Македонија
Стојаноски до Ковачевски: Зошто се плашите да побарате оставка од Мерко, а устите ви се полни со ЕУ

Јавноста е сведок на корупциски скандали продуцирани од ДУИ, а уште повеќе зачудува фактот што во СДСМ молчат и не смее ништо да изустат ако не им дозволат, рече пратеникот од ВМРО-ДПМНЕ, Бојан Стојаноски, на денешната собраниска седница за пратенички прашања. Тој укажа и на случајот со Рамиз Мерко, градоначалник на Струга.
„Пред десеттина дена имаше одлука на Стејт департментот, со која Мерко беше ставен на црната листа, и тогаш излегува никој не е тука да објасни, ниту да побара оставка од Мерко. Немате храброст да побарате оставка од струшкиот градоначалник, се препелкате дека немате надлежност и оти го избрале граѓаните“, рече Стојаноски и го праша премиерот Димитар Ковачевски зошто се плаши да побара оставка од Рамиз Мерко, лице осомничено за криминал, а устите им се полни, како што рече, со ЕУ.
Стојаноски постави и две прашања до министерот за правда, Кренар Лога.
„Вие сте од Струга и верувам дека сте запознаени со случувањата во државава, како и во општина Струга. Оттука, првото прашање е дали ова што се случува во Македонија, особено во Струга, се европските вредности за кои влеговте во Владата и зошто не побарате одговорност од оние што не презеле ништо за шесте кривични пријави за Мерко. И второ прашање, дали како министер за правда верувате дека може да има непристрасен однос имајќи предвид дека во правосудството има партизација и дали ви е поважно да бидете дел од власта за доделување тендери или ви е важно тоа за што влеговте во Владата – европскиот пат“, праша Стојаноски.
Објасни и како ВМРО-ДПМНЕ ќе постапи по промена на власта.
„Оние институции што ќе ги води ВМРО-ДПМНЕ, а ќе може, ќе имаат надлежност да носат правда, ќе ги извади криминалците за уши, особено оние што 20 години управуваат со оваа држава и се заштитени како бели мечки“, рече Стојаноски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.