Македонија
Судењето за Рашковски одложено за крајот на ноември

Даниел Станчев, сопственикот на фирмата „Инвока груп“ од која обвинетиот Драги Рашковски го набавил софтверот, на начин кој според Обвинителството е незаконски, не се појави на денешното рочиште за „Софтвери“. Неговиот адвокат, Трајче Китановски, на судијата му предочи лекарска потврда, за која судијката Фанка Јанчулева-Михаиловска е архивски печат. Издадена е од поликлиника во Шуто Оризари. Според истата, Станчев треба да мирува.
„Лекарска потврда од 7.11.2022 година, кој е упатен на Клиника за инфективни болести и фебрилни состојби. Лекарската е од ПЗУ Интегри Шуто Оризари, со забелешка дека кај пациентот поради природа на болеста е дадена инфузиона терапија, како и табеларна терапија, отворено боледување, треба да мирува“, кажа судијката Фанка Јанчулева-Михаиловска.
Обвинетиот има боледување за седум дена, што значи дека ќе може да се појави на следното судење, закажано за крајот од месецот.
Првообвинет во предметот „Софтвери“ е Рашковски, кој се гони бидејќи обвинителката Ивана Трајчева тврди дека тој го местел тендерот за да го добие „Инвока груп“ на Станчев, а исто така, набавил софтвер кој е нефункционален. Дополнително, Трајчева докажува дека Рашковски делел хонорари на хонорарци во Влада, а потоа, дел од парите зел за него.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Почувствуван земјотрес во Македонија

Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, попладнево во 16 часот и 14 минути регистрираше земјотрес чиј епицентар потекнува од епицентралното подрачје Тетово-Гостивар, 39 км западно од Скопје, со Рихтерова локална магнитуда, ML2.7.
Според досегашните податоци со кои располага опсерваторијата, земјотресот е почувствуван во Тетово, Гостивар и блиската околина со интензитет од III степени според Европската макросеизмичка скала.
Македонија
МНР: Амбасадата во Прага е во координација со семејството на Чифлиганец за пренeсување на телото во Македонија

Министерството за надворешни работи и надворешна трговија информира дека на 2 август 2025 година, до македонската амбасада во Прага била доставена информација за тешка сообраќајна несреќа во која бил повреден македонскиот државјанин Душко Чифлиганец. Тој управувал мотор кога дошло до незгодата, по што со тешки повреди бил пренесен во болница.
На 3 август, семејството го известило дипломатско-конзуларното претставништво дека Чифлиганец им подлегнал на повредите.
Како што соопштија од МНР, Амбасадата во Прага е во континуирана комуникација со семејството со цел завршување на сите неопходни формалности и организација за пренос на телото во Македонија.
Македонија
Изгаснат пожарот кај Липково, гори на две локации

До 12 часот активни се два пожари на отворен простор, еден пожар е под контрола, а еден е изгаснат.
Активните пожари се наоѓаат во село Богомила во општина Чашка, каде гори мешана шума, како и во село Грешница во општина Македонски Брод, во деградирана нискостеблеста шума, соопшти ЦУК.
Пожарот кој е под контрола е во село Стровија во општина Долнени, зад местото викано Гајдарец-Клепало, во нискостеблеста шума.
Пожарот што е изгаснат се наоѓа во село Слупчане во општина Липково, каде горела ниска вегетација.