Македонија
Стразбур ја донесе првата пресуда во корист на девојка од Македонија што го смени полот

Европскиот суд за човекови права во Стразбур, денеска, првпат се произнесе за случај на македонско трансродово лице и пресуди во негова корист. Судот утврдил дека во случајот „Х против Македонија“ постојната законска рамка во земјата има јазови и сериозни недостатоци што го довеле транслицето во ситуација на стрес и несигурност во признавањето на неговиот родов идентитет. Државата ќе треба да му исплати и 9 илјади евра нематеријална штета за претрпен стрес. Ваквата вест ја објави коалицијата „Маргини“ на „Фејсбук“.
„Коалицијата ‘Маргини’ денес во судот во Стразбур доби позитивна пресуда во случајот ‘X против Македонија’, во кој судот утврди дека постојната законска рамка има јазови и сериозни недостатоци што го довеле транслицето во ситуација на стрес и несигурност во признавањето на неговиот родов идентитет.
По оваа одлука, Македонија има обврска да донесе закон кој ќе им овозможи на трансродовите луѓе брза, транспарентна и пристапна постапка за правно признавање на родот. Судот на транслицето му додели 9.000 евра нематеријална штета за претрпен стрес во изминатиот период“, соопшти коалицијата.
Тужителот Х, чиј идентитет е таен, е роден во 1987 година во Македонија како девојче. Но, од најрано детство се доживувала како машко. Во 2010 година ја почнува постапка за менување на полот. Во меѓувреме почнала и со хормонска терапија во Белград за да ја зголеми стапката на тестостерон во организмот. По враќањето во земјава, МВР прифатило да ѝ биде сменето името во личните документи, но ознаката за пол останала „женски“ затоа што процедурата за менување на оваа ознака се прави според друг закон. Поради соочувањето со многубројни пречки при обидот од женско да го смени полот во машко со поддршка на коалицијата „Маргини“, трансродовото лице Х се одлучува да поведе тужба во Стразбур.
Даниела Трпчевска-Зафировска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Параглајдинг несреќа на Галичица: државјанин на Германија доживеа тежок пад од поголема височина

Планинската спасителна служба Охрид извести дека вчера, околу 18:30 часот, добила повик од група параглајдеристи кои летале од падините на Галичица.
Тие пријавиле дека нивниот пријател, државјанин на Германија, од засега непознати причини доживеал тежок пад од поголема височина, на исклучително непристапен и карпест терен.
„За голема среќа, тројца спасители на ПСС во тој момент престојуваа во планинарската куќа „Спиридон“, каде е лоцирана и спасителната станица на ПСС, опремена со специјализирана техничка опрема за интервенции во овој регион. Веднаш по дојавата, екипата за само 15 минути стигна до местото на несреќата, изврши имобилизација на повредениот и започна комплексен транспорт по стрмен и тежок терен. Дополнителна отежнувачка околност беа и ноќните услови во кои се одвиваше целата акција.
По повеќе од еден час напорна интервенција, во 20:20 часот, повредениот беше безбедно спуштен до асфалтниот пат кај превојот Баба, каде беше предаден на екипа на Итната медицинска помош од Охрид. Од таму, тој веднаш беше пренесен во Специјалната болница за ортопедија и трауматологија „Св. Еразмо“, каде, за жал, му беа констатирани фрактури на пет пршлени во долниот дел на рбетот“, велат од Планинската спасителна служба.
Македонија
(Фото) Герасимовски: Со новата механизација го исчистивме сметот во Центар

Градоначалникот Горан Герасимовски, информира дека во текот на вчерашниот ден хигиеничарите од општината со новата механизација за чистење го собраа целиот смет од улиците во Центар.
„Целиот смет е собран од центарските улици. Нашите вредни хигиеничари вчера чистеа и во населбата Кале, а потоа со цистерна ги миеја улиците. Самите го исчистивме Центар, додека Град Скопје и ЈП „Комунална хигиена“ го преплавија цело Скопје со смет. Им благодарам на хигиеничарите што секојдневно се на терен, неуморно работејќи за наша почиста општина“, рече Герасимовски.
Македонија
Муцунски во Њујорк: Активна агенда со билатерални и мултилатерални средби

Шефот на македонската дипломатија, Тимчо Муцунски, во рамки на учеството на 80. Генерално собрание на Обединетите Нации во Њујорк, оствари низа билатерални средби и учествуваше на значајни мултилатерални настани.
Во одвоени средби со неговите колеги – министерот за надворешни работи на Кипар, Константинос Комбос, и министерот за надворешни работи на Султанат Оман, Сајид Албусаиди – беше потврдена заложбата за понатамошно унапредување на односите. Со министерот Комбос акцентот беше ставен на поддршката за европската интеграција и улогата на Кипар како земја-членка на ЕУ, која од јануари 2026 година ќе го преземе претседавањето со Унијата. Во разговорите со министерот Албусаиди, пак, фокусот беше насочен кон развој на билатералната соработка, особено во областа на трговијата и економијата.
Муцунски учествуваше и на Првиот биенален Самит за одржлива, инклузивна и отпорна глобална економија, каде ја нагласи улогата на Обединетите Нации во справувањето со глобалните предизвици и ја истакна посветеноста на државата кон спроведување на Целите за одржлив развој, усогласени со Националната стратегија за одржлив развој.
На покана на италијанскиот министер за надворешни работи, Антонио Тајани, министерот Муцунски присуствуваше и на работниот појадок со групата „Пријатели на Западен Балкан“, каде се разговараше за европската перспектива на регионот, стабилноста и регионалната соработка. Муцунски нагласи дека земјата останува цврст и конструктивен партнер на Европската Унија – посветена на реформите, владеењето на правото и економскиот раст, известува Министерството за надворешни работи.