Македонија
Сугарески: Почнуваме со реконструкција на локални патишта и улици во сите општини
Почнуваме со реализација на проектот за изградба и реконструкција на преку 400 километри локални патишта и улици во сите 80 општини и Градот Скопје, за што инвестираме вкупно 70 милиони евра. Министерството за транспорт и врски веќе го објави првиот тендер за реконструкција и санација на вкупно 28 улици и локални патишта во 17 општини“ – истакна министерот за транспорт и врски, Горан Сугарески, на денешната прес-конференција што се одржа во Прилеп.
Во првата фаза од проектот за поврзување на локални патишта ќе се работи на реконструкција и надградба на 28 локални патишта и улици со вкупна должина од 23,6 километри, во вредност од 4,5 милиони евра.
Следува интегрален текст од говорот на министерот за транспорт и врски, Горан Сугарески.
„Подобрување на урбаното живеење, олеснување на животот на граѓаните и економски развој на државата се врвни приоритети кои континуирано ги реализира Владата предводена од СДСМ. Тоа го докажавме преку историски најголемите инвестиции во патната мрежа, преку инвестициите во изградба на водоводи и канализации, преку реализација на круцијалниот проект за гасификација на земјата и други значајни капитални проекти. Нашите заложби за подигнување на квалитетот на живот во секоја општина се видливи на терен и се потврдуваат со бројните проекти што досега ги реализиравме и оние на кои работиме во моментов насекаде низ државата. Еден од тие значајни инфраструктурни проекти од особена важност за општините е проектот за изградба и реконструкција на локални патишта и улици во сите 80 општини и Градот Скопје, инвестиција од вкупно 70 милиони евра. Веќе информиравме дека средствата се обезбедени, притоа на секоја општина согласно однапред утврдена методологија ѝ се распределени средства со одредена висина, за чие користење општините веќе аплицираа до Министерството за транспорт и врски. Заради правична распределба на средствата се водевме од критериуми користени за слични намени, како што се бројот на население, број на населени места и површина на општините, а исто така предвид ја зедовме и Одлуката за класификација на планските региони според степенот на развиеност за периодот 2013-2017 година. На мое огромно задоволство, денеска сме тука да го најавиме почетокот на реализација на овој проект. Сакам да информирам дека Министерството за транспорт и врски го објави првиот тендер за изградба и санација на локални улици и патишта во 17 општини. Во оваа прва фаза ќе се работат 28 локални улици во должина од 23,6 километри и во вредност од 4,5 милиони евра. Подетално, веднаш по завршувањето на тендерската постапка и роковите за избор, приближно на есен започнуваме со градежни работи, и тоа на:
• Улица Париска во Карпош
• Улица Живко Фирфов во Кисела Вода
• Улица број 532 – Илинден
• две улици во Ѓорче
• две улици во Тетово
• Локален пат до село Жубовце во Врапчиште
• по една улица во Кочани, во Кратово во Македонски Брод
• неколку улици во село Двориште во Берово
• Локален пат Прналија-Шупуѓе во Радовиш
• Локалниот пат до село Слоешица во Демир Хисар
• 3 улици во Кавадарци
• 2 улици во Неготино
• 6 улици во Богданци
• Локалниот пат од Долно до Горно Липовиќ во Конче
• и улица Мице Козарев во Прилеп.
Како што истакнав, тендерската постапка е во тек, рокот за поднесување на понудите е до 18 август, по што следува евалуација на понудите, договор со изведувач и веднаш потоа започнуваме со градежните работи. Во оваа прва фаза влегоа само општините кои до Министерството доставија готови ревидирани проекти кои Светска банка веднаш ги одобри. Исто така, сакам да најавам дека работиме и на вториот пакет на општини, кој некаде до средината на август ќе го испратиме на одобрување до Светска банка и веднаш биде одобрен ќе биде објавен вториот јавен повик. Затоа е многу важно во овој период општините да подготвуваат проекти и да ги испраќаат до Министерството за транспорт и врски, со цел ефикасно и навремено да се искористат средствата што ни се одобрени. Сметам дека со проектот за локални патишта не само што ќе го подобриме урбаното живеење, туку ја зголемуваме безбедноста во сообраќајот, создаваме услови за економски развој на општините и привлекување нови инвестиции. Притоа верувам дека реализацијата на еден ваков проект ќе придонесе за рамномерен регионален развој, економско зајакнување на општините и намалување на разликите помеѓу планските региони и општините кои се дел од нив“ – изјави министерот за транспорт и врски, Горан Сугарески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бегај од Скопје се сели во Тетово, Гостивар и Дебар, улиците ќе бидат затворени
Во Тетово, Гостивар и Дебар денеска ќе има посебен сообраќаен режим поради престојот на претседателот на Албанија, Бајрам Бегај, кој ја завршува тридневната официјална посета на земјава.
Општина Тетово и СВР Тетово информираат дека денеска во градот ќе има привремени безбедносни мерки, посебен режим во сообраќајот и забрана за паркирање на повеќе улици по повод посетата на претседателот на Република Албанија Бајрам Бегај на Тетово.
Општина Тетово препорачува возила да не се паркираат на булевар „Маршал Тито“ од почетокот до кружниот тек кај пазарот со булевар „Благоја Тоска“, на булевар „Благоја Тоска“ од кружниот тек со булевар „Маршал Тито“ до зградата на Општина Тетово, на улица „ЈНА“ („Дервиш Цара“) во целост, до семафорите, на улица „Илинденска“ од Основен суд до Универзитетот на Југоисточна Европа, на улица „Киро Ристоски-Дрнц до Арабати Баба Теќе, на улица „ВонВардарска“ и на улица „172“.
-Возилата паркирани спротивно на известувањето ќе бидат отстранети од страна на службите, наведуваат од Општина Тетово.
СВР Тетово апелира до сите учесници во сообраќајот да ги почитуваат наредбите и упатствата што ќе ги даваат полициските службеници, со цел непречено и безбедно одвивање на сообраќајот.
-Полициската станица за безбедност на патниот сообраќај Тетово и Полициското одделение за безбедноста на патниот сообраќај Гостивар при СВР Тетово ќе преземат мерки за посебен режим на сообраќајот по сообраќајниците на поширокото централно подрачје на Тетово и Гостивар, посочија од СВР Тетово.
Согласно агендата, претседателот Бегај ќе ја посети Општина Тетово, ООУ „Лирија“, Шарената џамија и Арабати Баба Теќе.
Албанскиот претседател, Бајрам Бегај, кој е во тридневна официјална посета на земјава, по посетата на општина Гостивар, престојот ќе го заокружи со посета на Дебар, во попладевните часови, од каде преку граничниот премин Блато ќе замине за Албанија.
По тој повод од ОВР Дебар соопштија дека попландево во сила ќе биде посебен сообраќаен режим со цел непречено движење на возилата од делегацијата и непречено одвивање на предвидените активности.
-За таа цел, полициски службеници од ОВР Дебар и СВР Охрид, ќе вршат физичко обезбедување на трасата на движење како и на објектите каде се предвидени работни средби. Мерките стартуваат утре, 28 февуари од 12 часот и ќе траат до 19 часот, информираше Стефан Димоски, портпарол на Секорот за внатрешни работи -Охрид.
Дообјаснува дека посебниот сообраќаен режим ќе се спроведува со повремено затворање за сообраќај на регионалниот пат Р-1202, од Бошков мост до Дебар, улиците „Елена Ѓика“ од АД „Кнауф“ до кружен тек „Енѓи“, улиците „Иса Болетини“, „Јусуф Грвала“ и регионалниот пат Р-1201 до улиците „Мојси Големи“, „Амди Леши“, Јосиф Багери и регионалниот пат 1202 Дебар- граничен премин Блато.
-Апелираме до граѓаните и до сите учесници во сообраќајот, да се придржуваат до насоките на полициските службеници кои ќе вршат обезбедување и на исклучивост во користењето на своите моторни возила во овој временски период, посочува Димоски.
Според Општна Дебар, Бегај ќе се сретне со градоначалникот, Фисник Меља, но не се предвидени изјави.
Претседателката Гордана Сиљановска-Давкова вчера со државни и воени почести го пречека претседателот на Албанија Бајрам Бегај.
Македонија
Орце во ноќен увид на улиците кои се реконструираат низ Скопје, вели се работи и дење и ноќе
Во завршна фаза е изградбата на улицата „Фрањо Клуз“ во Аеродром која е една од најзначајните сообраќајници во овој дел од градот. Се работи со полна динамика, и дење и ноќе, затоа што скопјани заслужуваат модерен, функционален и безбеден град, објави вчера вечерта градоначалникот на Град Скопје, Орце Ѓорѓиевски.
-Делата говорат. Скопје не смее да чека. Скопје мора да се развива – посветено и со визија. Она што со години било запоставувано и туркано под тепих, денес се решава темелно и одговорно – објави на Фејсбук Ѓорѓиевски.

Реконструкцијата опфаќа нов тампон, двослоен асфалт, нови рабници, а во овој момент интензивно се асфалтираат тротоарите. Во должина од еден километар се изведуваат нови тротоари, се поставува современо улично осветлување и се гради нова атмосферска канализација.
– Од наредната недела, жителите на Аеродром ќе возат по нова, современа и безбедна улица. За само три месеци од преземањето на функцијата градоначалник на Скопје, покажавме дека кога се работи со срце, визија и чесна намера – резултатите се очигледни. Не ветивме чуда, туку работа. И работиме – објави Ѓорѓиевски.
Ѓорѓиевски, вели дека ова е само почеток и најавува дека следува најголемата инфраструктурна обнова досега.
– Ќе се работи рамномерно, во секој дел на Скопје. Затоа што секој заслужува исти услови, исти шанси и ист квалитет на живот.
Мојот народ го заслужува најдоброто – објави Ѓорѓиевски.
Македонија
Пролетен ден во зима, денес сонце и температури до 15 степени
Времето денеска ќе биде сончево со мала до умерена локална облачност. По одделни котлини ќе има услови за појава на магла. Ќе дува слаб ветер од југоисточен правец.
Минималната температура ќе биде во интервал од -3 до 6, а максималната ќе достигне од 10 до 15 степени.
Во Скопје, сончево со мала до умерена облачност и со слаб југоисточен ветер. Во делови од котлината ќе има услови за појава на утринска магла. Минималната температура ќе се спушти до -1, а максималната ќе достигне до 15 степени.
Во наредните денови продолжува периодот на стабилно и релативно топло време. Утрата ќе бидат постудени и по одделни котлини ќе има услови за појава на слаба магла.

