Македонија
(Видео) Стојаноска од собраниската говорница: Запрете со овој филм, надвор имаме ужасна реалност, а вие ќе си гласате закон за да се амнестирате

Собраниските пратеници завршија со одморот. На првиот работен ден пратеничката од опозицијата, Дафина Стојаноска, им се обрати на собранискиот спикер и на владејачкото мнозинство.
Како стоите мирно денес тука, ги праша пратеничката Стојаноска собранискиот спикер Талат Џафери и владејачкото мнозинство алудирајќи на скандалот на Онкологија.
„Да имавме луѓе со морална чест и доблест, уште во саботата ќе расправавме за оставка на владата. Да имавме претседател со чест и доблест, ќе дојдеше да ни се обрати. И, конечно, да имавме владејачко мнозинство со чест и доблест, денес сите заеднички ќе се сложевме да расправаме по една друга пленарна седница, со единствена точка на дневен ред – за болните од рак на Онкологија. За жал, ништо од ова нема, а проблемите само се таложат“, потенцира пратеничката од ВМРО-ДПМНЕ.
На седницата, како што рече, треба да се зборува за скандалот на Онкологија, а не да се подметнуваат закони со европски знамиња. Реагира и на постапката на Џафери за незакажување на седницата за уставните измени.
„Многу добро ни е јасно зошто нема да свикате седница за уставните измени, можеби и до крајот на вашиот мандат. Но многу се плашам дека до крајот на вашиот мандат ќе ви се случат уште многу несреќи поради вашата небрежност и однесување“, рече Стојаноска.
Џафери ѝ објасни дека седницата за уставните измени ја прекинал кога утврдил дека дискусијата била исцрпена.
„Јас не сум крив што цитирате погрешни норми, нема правен проблем за прекин на седницата. Јас не го толкувам, туку го спроведувам тоа што го пишува во Деловникот“, одговори Џафери.
Револтирана за скандалот на Онкологија и незакажувањето на седницата за уставните измени, Стојаноска од собраниската говорница со порака до владејачкото мнозинство: „Запрете со овој филм, надвор имаме реалност, надвор ни се случуваат ужасни настани, а вие ќе си гласате закон за да се амнестирате“.
Пратеникот Скендер Реџепи беше целосно согласен со Стојаноска во врска со скандалот на Онкологија. И за него, како што рече, таму е сторено кривично дело. Но, според Реџепи, кривично дело е и неможноста Албанците од Велес да се образуваат на својот јазик.
„На Албанците од Велес не им се дозволи образование на албански јазик, дали ова не е кривично дело кога уставното право го опфаќа и начелото за образование“, праша Реџепи.
Инаку, на денешната седница на дневен ред е предлог на декларацијата по повод сто и дваесет годишнината од Илинденското Востание и Крушевската Република.
Пратениците ќе дискутираат и по предлогот за избор на член на Националниот совет за високо образование и научноистражувачка дејност и предлогот за избор на членови на Државниот совет за превенција на детско престапништво.
Како што е најавено, пратениците треба да расправаат и по предлог на закон за изменување и дополнување на Законот за акцизите и на Законот за Развојната банка на Северна Македонија по скратена постапка и слично.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бледи се обидите на Филипче да се искупи за предавството, реагираат од ВМРО-ДПМНЕ

Добро е што Венко Филипче конечно ги согледа состојбите и дојде на позициите на ВМРО-ДПМНЕ, реагираат од партијата ВМРО-ДПМНЕ по денешните изјави на Филипче од Берлин.
„Добро е што Филипче и СДС признаваат дека проблемот со Бугарија не е само внесувањето на Бугари во Устав, дека проблемот е подлабок и дека ги опфаќа и идентитетските национални обележја.
Исто така, добро е што СДС и Филипче прифаќаат дека засегнат е и македонскиот јазик, за кој постојано ја убедуваа македонската јавност дека го заштитиле согласно нивните предавнички договори кои ги прифатија и потпишаа.
Но има работи кои македонската јавност нема ниту да му заборави, ниту да му ги прости.
Откако СДС, на чело со менторот на Филипче, Зоран Заев во чијашто влада беше и самиот Венко, распродаде се што е национално македонско и Македонија ја продаваа како невеста која богато ќе ја омажат, доцна им е за каење и за ископување на гревовите.
Задоцнети и бледи се ваквите обиди на СДС и Венко Филипче за нивните предавства, народот ќе ги памети како најголемите предавници во историјата на државата и истите ќе завршат во темните историски страници.
Сега Македонија има Влада која ги брани националните интереси и нема ни милиметар да се помести од позициите за одбрана на идентитетот, историјата, културата, јазикот.
На чело на државата сега е Влада која ги брани, зацврстува и ги провира националните идентитетски обележја.
Влада која работи во интерес на државата и граѓаните, која со напорен труд ја развива во сите пори на општественото живеење и која работи на нејзина евроинтеграција на достоинствен начин со заштитени национални обележја“, реагираат од ВМРО-ДПМНЕ, преку соопштение.
Македонија
Филипче во Берлин му се заблагодари на Шолц за поддршката за македонскиот јазик

Претседателот на СДСМ, Венко Филипче, денеска во Берлин, во рамки на Конгресот на германската Социјалдемократска партија (СПД), се сретна со поранешниот германски канцелар Олаф Шолц.
Партијата извести дека во името на СДСМ и на сите граѓани, Филипче изразил искрена благодарност за силната и принципиелна поддршка која Германија, под водство на Шолц, ѝ ја даваше на Македонија во процесот на европска интеграција, но и за континуираната поддршка од Владата и од СПД – сестринската партија на СДСМ за заштита на македонскиот идентитет.
„Благодарни сме за поддршката, особено за резолуцијата на германскиот Бундестаг во 2023 година, со која испративте силна порака и поддршка за македонскиот јазик и македонскиот идентитет. Тоа беше резултат на државничката политика на СДСМ и соработката со германските социјалдемократи. Погрешните политики на актуелната власт во изминатата година ги загрозија сите овие успеси“, рече Филипче.
Претседателот на СДСМ рече дека е уверен дека поддршка од германската СПД ќе продолжи и понатаму, а од Берлин упати и јасна порака дека СДСМ ќе остане да ги брани државните и националните интереси.
„Не смее да се дозволи било какви додавки за македонскиот јазик во Извештајот на Европскиот парламент. Јазикот и и идентитетот не биле и не смеат да бидат предмет на додавки. Во сите документи на Европската унија македонскиот јазик е јасно потврден„ рече Филипче.
СДСМ останува цврсто посветен на европската иднина на државата и на стратешките партнерства што ја зајакнуваат македонската позиција на меѓународната сцена.
Македонија
Некст тајм, 2 Бона и Слаткаристика вечерва во Расадник, градоначалникот Орце Ѓорѓиевски ги повика сите на журка

Општина Кисела Вода и оваа вечер, во рамки на Културното лето 2025, кое е под слоганот „Сè на свое место“, нуди ново музичко доживување. На платото пред салата „Расадник“, од 20:30 часот, ќе настапат едни од најголемите музички имиња на македонската сцена – Некст тајм, 2 Бона и Слаткаристика.
Градоначалникот на Општина Кисела Вода, Орце Ѓорѓиевски, ги покани сите граѓани да бидат дел од овој музички настан.
„Дали сте подготвени за уште една незаборавна вечер? 2 Бона, Слаткаристика и Некст тајм ќе се погрижат за тоа! Вечерва не се бројат часови, туку моменти! Подгответе се за вечер исполнета со добри вибрации и незаборавна забава. Не дозволувајте да ви раскажуваат – бидете дел од најдобрата журка во Скопје! Вечерва, 20:30 часот, плато пред сала Расадник“, повика градоначалникот Ѓорѓиевски.