„Поминаа две недели како се обративме до јавноста и побаравме итни одговори и мерки од страна на Министерството за образование и наука, кои ќе го решат нашиот проблем, како студенти и идни филмски уметници. Освен изјавата од Министерството, во која беше само повторено дека се работи на решение, и шпекулациите што дојдоа до нас дека наводно ќе има решение, сепак ние не сме добиле ниту едно официјално известување од Министерството. Односно Министерството за образование и наука нема никаква комуникација со институција што е под нивна надлежност“, се вели во реакцијата на студентите на Институтот за филм – Филмска академија Охрид.

Тие велат дека веќе втор месец се оставени на цедило, сѐ уште со надеж дека ќе има позитивна разрешница и набргу ќе почнат со редовна настава.

„Два месеца, без никакво известување од Министерството за образование и наука, до студентите што доаѓаат од целиот свет, привлечени од квалитетниот проект што го понуди ИФФА (ФИОФА), воопшто незаинтересирани за дневнополитичките случувања во Македонија. Во најмала рака, ова е несериозен однос од страна на едно министерство и воопшто на една сериозна држава кон академски граѓани, високообразовани кадри и пред сѐ непочит кон уметниците што дошле во Македонија на дообразование, со желба за траен престој и придонес кон македонската кинематографија.

Револтирани поради молкот и непостапувањето на надлежните за ситуацијата во која се наоѓаат студентите на ИФФА (ФИОФА), а за која претходно испративме писмо до сите релевантни медиуми, ја известуваме јавноста дека студентите што имаат важечки договори со Министерството за образование и наука ќе почнат правна постапка и ќе поведат заедничка тужба, како и поединечни тужби до Министерството за образование и наука поради неисполнување и непочитување на договорите, како и поради дезинформирање или ненавремено информирање поради што студентите трпат материјални штети. Истовремено, интернационалните студенти ги известија своите матични амбасади, но и медиумите во своите земји. Ние сме студенти, уметници и филмски работници. Ние можеме да разбереме сѐ, но не и бескрајниот молк“, се вели во реакцијата.