Министерот за транспорт и врски, Горан Сугарески, и директорот на ЈП за државни патишта, Зоран Китанов, извршија увид во изградбата на експресниот пат Градско-Прилеп, која, како што информираат од ресорното Министерство, се одвива во три фази.

„Првата делница од Градско до Дреново во должина од 16 километри, втората делница од клисура Дреново до Фариш во должина од 10 километри и третата делница од Прилеп до мостот на Ленишка Река и изградба на трета лента од село Беловодица до каменоломот „Маврово“ во должина од 7,5 километри. Вкупниот прогрес на градежните работи е 20 отсто, а во тек е изведба на конструкции на мостовите, како и земјени работи“, се наведува во соопштението на Министерството.

Министерот Сугарески и директорот на ЈП за државни патишта, Китанов, денеска извршија увид во изградбата на втората фаза.

„Наследивме огромни проблеми што се јавија при изградба на оваа фаза, проблеми со експропријацијата, со проектираниот тунел и со археолошки наоѓалишта. Но, со директорот континурано преговараме со изведувачот како да ги надминиме овие проблеми и да ја забрзаме изградбата. Мислам дека сме на добар пат, набргу ќе се потпише анекс на договорот за да утврдиме краен рок за изградба и ве уверувам дека ќе се држиме до тој рок. Друга работа што сакам да спомнам е дека во тек е изградба и на делницата од Градско до Дреново, а исто така да најавам и дека набргу ќе се распише тендер за последната делница од Прилеп до мост на Ленишка Река и проширување на делот кај каменоломот. Средствата за оваа делница се веќе обезбедени од ИПА, така што ја имаме заокружено целата финансиска рамка за изградба на овој пат“, изјави министерот за транспорт и врски.

Во однос на значењето на експресниот пат, Сугарески потенцира дека оваа е една од клучните патни делници што ја поврзува Пелагонија со регионот заради побрз и безбеден превоз на стока и патници.