во Стар Аеродром е со 70.000.000 денари, средства обезбедени од Владата на СДСМ во 2024 година. Само за споредба, кога со Општина Аеродром управуваше СДСМ се изградија 2 нови градинки со вкупен капацитет од 400 деца. Целосно нов објект Црвенкапа во Стар Аеродром со капацитет од 200 деца и целосно нов објект Буба Мара во Ново Лисиче со капацитет од исто така 200 деца“, кажа Василевски.